00:00:00 IGIHE NETWORK KN KINYARWANDA EN ENGLISH FR FRANCAIS

Ubukungu bw’u Rwanda buzazamuka ku kigero cya 10,2%; bishoboka gute muri ibi bihe bya Covid-19?

Yanditswe na Ndahayo Emmanuel
Kuya 29 Ugushyingo 2021 saa 07:14
Yasuwe :

Ikigega Mpuzahamanga cy’Imari, IMF, giherutse gutangaza ko ubukungu bw’u Rwanda muri uyu mwaka wa 2021, buzazamuka ku kigero cya 10,2%, aho kuba 5,1% yari yateganyijwe mu ntangiriro z’uyu mwaka.

Ibi bisobanuye ko igipimo ubukungu bw’u Rwanda bwari bwaragenewe kuzamukaho, kizikuba kabiri. Ntabwo ari ibintu bisanzwe kuko iyi mibare ubwayo iri hejuru ugereranyije n’ibipimo byari byaratanzwe mbere.

Ikindi kidasanzwe ni ukubona ubukungu buzamuka ku kigero kirenze 10%, by’umwihariko bikaba mu bihe icyorezo cya Covid-19 kikiri guca ibintu hirya no hino ku rwego rw’Isi.

Birumvikana ko kugira ngo habeho impinduka zingana gutya, bigomba kuba byaratewe n’izindi mpinduka zidasanzwe zabaye mu bukungu, bityo igipimo cy’izamuka ryabwo kikiyongera cyane.

Amahitamo y’amaburakindi

Kuva igihe Covid-19 yageraga mu Rwanda, hari impinduka yazanye nazo, kandi zagombaga kugira ingaruka zikomeye ku bukungu.

Icya mbere cyabaye ni uko isoko y’aho Leta ikura amafaranga yagabanutse, kuko igabanuka ry’ibikorwa by’ubucuruzi risobanuye ko ingano y’imisoro nayo ishobora gukomwa mu nkokora.

Ku rundi ruhande, ibyo Leta isohora bishobora kwiyongera kuko hazamo ibitari bisanzwe bijyanye no kwirinda iki cyorezo. Mu gihe Leta ikenera amafaranga menshi mu gukemura ibibazo by’umurengera byatewe n’icyorezo, amadevezi aragabanuka kuko nk’ishoramari riturutse hanze y’u Rwanda riragabanuka, mu gihe amafaranga yari buturuke mu nzego nk’ubukerarugendo, ubucuruzi bw’ibirimo amabuye y’agaciro n’ibindi bikorwa byinjiriza igihugu amadevize bigabanuka.

Ibi bituma Leta isigarana amahitamo make cyane mu gukomeza kuzuza inshingano zayo, ayo mahitamo akaba gufata inguzanyo. Imibare igaragaza umwenda u Rwanda rufitiye amahanga uzagera kuri 75% by’umusaruro mbumbe w’igihugu nibura muri uyu mwaka.

Igabanuka ry’ibyo Leta yinjiza, kongeraho ubwiyongere bw’inguzanyo z’amahanga, birema icyuho mu ngengo y’imari, bikumvikana ko byagombaga kuba no ku Rwanda, aho byitezwe ko iki cyuho kizazamuka kikagera kuri 9,1% muri uyu mwaka w’ingengo y’imari, kivuye kuri 8,6% mu mwaka ushize.

Mu kiganiro na IGIHE, Umugishwanama mu bijyanye n’ubukungu n’imari, Habyarimana Straton, yavuze ko nta yandi mahitamo u Rwanda rwari rufite uretse gufata inguzanyo zizatuma Leta ibasha kongera kubaka ubukungu bwayo.

Yagize ati “Iyo Leta yemeye kujya muri icyo gihombo (icyuho mu ngengo y’imari) kugira ngo ishake amafaranga ariko ubukungu bwaguke, icyo iba igamije ni uko urwego rw’abikorera n’izindi ngeri z’ubukungu, zo zaguka, ni nko kubaha amahirwe yo kwaguka.”

Ibi ni ingenzi cyane ku bukungu bw’u Rwanda kuko bugishingiye ku ishoramari rya Leta cyane kurusha iry’ibigo byigenga, bityo Leta ikaba igomba gukomeza gukora ishoramari nubwo ibyo yinjiza byagabanutse, kugira ngo irengere izindi nzego zose, zirimo cyane cyane urwego rw’abikorera, zishingira ubukungu bwazo ku ishomari rya Leta.

Iyi mpuguke yavuze ko ibi byose biba bigamije gukumira ubushomeri bw’umurengera n’ubundi buhita bugira ingaruka zikomeye cyane ku bukungu kuko ubushobozi bw’abaturage bwo gukomeza guhaha bugabanuka, ndetse bikaba byanaganisha ku bwiyongere bw’ibirimo umutekano mu mucye.

Yagize ati “Ibi Leta ibikora igira ngo akazi ntigasubire inyuma, hatiyongera ubushomeri kubera ko ubushomeri iyo bwaje mu baturage bugira ingaruka nyinshi cyane. Amafaranga bakoresha bahaha ava mu byo bakoze, kandi abantu bose ntibakwikorera, abatabasha kwikorera rero baba bakeneye kubona akazi. Mu gihe Leta yageze kuri iyo ntego, ntabwo byagakwiye gutera impungenge.”

Yasobanuye ko icyatera impungenge ari uko inguzanyo Leta ifata kugira ngo izibe icyuho gishobora kuvuka mu bukungu, yakoreshwa ibintu bitabyara inyungu “nko kwigurira imodoka nshya, kongera imishahara n’ibindi nk’ibyo bitabyara inyungu mu gihe gito cyangwa kirekire.”

Yongeyeho ati “Icyo dukwiye gushyiramo imbaraga, ni ukwibaza icyo ayo mafaranga akoreshwa, tukareba niba ari gushorwa mu nzego z’ubukungu zifite akamaro gakomeye kurusha izindi.”

Yasobanuye ko urebye neza inguzanyo Leta yafashe kuva Covid-19 yagera mu Rwanda, yakoreshejwe mu bikorwa birimo gushyiraho Ikigega Nzahurabukungu, kwagura ibikorwaremezo n’ibindi bikorwa bifite akamaro mu iterambere ry’abaturage, ati “Ibikorwa nk’ibyo bifasha ubucuruzi bwadindiye kongera kuzahuka, ndetse binatume abaturage barushaho kwiremera ibikorwa by’ubucuruzi biteze imbere.”

Uretse ibikorwa by’ishoramari rya Leta, hanashyizwe imbaraga mu bikorwa by’ikingira cyane cyane mu Mujyi wa Kigali, utanga 50% by’umusaruro mbumbe w’igihugu. Abagera kuri 90% barakingiwe muri Kigali, mu gihe ibi bikorwa bigeze hejuru ya 21% mu gihugu hose, ikigero kiri mu bya mbere muri Afurika.

Muri rusange, izamuka ry’umusaruro mbumbe w’igihugu rishingiye ku izamuka ry’ishoramari rya Leta. Icyakora Habyarimana yavuze ko ari ngombwa kwibuka ko iyo bavuze ko ubukungu buzazamuka ku kigero runaka, baba babugereranyije n’umwaka ushize, kandi umwaka ushize bukaba bwari bwagabanutse cyane, ku buryo izamuka ry’uyu mwaka, nubwo ryaba ringana n’iryari risanzwe mbere y’icyorezo, rihita riba rinini cyane.

Byagenda bite mu gihe Omicron yakomeza guca ibintu?

Inkuru igezweho ku Isi hose ni iyaduka ry’ubwoko bushya bwa Covid-19, buzwi nka Omicron. Amakuru y’imiterere yabwo ntaramenyekana neza kuko bugikorwaho ubushakashatsi, gusa amakuru y’ibanze ahamya ko ubu bwoko bwihinduranya vuba, ibitanga ubutumwa bw’uko bushobora kuba bufite ubukana buhambaye, ndetse bushobora no guhangara inkingo zimaze gukorwa.

Ibi byatumye ibihugu byinshi bitangira gushyiraho ingamba zitandukanye zigamije kwirinda ikwirakwira ry’iki cyorezo, birimo gukumira ingendo z’indege, nabyo bitanga ubutumwa bw’uko ibi bishobora kongera kudindiza ubukungu bw’Isi bwari butangiye kuzahuka.

IMF isobanura ko mu gihe habaho irindi hungabanya ry’ubukungu, byagira ingaruka zikomeye ku bushobozi bw’u Rwanda bwo gukomeza guhungana n’ihungabana ry’ubukungu.

Ibi byagira ingaruka zikomeye kuko byatuma inguzanyo ziyongera, icyuho mu ngengo y’imari ikiyongera bityo iterambere ry’igihe kirekire rigahungabana.

Habyarimana yavuze ko mu gihe hakenerwa izindi ngamba zo kurwanya Covid-19, byagira ingaruka zikomeye, ati “Byaba bifite ingaruka zikomeye ku bukungu kuko urebye imbaraga zashowemo yaba ku ruhande rwa Leta ndetse n’iz’abantu, ni ibintu byaba ari ibintu bigoye cyane ku mpande zose.”

Icyakora yavuze ko nta kindi Leta yashoboraga gukora muri ibi bihe, gusa ashimangira ko “Ubu buryo Leta iri gukoresha mu kuzahura ubukungu bushobora kuzongera gusuzumwa mu myaka nk’itatu iri imbere, mu gihe Covid-19 izaba yaragabanutse.”

Ibikorwa byo gukingira byitezweho gufasha u Rwanda gusubira mu buzima busanzwe ku buryo ubukungu bwongera kuzabuka
Ibiciro ku masoko bikomeje kuzamuka nka kimwe mu byatewe n'ihungabana ry'ubukungu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .