Ubukungu bw’ibihugu by’ibihangange ku Isi buri mu kangaratete kubera Coronavirus

Yanditswe na Nkurunziza Ferdinand
Kuya 24 Gashyantare 2020 saa 11:08
Yasuwe :
0 0

Kuva mu Ukuboza 2019, Isi ihangayikishijwe n’icyorezo cya Coronavirus, cyagaragaye bwa mbere mu Mujyi wa Wuhan, mu ntara ya Hubei yo mu Bushinwa. Iki cyorezo kimaze kwinjira mu mibiri y’abantu basaga 79 550 ku isi hose, muri bo abasaga 2 610 kikaba kimaze kubahitana.

Mu mpera z’icyumweru dusoje, amasoko y’imari n’imigabane azwiho kuba ikimenyetso cy’uburyo ubukungu bw’ibihugu buhagaze, yafunze hagaragaye gusubira inyuma guhambaye mu bikorwa byayo, abasesenguzi bagahamya ko biri guterwa no kwiyongera kw’icyorezo cya Coronavirus.

Urugero rwa hafi ni igihugu cy’u Buyapani, kiri ku mwanya wa gatatu mu bihugu bikize ku Isi. Iki gihugu cyagaragayemo abarwayi ba Coronavirus bagera ku 146.

Igihembwe cya kane cy’umwaka wa 2019 cyasoje ubukungu bw’iki gihugu busubiye inyuma ku rugero rwa 1.6%, bitewe no kwiyongera kw’imisoro y’ibicuruzwa ndetse n’ingaruka zatewe n’inkubi y’umuyaga wa typhon. Uku gusubira inyuma ku rugero rukomeye kwaherukaga kubaho mu 2014.

U Budage bwa mbere mu bukungu ku mugabane w’u Burayi, ubukungu bwabwo bwatangiye kuzahara mbere yo kwaduka kwa Coronavirus, bitewe no gusubira inyuma kw’inganda z’iki gihugu.

Ikigo cy’ubushakahsatsi mu bukungu cyo mu Budage kigaragaza ko ubukungu bw’iki gihugu bwagabanutse mu buryo butangaje muri uku kwezi kwa Gashyantare 2020 bitewe n’ubwoba ko icyorezo cya Coronavirus gishobora kubangamira ubucuruzi mpuzamahanga.

Umuyobozi ushinzwe ubushakashatsi mu bukungu muri Banki ya Leta Zunze Ubumwe za Amerika, Ethan Harris, yavuze ko n’ibihugu bifite ubukungu bukiri hasi na byo bizagerwaho n’ingaruka zatewe na Coronavirus.

Ibihugu nka Hong Kong na Singapore bisanzwe biri mu myanya y’imbere ku rutonde rw’ibihugu biri kuzamuka cyane mu bukungu nabyo byagaragaje ibimenyetso byo gusubira inyuma mu bukungu kandi nabyo bikazagerwaho n’ingaruka zikomeye nk’uko byagenze ku Bushinwa, u Buyapani, Leta Zunze Ubumwe za Amerika, u Budage n’ibindi bihangange ku Isi.

Imibare inagaragaza ko ubukungu bw’ibihugu bya Indonesia na Malaysia bwasubiye inyuma muri aya mezi asoza umwaka wa 2019 n’atangira 2020, mu gihe nyamara muri Indonesia nta murwayi n’umwe wa Coronairus wahagaragaye, ariko muri Malaysia ho hakaba haragaragaye 22.

N’ubwo imibare y’ubwiyongere bw’ubukungu mu Bushinwa n’u Buhinde izasohoka muri iki cyumweru, abasesenguzi bahamya ko nta kabuza ubukungu bw’ibi bihugu byari byitezweho kuzaba biyoboye ibindi mu bukungu mu 2035, nabwo bwagabanyije umuvuduko ku rwego rukomeye mu 2019.

Mu Bushinwa honyine hamaze kwandura abantu basaga 77 340, mu gihe mu Buhinde ho hagaragaye abarwayi ba Coronavirus batatu gusa kandi nabo barayikize.

Uruzinduko rwa Perezida Trump mu Buhinde

Si mu Bushinwa gusa Perezida wa Leta Zunze Ubumwe za Amerika, Donald Trump, yatangije intambara y’ubukungu. Mu mpera z’umwaka ushize Amerika yahagaritse imikoranire yihariye mu bucuruzi yari ifitanye n’u Buhinde; iki gihugu nacyo cyihimura cyongera amahoro ku bicuruzwa bivanwa muri Amerika.

Nyuma yo kumvikana n’u Bushinwa mu minsi ishize; ubu Perezida Trump yageze mu Buhinde kuri uyu wa Mbere aho ari buhure na Minisitiri w’Intebe w’iki gihugu, mu rugendo rwitezweho kuzahura imikoranire mu bucuruzi yari yarasubiye inyuma.

Ubu abantu batari bake bari kwibaza ubushobozi bw’ubukungu bw’isi mu guhangana n’ingaruka za Coronavirus, gusa bakavuga ko ibibazo byagaragaye mu gihembwe cya kane cya 2019 byaturutse cyane ku ntambara y’ubukungu hagati ya Leta Zunze Ubumwe za Amerika n’u Bushinwa, ariko Coronavirus na yo ikaba izarushaho gukomeza ibibazo.

Ikibazo kigiteye impungenge ubu ni ukumenya igihe icyorezo cya Coronavirus kizamara ndetse n’umubare w’abazacyandura ku isi, nyuma yo kugaragaza ubukana bwacyo.

Coronavirus imaze kuyogoza Isi mu gihe gito

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza