Uko BDF yafashije Mukayuhi mu mushinga wo kumisha imboga n’imbuto

Yanditswe na Hakizimana Jean Paul
Kuya 20 Nzeri 2019 saa 11:05
Yasuwe :
0 0

Mukayuhi Christine ni umugore w’imyaka 33 ufite abana babiri, atuye mu Karere ka Ngoma akaba ari naho akorera ubucuruzi bwe bwo kumisha imboga n’imbuto aho afite sosiyete yitwa Christine Horticulture Processing.

Yatangiye ubu bucuruzi ku gishoro cya miliyoni ebyiri aterwa inkunga n’Ikigega gitanga ingwate ku mishinga mito n’iciriritse,BDF none ubu ubucuruzi bwe buhagaze muri miliyoni 28 Frw.

Bimwe mu byo yumisha birimo isombe, beterave, inyanya, inanasi, urusenda, imboga z’imbwija n’ibindi. Izi mboga zose n’imbuto bakaba bazumisha ndetse no kuzikoramo ifu hagamijwe kuzibika igihe kirekire.

Igitekerezo cyo gutangira uyu mushinga ngo yakigize mu mwaka wa 2016 bitewe nuko mu Karere ka Ngoma habonekaga umusaruro mwinshi w’imboga n’imbuto ariko ukangirikira ku isoko bitewe no kubura abaguzi nyamara ngo watemberera mu giturage ugasanga bwaki iravuza ubuhuha.

Mukayuhi ngo yahise yiyemeza gushaka uburyo yatangira kumisha uwo musaruro akawukoramo amafu yajya yifashishwa mu kurwanya imirire mibi ndetse n’igihe za mbuto ziteze abazishaka bakajya bazibona.

Mu 2018 nibwo yagiye kwandikisha ubucuruzi bwe mu Kigo cy’Igihugu cy’Iterambere (RDB) atangirana igishoro cya miliyoni ebyiri z’amafaranga y’u Rwanda.

Ati “ Icyo gihe dutangira twakoraga nk’ibiro mirongo itanu mu cyumweru, tuza kuzamuka tugera ku biro 100, dukomeza kuzamuka gake gake tugera kuri toni imwe mu kwezi, ariko byaba ari mu gihe cy’imvura bikanga kuma kubera nta zuba ryabaga rihari.”

Uko yagannye BDF ikamubera umubyeyi

Muri uwo mwaka wa 2018, Mukayuhi yitabiriye inama y’abacuruzi yabereye mu Karere ka Rwamagana, maze haza kuzamo umukozi wa BDF abasobanurira ukuntu bafite amafaranga menshi yo guteza imbere imishinga y’abagore n’urubyiruko, icyo ngo basabwa ni ukugaragaza ibyo bakora gusa.

Ati “ Nahise ngana BDF ikorera mu Karere kacu, baraza baradusura dutangira inzira yo kubaka ubufasha, bahise badutera inkunga ya miliyoni icumi yiganjemo ibikoresho byiza kandi bijyanye n’igihe, nyuma yo kubona iyo nkunga umusaruro twatunganyaga wariyongereye cyane uva kuri toni imwe ubu dukora toni eshatu mu kwezi.”

Ku bijyanye n’amasoko, Mukayuhi avuga ko nta kibazo ajya agira kuko afite abantu benshi bakenera imbuto ngo bazikoreshe mu gukora imitobe n’ibindi.

Ati “ Ubu dufite amasezerano n’abantu batanu dukorana nabo batugurira. Tugenda dukora bitewe na gahunda baduhaye kandi biri kugenda neza cyane, akenshi mu mpeshyi imbuto ziba zarabuze ariko twe tuba tuzifite kuko tuba twarazumishije.”

Mukayuhi avuga ko akorana n’abahinzi bo hirya no hino mu kumuha izo mbuto n’imboga.

Ati “ Kugeza ubu nkorana n’amakoperative ane niyo dufitanye amasezerano ariko hari andi matsinda 40 nayo ajya angemurira imbuto n’imboga.”

Mukayuhi yagiriye inama abagitinya kwegera BDF
Yagiriye inama abagitinya BDF cyangwa bakumva ko imishinga yabo ikiri kito ku buryo itaterwa inkunga.
Yagize ati “Hari igihe usanga abantu batinya kugana BDF nyamara ni ibintu byoroshye, abenshi burya usanga banatinya kuyegera kubera nta makuru nyayo baba bafite ariko icya mbere ni ukubegera ukababwira igitekerezo cyawe. Hariyo abantu biteguye kugufasha mu bintu byose bishoboka kugeza no gutegura umushinga wawe.”

Afite intego zo kurandura imirire mibi muri Ngoma

Imibare itangazwa n’ibitaro bikuru bya Kibungo yo muri Kanama uyu mwaka igaragaza ko muri aka Karere abana 152 aribo bagaragarwaho n’ikibazo cy’imirire mibi.

Mukayuhi avuga ko imwe mu ntego yihaye ari ukurandura iki kibazo.

Ati “ Hano iwacu ndifuza ko tubanza tukihaza mu biribwa by’imboga n’imbuto, ndifuza kubanza gufasha ubuyobozi gukemura ikibazo cy’imirire mibi. Ndifuza gufasha imiryango ifite icyo kibazo nkayiha amahugurwa ajyanye no guhunika imboga, ikindi ndifuza kugura imashini nkazishyira ku bikoni by’imidugudu kugira ngo zibafashe.”

BDF itanga serivise zitandukanye zirimo ingwate, inkunga, gufasha udukiriro, gushora imari mu mishinga runaka, gutera inkunga imishinga y’urubyiruko ruri mu buhinzi, kongerera Sacco ubushobozi ndetse igatanga ubujyanama n’amahugurwa.

Iki kigega cyatangaje ko mu 2019 kizatera inkunga imishinga iciriritse isaga ibihumbi 4000 izibanda cyane ku rubyiruko.

Ikorana n’ibigo by’imari bisaga 400 hirya no hino mu gihugu ari naho inyuza ingwate cyangwa iha abafite imishinga myiza.

Kuva mu 2011, BDF imaze gukora ishoramari rya miliyari zisaga 77 Frw yiganjemo ayatanzwe ku ngwate angana na miliyari 59. Imaze gufasha imishinga 26564 irimo iy’abagore 6600(24%) n’iy’urubyiruko 8649 (32%). BDF ivuga ko umwaka ushize amafaranga yinjiza yazamutseho 13%

Ubucuruzi bwa Mukayuhi bumaze gutera imbere kubera gukorana na BDF
Mukayuhi afite imashini zigezweho zumisha imboga n'imbuto
Zimwe mu mbuto n'imboga byumishwa na Mukayuhi
Mukayuhi akoresha abakozi barindwi barimo bane ahemba buri kwezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza