Volkswagen yagejeje ku isoko ry’u Rwanda imodoka za mbere zikoresha amashanyarazi

Yanditswe na Cyprien Niyomwungeri
Kuya 29 Ukwakira 2019 saa 07:34
Yasuwe :
0 0

Imodoka z’uruganda rwa Volkswagen zikoresha amashanyarazi ziratangira gukoreshwa mu Rwanda kuri uyu wa Kabiri, zikaba ari zo za mbere uru ruganda rugejeje ku isoko rya Afurika muri rusange.

Izi modoka ziswe e-Golf, ziratangira gukoreshwa mu Rwanda ku bufatanye bwa Volkswagen n’ikigo cyo mu Budage, Siemens, aho cyo kizajya gitanga uburyo bwo kongera umuriro w’amashanyarazi mu modoka.

Gutangiza ikoreshwa ry’izi modoka mu Rwanda biratangirana n’izigera kuri enye, zizajya zongererwamo amashanyarazi aho Volkswagen ikorera mu cyanya cyahariwe inganda i Masoro, ariko bikaba biteganyijwe ko hazubakwa ahandi hantu 15 hirya no hino mu gihugu ho kongereramo amashanyarazi.

Umuyobozi wa Volkswagen mu Rwanda, Rugwizangoga Michaella avuga ko mu mezi ari imbere izi modoka ziziyongera zikagera kuri 50, ariko atari izo kugurishwa ahubwo zizakoreshwa mu mushinga wa Move, aho umuntu akoresha porogaramu ya telefoni mu gusaba gutizwa imodoka ya Volkswagen, mu gihe runaka.

Ati “Abantu mu Rwanda baradutunguye ukuntu bitabiriye uburyo bwo gusaba imodoka igutwara mu gihe runaka. Izi modoka ni mu rwego rwo gukomeza kuzana ibishya mu gutwara abantu bakodesheje imodoka kandi dufite icyizere”.

Avuga ko Volkswagen ifite abashoferi bayo bazajya batwara izi modoka ariko uwasabye nyinshi yabishaka agatanga abashoferi be bakabahugura. Kugeza ubu Volkswagen ifite abashoferi 250 mu Rwanda biganjemo ab’igitsina gore.

Uburyo bwo gukoresha porogaramu ya telefoni mu gusaba imodoka za Volkswagen bumaze kwitabirwa cyane kuko abamaze gutunga iyi porogaramu ari 60 000 naho abayikoresha ni 30 000. Ingendo zikorwa muri ubu buryo n’imodoka za Volkswagen ni 13000 ku kwezi.

Rugwizangoga asobanura ko e-Golf zitatangira kugurishwa mu gihugu kuko bisaba ko habanza hakanozwa uburyo bwo kuzikanikira mu gihugu zagize ikibazo, kubona abatekinisiye bahagije n’ibindi. Icyakora ngo bishobora gutangira vuba.

Imodoka zikoresha amashanyarazi za e-Golf zizajya zongerwamo umuriro nijoro kuko zishobora kugenda ibirometero 230 utarashiramo kandi kuri sitasiyo yazo ukongerwamo iminota hagati ya 45 n’isaha imwe. Ni mu gihe uyishyizemo umuriro akoresheje uburyo bwo mu rugo rwe bimara amasaha 10.

Izi modoka za e-Golf ntabwo zateranyirijwe mu Rwanda ahubwo zakorewe mu Budage zizanwa mu gihugu. Iyo yuzuye umuriro ishobora kugenda ibilometero 230 ariko biterwa n’ubutumburuke bw’aho igenda n’ibindi.

Rugwizangoga avuga ko mu gihe imodoka zigezweho ari izikoresha amashanyarazi, Volkswagen Group nayo irimo gushyira imbaraga muri uru rugendo.

Ati "Nk’uko mubizi hagezweho gukoresha amashanyarazi. Kuva mu 2025, VW Group izakora imodoka zikoresha amashanyarazi gusa, kandi mbere y’uko umwaka wa 2019 urangira, tuzaba dufite imodoka zikoresha amashanyarazi mu Rwanda, dutangire kwitegura umwaka wa 2025 n’ibihe biri imbere."

Volkswagen Group iteganya gushora miliyari €30 mu gukora imodoka zikoresha mashanyarazi, aho iteganya kongera ubwoko bw’imodoka zikoresha amashanyarazi gusa, zikava ku bwoko butandatu bukagera kuri 50 bitarenze umwaka wa 2025.

Iyi modoka ifite imyanya itanu ubariyemo n'uw'uyitwaye
Uko sitasiyo y'amashanyarazi y'iyi modoka imeze
Siemens izashyiraho sitasiyo zo kongereramo amashanyarazi
Minisitiri w'Intebe agiye kuganura iyi modoka
Mu cyumweru gishize nibwo Volkswagen yatangije ikoreshwa ry'izi modoka zikoreshwa n'amashanyarazi
Kuri sitasiyo iyi modoka izajya yongerwamo amashanyarazi iminota 45

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza