00:00:00 IGIHE NETWORK KN KINYARWANDA EN ENGLISH FR FRANCAIS

Ubukerarugendo bushingiye ku mikino bwihariye 14% by’ibikorwa by’ubukungu buturuka ku nama

Yanditswe na Akayezu Jean de Dieu
Kuya 3 Ukuboza 2022 saa 05:08
Yasuwe :

Guverinoma y’u Rwanda yatangaje ko imbaraga zikomeje gushyirwa mu kubaka ibikorwaremezo by’imikino zatangiye gutanga umusaruro muri gahunda yo guteza imbere ubukerarugendo bushingiye ku mikino kuko mu mwaka ushize imikino yanjirije igihugu asaga gato miliyoni esheshatu z’amadolari.

Ni ibyatangajwe na Minisitiri w’Intebe w’u Rwanda, Dr Ngirente Edoaurd ku wa 2 Ukuboza 2022, ubwo yagezaga ku Nteko Ishinga Amategeko, Imitwe yombi, ikiganiro ku bikorwa bya Guverinoma byo mu rwego rw’ubucuruzi hibandwa ku guteza imbere ibyoherezwa mu mahanga.

U Rwanda rwihaye intego yo kuba igicumbi cy’imikino itandukanye muri Afurika no ku rwego rw’Isi, ibintu bifasha mu kubaka ubukerarugendo bushingiye kuri siporo mu gihugu.

Ibimaze gukorwa bishimangira ko nta kabuza mu gihe cya vuba u Rwanda ruzaba ari igicumbi cy’imikino itandukanye ‘sports hub’ nk’uko biri mu cyerekezo cy’igihugu.

Kuba u Rwanda rufite icyicaro cya FIFA muri Afurika y’Iburasirazuba nabyo bishimangira kuba Sports Hub, kimwe n’amasezerano y’ubufatanye rugirana n’ibigo bitandukanye mpuzamahanga.

Amwe mu marushanwa u Rwanda rwakiriye nyuma y’uko Covid-19 igenjeje make harimo arebana n’imikino ya Basketball, imikino yo gushaka itike y’Igikombe cya Afurika, Afrobasket, mu mikino ya Cricket hakiriwe amarushanwa ane yikurikiranya.

Hari kandi amarushanwa rwakiriye kubera inyubako ya BK Arena iri ku rwego mpuzamahanga, aho rwakiriye imikino yo gushaka itike y’Igikombe cy’Isi cya Basketball, FIBA Qualifiers.

Hari kandi Shampiyona Nyafurika ya Volleyball n’Irushanwa rya Taekwondo ryitabiriwe n’abasaga 500 n’andi.

Byinjirije igihugu

Mu 2019, ubucuruzi bwa serivisi n’amahanga bwarengaga gato miliyari imwe y’amadolari. Mu 2020 bwasubiye inyuma ku kigero cya 49% bugera kuri miliyoni $521.4.

Mu 2021, ubucuruzi bwa serivisi n’amahanga bwarazahutse buzamuka ku kigero cya 11%, bugera kuri miliyoni $579.

Iri zahuka ryatewe ahanini n’ingamba Guverinoma yafashe zirimo guteza imbere ubukerarugendo no kwakira inama n’imikino mpuzamahanga (MICE).

Muri uru rwego, mu 2021, serivisi z’ubukerarugendo zazamutse ku kigero cya 24,4% naho ubwikorezi buzamuka ku kigero cya 36,6%.

Minisitiri w’Intebe Dr Ngirente Edouard yavuze ko ubukerarugendo bushingiye ku mikino bwihariye 14% by’ ibikorwa by’ubukungu bushingiye ku Nama (MICE).

Ati “Ku buryo bw’imibare mu 2021, ubukerarugendo bushingiye ku mikino bwagize uruhare cyane mu kuzahura ubukungu bushingiye ku Nama, imikino ikaba yarinjije asaga gato miliyoni $6.”

Minisitiri w'Intebe yagaragaje ibikomeje gukorwa na guverinoma mu kubaka ibikorwaremezo bigamije kubaka ubukerarugendo bushingiye kuri siporo

Minisitiri w’Intebe yavuze ko aya mafaranga yinjiye agaragaza ko ishoramari ryakozwe mu kubaka ibikorwaremezo ririmo gutanga umusaruro kandi hazakomeza kubakwa ibindi.

Ati “Ibi byerekana umusaruro mwiza w’ishoramari duherutse gukora mu rwego rw’imikino. Kandi nk’igihugu duteganya gushora byinshi atari mu mikino gusa ahubwo n’ibindi bikorwa biteza imbere igihugu.”

Yakomeje agira ati “Twabonye ko hari ubukerarugendo bugezweho ku isoko, ni siporo kandi tuzakomeza gushora imari mu kubaka ibikorwaremezo ku buryo natwe twungukira kuri iri soko.”

Imishinga ihanzwe amaso mu kongera ibikorwaremezo

Muri rusange hari imishinga itandukanye iri gushyirwamo imbaraga kugira ngo ibikorwa bya siporo bitezwe imbere. Minisiteri ya Siporo yamaze gusinyana n’abafatanyabikorwa bagera kuri batatu kandi buri wese afite aho azubaka.

Nka Imbuto Foundation na Basketball Africa League (BAL) bafatanije kubaka Kimironko Community Playground, Uruganda rwa Master Steel rwemeye kubaka indi Community Playground i Gahanga, mu gihe Uruganda rwa Markcables/Africeramics rwo ruzayubaka mu Karere ka Nyanza.

Mu mishinga ihanzwe amaso harimo uwo kuvugurura Stade Amahoro biteganyijwe ko izajya yakira abantu 45.000 kandi isakaye mu muzenguruko wayo ndetse n’imirimo yo kuyivugurura yaratangiye.

Hari uwo kubaka Stade Olympique ya Nyanza uzanaterwa inkunga na Markcables/Africeramics biteganyijwe ko izatwara hafi miliyari 146 Frw.

Inyigo yerekanye ko Stade ya Nyanza izubakwa ku buso bwa hegitari 28 ikazaba itwikiriye yose ndetse ifite ubushobozi bwo kwakira abantu ibihumbi 20 bicaye neza.

Undi mushinga uhanzwe amaso ni uwo kubaka ikigo cy’icyitegerezo cy’umukino w’amagare mu Karere ka Bugesera, uzaterwamo inkunga n’Ikipe yo muri Israel, Premier Tech.

Uyu mushinga uteganyijwe kuzaba ufitemo ishuri ryigisha umukino w’amagare, ibibuga n’ibindi bizatwara asaga miliyoni 320 Frw.

Ishyirahamwe Nyarwanda ry’Umukino wo Koga (RSF) na ryo riri mu biganiro n’Ishyirahamwe Mpuzamahanga ry’uyu mukino, FINA, kugira ngo harebwe uburyo mu Rwanda uyu muryango wafasha kubona inkunga yo kubaka piscine ‘Olympic swimming Pool’.

Inkuru bifitanye isano

BK Arena iberamo imikino itandukanye
Ishusho nshya ya Stade Amahoro izafumgurwa mu 2023

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .