00:00:00 IGIHE NETWORK KN KINYARWANDA EN ENGLISH FR FRANCAIS

Umusaruro w’ibikorerwa mu nganda wiyongereyeho 2,3% mu Ukuboza 2020

Yanditswe na Ishimwe Israel
Kuya 5 Gashyantare 2021 saa 03:21
Yasuwe :
0 0

Ikigo cy’Igihugu cy’Ibarurishamibare (NISR) cyatangaje ko umusaruro w’ibitunganyirizwa mu nganda wiyongereyeho 2,3% mu Ukuboza 2020 ugereranyije n’igihe nk’icyo mu mwaka wawubanjirije.

Raporo ya NISR (Index of Industrial Production,IIP) yo mu Ukuboza 2020 yerekana ko urwego rw’ubucukuzi bw’amabuye y’agaciro na kariyeri rwagabanutseho 72,9%, urw’ibitunganyirizwa mu nganda ruzamukaho 12,0%, urw’ibikomoka ku mashanyarazi rwazamutseho 8.2% ndetse urw’amazi n’isukura rwiyongereyeho 17,8%.

Kwiyongera k’umusaruro wo mu nganda gushingiye ku kuzamuka kw’ibicuruzwa bitari ibyuma bizikorerwamo ku kigero cya 74,1% n’ibikoresho bikozwe mu byuma n’imashini byiyongereyeho 51,6%.

IIP ni raporo ya buri kwezi igaragaza ingano y’ibicuruzwa byakorewe mu nganda zitandukanye zibarizwa imbere mu gihugu, bikagezwa ku isoko.

NISR itangaza ko umusaruro w’ibitunganyirizwa mu nganda wagabanutseho 5,7% mu mwaka wa 2020, ugereranyije n’umwaka wose washize.

Urwego rw’Inganda kimwe n’izindi zitandukanye ruri mu zahungabanyijwe cyane n’ingamba zashyiriweho kwirinda ikwirakwira rya Coronavirus. Ahanini bishingiye ku bikorwa byahagaritswe, ntibikomeze gukora nk’ibisanzwe muri icyo gihe.

Muri Gahunda ya Guverinoma y’Imyaka irindwi (NST1), Leta y’u Rwanda yihaye intego ko urwego rw’inganda ruzagira uruhare rungana na 34% ku musaruro mbumbe w’igihugu mu mwaka wa 2024.

Urwego rw’inganda mu Rwanda rusanzwe ruzamuka ku muvuduko ushimishije, kuko nko mu 2019 rwagize uruhare rungana na 18% ku musaruro mbumbe w’igihugu, rukurikira urw’ubuhinzi rwagize 24% n’urwa serivisi rwari ruyoboye na 49%.

Kuva mu 2015, uru rwego rwagize ingufu nyinshi cyane mu bukungu bw’igihugu kuko ari bwo gahunda ya Made in Rwanda, yatangiraga gushyirwa mu bikorwa mu buryo buhamye. Icyo gihe umusaruro w’inganda wazamutse ku kigero cya 7%.

Muri buri turere kandi hashyizweho ibyanya byihariye by’inganda ndetse no mu Mujyi wa Kigali, cyashyizwe i Masoro mu Karere ka Gasabo.

Mu 2016 inganda zazamutse ku kigero cya 7%, gahunda ya Made in Rwanda igira uruhare rukomeye cyane kuko izikora imyenda, inkweto n’ibindi bituruka ku ruhu byiyongereye ku rugero rwa 10%, izikora ibyo kurya ziyongera ku rugero rwa 8%, naho inganda zikora ibikoresho by’ubwubatsi harimo isima ziyongeraho 21%.

Mu 2017 inganda zazamutse ku kigero cya 4%, mu 2018 zizamuka ku 10% naho mu 2019 umusaruro uzamuka kuri 16%. Mu 2019, izamuka ry’umusaruro w’inganda ryatewe ahanini n’ibikorwa by’ubwubatsi, inganda zitunganya ibintu bitandukanye n’ubucukuzi bw’amabuye y’agaciro.

Imibare yo mu 2020 yerekana ko mu Rwanda habarirwa inganda nto n’iziciriritse zirenga 800 zirimo izitari zisanzwe mu gihugu nk’izikora telefoni, iziteranya imodoka, izikora ibiribwa n’izindi.

Umusaruro w’ibitunganyirizwa mu nganda wiyongereyeho 2,3% mu Ukuboza 2020. Iyi foto igaragaza icyanya cyahariwe inganda cya Masoro kimaze kugeramo nyinshi cyane zohereza ibicuruzwa no mu mahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .