Uko kwizigama 300 Frw byahinduriye imibereho Mukankundiye, agaca ukubiri n’ubucuruzi bw’akajagari

Yanditswe na Evariste Nsengimana
Kuya 8 Ukuboza 2019 saa 07:34
Yasuwe :
0 0

Mukankundiye Clementine avuga ko imibereho ye n’umuryango we imaze guhinduka nyuma yo gufata icyemezo cyo gutangira kwizigama mu kimina gitanga 300 Frw buri munsi, ubu akaba ashobora kuguzamo arenga ibihumbi 200 Frw.

Uyu mubyeyi w’abana babiri b’abakobwa atuye mu Murenge wa Kinyinya mu Karere ka Gasabo, avuga ko yamaze igihe akora ubucuruzi bw’amagi n’ubunyobwa mu kajagari ntacyo bumugezaho kubera ko atari yakamenye akamaro ko kwizigama.

Ubu bucuruzi butemewe yakoraga uretse kuba butaramufashaga kubona ikimutunga ngo anizigame, bwamuhozaga ku nkeke acengana n’inzego z’umutekano.

Mu 2018 nibwo yafashe icyemezo cyo kubureka, yinjira mu isoko rihuriwemo n’abahoze bakora ubucuruzi bw’akajagari basaga 150, bashinga ikimina cyitwa Icyerekezo Binunga, biyemeza kujya batanga 300 Frw ku munsi, bakayagabana nyuma y’iminsi 60.

Muri Gashyantare uyu mwaka nibwo Mukankundiye yatangiye yizigamamo 300 Frw kuko ariyo yari afitiye ubushobozi, nyuma y’amezi abiri agafata asaga ibihumbi 18 Frw.

Mukankundiye yabwiye IGIHE ko agicuruza mu kajagari iyo yobonaga menshi atarengaga 2000 Frw ku munsi nayo akayabona yiyushye akuya kandi anahangayitse, ntanamufashe kubona ibyo akeneye byose mu rugo.

Uko kurasa ku ntego akagana ikimina byamufashije kubona amafaranga aranguza inyanya, intoryi, karoti n’ibindi acururiza mu isoko akabona amafaranga yo gutunga umuryango we.

Mukankundiye yagiye yongera amafaranga atanga mu kimina, bimufasha kugera ku gufata imyanya 10, uyu munsi yizigama 3000 Frw ku munsi.

Ati “Ninjiye mu kimina ntangira ntanga 300 Frw ariko uyu munsi ngeze ku bushobozi bwo gutanga 3000Frw bihoraho. Ayo yose nagiye nyakura mu kimina.”

Mukankundiye yavuze ko guhera muri Nzeri uyu mwaka, bagera igihe cyo kurasa ku ntego (kugabana) buri mezi abiri amaze kugiramo ibihumbi 180 Frw, wabariramo n’inyungu bamuha akarenga ibihumbi 200 Frw.

Ati “Nkaba nashishikariza abantu bose kujya mu kimina kuko hari byinshi kimaze kutugezaho. Nkanjye mbasha gukuramo amafaranga, nkaguzamo nk’ibihumbi 100 Frw ngakomeza gukora ubucuruzi bwanjye.”

Mukankundiye yavuze ko ikibanza acuruzaho buri munsi kiba kiriho ibicuruzwa nibura by’ibihumbi 50 Frw kandi akagira n’andi ibihumbi 50 Frw ku ruhande ashobora kuranguza.

Uyu mudamu afite intego yo kongera imigabane muri iki kimina kugira ngo bizamufashe kuzaguzamo amafaranga yo kubaka inzu muri Kigali no kurihira amashuri abana be.

Ati “Intego mfite ni iyo kuzakuramo amafaranga yo kwigisha abana banjye, nkubaka inzu muri Kigali nkiteza imbere.”

Umuyobozi w’ikibina Icyerekezo Binunga, Uwizeyimana Laurent yavuze ko kimaze kugira abanyamuryango barenga 900, aho cyafunguye amashami atatu, rimwe rigera igihe cyo kurasa ku ntego bageze kuri miliyoni 26 Frw.

Ubwo Minisiteri y’Imari n’Igenamigambi yatangiza icyumweru cyahariwe ubukangurambaga bwo kwizigama mu Kwezi gushize, cyari gifite insanganyamatsiko igira iti ‘Zigamira ejo heza’ yibukije abanyarwanda akamaro ko kwizigama n’uburyo barushaho gucunga neza amafaranga bafite, akabasha kubakemurira ibibazo bagira mu buzima.

Ubushakashatsi bwakozwe ku buryo abanyarwanda bagezwaho serivisi z’imari (2016 FinScope) bwerekanya ko 86% by’abanyarwanda bakuze (basaga miliyoni 5.1).

Iyi nyigo igaragaza ko ibigo by’imari byagabanutse bikagera kuri 13% mu 2016 bivuye kuri 14% mu 2012. Icyo gihe abizigamira mu Umurenge Sacco bari 27% mu gihe abifashishaga telefone bari 17%.

Mukankundiye yagiye yongera amafaranga atanga mu kimina, bimufasha kugera ku gufata imyanya 10, uyu munsi yizigama 3000 Frw ku munsi
Mukankundiye yatandukanye no gucururiza mu Kajagari kubera gukorana n'ibimina
Iki kimina kigizwe n'abanyamuryango basaga 900 mu mashami yacyo atatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza