Amasezerano y’ibanze yarangiye Equity Bank itabashije kwegukana BPR Plc

Yanditswe na Rabbi Malo Umucunguzi
Kuya 2 Mutarama 2020 saa 10:31
Yasuwe :
0 0

Ikigo Equity Group Holdings Plc cyo muri Kenya cyatangaje ko muri uyu mwaka wa 2020 kizakomeza ibiganiro na Atlas Mara ifite Banku y’Abaturage y’u Rwanda, hagamijwe kureba uko icyo kigo cyakwegukana ibikorwa byayo mu Rwanda.

Muri Mata umwaka ushize nibwo Equity Group Holdings Plc yatangaje ko yemeranyijwe mu buryo bw’ibanze, guhabwa imigabane 62% Atlas Mara ifite muri Banki y’Abaturage y’u Rwanda (BPR Plc) na 100% by’imigabane muri African Banking Corporation Tanzania Limited, African Banking Corporation Zambia Limited na African Banking Corporation Mozambique Limited.

Atlas Mara yo yagombaga guhabwa imigabane miliyoni 252 muri Equity Group Holdings Plc ingana na 6.27% muri iki kigo gikomeye muri Kenya, mu igurana ry’imigabane rifite agaciro ka miliyari 10.7 z’amashillingi ya Kenya (miliyoni $106).

Byateganywaga ko ari igikorwa gishobora gufata amezi ari hagati y’ane n’atandatu ku ruhande rwa Equity Group, bikabanza kwemezwa n’inzego zigenzura ibi bigo birimo Banki Nkuru y’u Rwanda n’ibigo bigenzura isoko ry’Imari n’imigabane.

Nyamara ayo mezi yararenze, ndetse Equity Group ivuga ko nubwo icyifuzo cyayo gikomeje, kitahise gishoboka kubera ingingo zimwe zitumvikanweho zigomba kugenga ubu bucuruzi.

Mu itangazo Equity Group yasohoye kuri uyu wa Kane, yavuze ko kugeza ubu impande zombi zitarashyira umukono ku masezerano ya burundu agena iri hererekanya ry’imigabane, ndetse igihe cy’amasezerano y’ibanze yagombaga kubakirwaho “cyamaze kurangira.”

Yakomeje iti “Gusa EGH na ATMA biteganya gukomeza ibiganiro mu 2020 mu kugerageza kwemeranya ku ngingo z’ubucuruzi zijyanye n’ihererekanya ryemeranyijwe, cyangwa ibindi bihwanye naryo. Kugeza ubu nta kigaragaza ko iri hererekanya rizabaho.”

Equity Group yavuze ko yo igikomeye ku mugambi wayo wo kwagurira ibikorwa mu karere, hagamijwe kugeza serivisi z’imari kuri benshi.

Yavuze ko mu gihe hataratangazwa ibintu bishya kuri iyi ngingo, abanyamigabane bayo bakwitondera uko bayikoresha ku Isoko ry’Imari n’Imigabane rya Nairobi, u Rwanda na Uganda.

Ubwo hemezwaga iri gurana, Umuyobozi Mukuru wa Atlas Mara Michael Wilkerson yemeje ko rijyanye n’impinduka iki kigo giheruka gutangaza, ngo cyibande by’umwihariko ku isoko byoroshye kugera ku ntego.

Ati “Twizera ko izi banki zizungukira mu mikorere ya Equity Group zinakomeze guha serivisi abakiliya n’abagenerwabikorwa mu isoko zikoreraho. Muri icyo gihe tunateganya ko Atlas Mara izaba iri mu mwanya mwiza wo gutera imbere ku masoko yacu y’ibanze.”

Mu 2016 nibwo Atlas Mara Ltd yaguze 62% by’imigabane ya Banki y’Abaturage (BPR), havuka ikigo gishya cyahurije hamwe BPR n’ishami ry’ubucuruzi rya Banki Itsura Amajyambere, BRD, bibyara BPR Part of Atlas Mara.

Equity Group isanganywe ibikorwa muri Kenya, u Rwanda, Uganda, Sudani y’Epfo, Tanzania na RDC, ikagira ishoramari mu bikorwa birimo banki, ubwishingizi, ubugenzuzi, ibikorwa remezo n’ibindi. Ifite umutungo ugera kuri miliyari 6 z’amadolari ya Amerika.

Hamwe n’abakiliya miliyoni 13.5 ifite, Equity Bank ishamikiye kuri icyo kigo ni yo banki ya mbere nini mu karere aho ifite amashami 290.

Equity Group ntirabasha kwegukana imigabane ya Atlas Mara muri BPR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza