Abanyafurika barashishikarizwa gushora ku isoko ry’imari n’imigabane aho kugura ubutaka n’amatungo

Yanditswe na Habimana James
Kuya 24 Gicurasi 2019 saa 09:11
Yasuwe :
0 0

Umuyobozi Mukuru w’Ikigo cy’Imari n’Imigabane mu Rwanda (RSE), Pierre Célestin Rwabukumba, yavuze ko abantu bagifite imitekerereze y’aho bahitamo gushora amafaranga yabo mu kugura ubutaka cyangwa amatungo aho kuyashora mu bijyanye n’isoko ry’imari n’imigabane kandi ari byo bifite inyungu cyane.

Yasobanuye ko mu gihe Abanyafurika bazaba bataragira umuco wo gushora amafaranga yabo mu isoko ry’imari n’imigabane, Afurika izakomeza kuba umugabane udashobora gukora imishinga y’igihe kirekire kuko nta mafaranga izaba ifite.

Rwabukumba yabigarutseho kuri uyu wa Gatanu mu nama yahuje ihuriro ry’inama z’imari n’imigabane muri Afurika y’Uburasirazuba.

Ni inama yahuje abahagariye inama z’imari n’imigabane mu bihugu bigize uyu muryango, abayobozi b’amabanki n’abandi bafite aho bahuriye n’iri soko.

Rwabukumba usanzwe ayobora ishyirahamwe ry’ibigo by’imari n’imigabane muri EAC, yavuze ko impamvu bahuriye muri iyi nama ari uko basanze bose bafite ibibazo bijya gusa.

Yavuze ko iyi nama bayiteguye bagamije kandi gucoca ibibazo bafite muri iri soko ry’imari n’imigabane kuko ngo ikigaragara ari uko aya masoko y’imari yaba ayo mu Rwanda, muri EAC no muri Afurika hakiri ikibazo cy’aho abantu batarayitabira.

Ati “Iyo urebye muri EAC usanga isoko ry’imari ritaritabirwa ku buryo buhagije, uyu munsi umuntu aracyahitamo kugura isambu cyangwa inka kubera ko ashobora kuyifata umurizo akayireba, kugira ngo umusobanurire iby’imigabane ntabwo byoroshye. Ujya kubwira umucuruzi ufite ibikorwa runaka ngo azane amafaranga agure imigabane we akumva ko ugiye kumutwara ikigo cye.”

Yakomeje agira ati “Turimo kureba icyo twakora kuko iyo urebye ibihugu byose byateye imbere ubu bifite ubukungu bukomeye ku Isi ni uko byagiye bikoresha isoko ry’imari n’imigabane, niba umukire wa mbere ku Isi ari Bill Gates, uwa mbere muri Afurika akaba Aliko Dangote, muri EAC hakaba James Mwangi n’abandi, bose nta kindi kibahuje uretse kuba bari ku isoko ry’imari n’imigabane.”

Rwabukumba yavuze ko amasoko muri aka karere arimo gutera imbere ariko isoko ry’imari n’imigabane ryo ritarimo gukura cyane.

Ati “Kubera iki Abashinwa birirwa hano bashaka kubaka imihanda barangiza bakazana n’amafaranga bavanye iwabo? Ni uko se ayo mafaranga adashobora kuboneka hano muri EAC? Yaboneka kuko niba dufite abaturage miliyoni 174 buri muturage atanze amadorali 100 yaba miliyari 17, bisobanuye ko ya mishinga yose dufite ya za gari ya moshi n’indi yahita ikorwa.”

Minisitiri w’Imari n’Igenamigambi, Dr Uzziel Ndagijimana yagaragaje ko isoko ry’imari n’imigabane rifite akamaro kanini mu gukusanya ubwizigame bwaba ubw’abantu ku giti cyabo cyangwa amasosiyete, ibi bikaba byatuma amafaranga agurizwa abafite imishinga y’igihe kirekire atangwa.

Yagize ati “Iri ni isoko rishya ritaramenyerwa bivuze ko hakenewe gukomeza gushyira imbaraga mu gusobanurira abantu uko rikora, ku bigo ni uko kujya muri iri soko bisaba ko iyi sosiyete igomba kuba itanga icyizere ku bantu baje kuguramo imigabane, igomba kuba ifite imicungire abantu bizewe kuko umuntu aguramo imigabane ariko ntaza mu kuyicunga, uwo muntu rero agomba kumenya uko iyo sosiyete icunzwe.”

RSE yasobanuye ko kugeza ubu mu Rwanda abantu ibihumbi 19 aribo bamaze kwitabira isoko ry’imari n’imigabane.

Umuyobozi w'Inama y'ubutegetsi ya RSE Dr James Ndahiro na Minisitiri w'Imari n'Igenamigambi, Dr Uzziel Ndagijimana
Umuyobozi wa BK Group PLC, Dr Diane Karusisi n'Umuyobozi Mukuru w'Ikigo cy'Imari n'Imigabane mu Rwanda (RSE), Pierre Célestin Rwabukumba n'abandi bayobozi batanga ikiganiro
Umuyobozi wa Banki ya Kigali Group Plc, Dr Diane Karusisi atanga ikiganiro
Minisitiri w'Imari n'Igenamigambi, Dr Uzziel Ndagijimana yagaragaje ko isoko ry’imari n’imigabane rifite akamaro kanini mu gukusanya ubwizigame bwaba ubw’abantu ku giti cyabo cyangwa amasosiyete
Umuyobozi Mukuru wa I&M Bank Rwanda, Robin Bairstow nawe yitabiriye iyi nama
Umuyobozi Mukuru wa RSSB, Richard Tusabe ni umwe mu bitabiriye iyi nama ndetse watanze ikiganiro
Umuyobozi Mukuru w'Ikigo cy'Imari n'Imigabane mu Rwanda (RSE), Pierre Célestin Rwabukumba akaba n’umuyobozi w’ishyirahamwe ry'ibi bigo muri EAC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza