00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rugiye gutangira kohereza ku isoko Coltan itunganyije ku kigero cya 99%

Yanditswe na Iradukunda Serge
Kuya 20 Ukuboza 2022 saa 07:27
Yasuwe :

Mu Rwanda huzuye uruganda rwitezweho kuba ari urwa mbere muri Afurika ruzajya rutunganya amabuye y’agaciro ya Coltan, agakurwamo ifu ya Tantalum na Niobium zifashishwa mu gukora ibintu bitandukanye cyane cyane ibikoresho by’ikoranabuhanga.

Uru ruganda ruherereye mu Karere ka Bugesera mu cyanya cyahariwe inganda rwubatswe n’ikigo cy’ishoramari mu bijyanye n’amabuye y’agaciro kizwi nka ‘Power Resources International Ltd.”

Iki kigo gikomoka mu Bwongereza gisanzwe gifite ibikorwa by’ubucukuzi bw’amabuye y’agaciro gikorera cyane cyane mu Karere ka Ngororero ahazwi nka Muriro na Rukaragata.

Mu 2018 nibwo Power Resources International Ltd yashyize umukono ku masezerano na Leta y’u Rwanda agamije kubaka uruganda ruzajya rutunganya Coltan mu rwego rwo kuyongerera agaciro mbere yo gushyirwa ku isoko mpuzamahanga.

Amakuru ahari kugeza ubu, agaragaza ko uru ruganda rwamaze kuzura ndetse hatangiye imirimo y’igerageza ku buryo mu minsi mike ruzatahwa ku mugaragaro.

Uru ruganda rwuzuye rutwaye arenga miliyoni 20$ ruzaba rufite ubushobozi bwo gutunganya toni 120 za coltan mu kwezi.

Ubwo yatangizaga icyumweru cyahariwe ubucukuzi bw’amabuye y’agaciro, Umuyobozi Mukuru w’Ikigo Gishinzwe Mine, Peteroli na Gaz (RMB), Amb Yamina Karitanyi, yavuze ko ibiri gukorwa byose bigamije kongera ingano y’amafaranga u Rwanda rukura mu bucukuzi.

Yakomeje avuga ko uru ruganda rwa Coltan ruje rusanga izindi zuzuye mu Rwanda zirimo urutunganya zahabu na Gasegereti.

Ati “Ibijyanye no kongerera agaciro amabuye y’agaciro byahawe agaciro nk’uburyo buzadufasha kongera amafaranga ava mu mabuye yoherezwa hanze. U Rwanda rufite uruganda rutunganya zahabu, urutunganya gasegereti ndetse mu minsi ya vuba hazafungurwa n’urutunganya coltan.”

Mu busanzwe inganda ziba muri Afurika zitunganya Coltan kugera ku ifu izwi nka Spiral Concentrate, ubundi ikoherezwa i Burayi na Aziya kugira ngo ikurwemo ifu za nyuma na Tantalum na Niobium.

Tantalum ikoreshwa cyane mu gukora ibizwi nk’ibitandata by’ibyuma by’ikoranabuhanga nka mudasobwa, televiziyo, radiyo na telefone. Niobium yo ikoreshwa mu igihe bakora moteri z’indege n’imashini zo kwa muganga zizwi nka MRI.

Amahirwe ku Karere

Imibare igaragaza ko akarere ka Afurika y’Iburasirazuba kihariye ibirenga 70% by’umusaruro wa Coltan ushyirwa ku masoko mpuzamanga, ibintu Umuyobozi Mukuru Wungirije wa RMB, Dr. Ivan Twagirashema aheraho avuga ko uru ruganda rutanga umusaruro no ku batuye akarere muri rusange.

Ati “Aka karere gatanga ibirenga 70% bya coltan ikenewe ku Isi, ni ukuvuga ngo ubashije kongera umusaruro ku biva hano kugira ngo bitajya ku isoko biri ku giciro gito, ushobora kugira isoko ringana na 70% y’ibikenewe ku Isi yose.”

“Ubashije kubona umusaruro w’ibintu biva muri aka karere ukabyongerera agaciro, haboneka amafaranga menshi kandi ukagira ijambo ku isoko mu bijyanye n’igiciro kuko kitakongera gushyirirwaho i Burayi.”

Dr. Ivan Twagirashema yakomeje avuga ko nta mpungenge zihari zo kubura umusaruro uru ruganda rutunganya kuko mu Rwanda hari Coltan nyinshi kandi rukaba rushobora gutunganya n’iyaguzwe ahandi.

Ati “Umusaruro uhagije urahari kuko mu myaka nk’ibiri cyangwa itatu ishize, u Rwanda rwazaga mu bihugu bitanu bya mbere byohereza umusaruro wa mbere munini wa Coltan ku Isi, ubwo duhereye ku musaruro uhari hano wonyine ngira ngo urabahagije ku ruganda bari bakoze ariko rukoze mu buryo rushobora no kongererwa.”

“Iyo ufite uruganda, nibyo utangirana n’ibihari ariko na none ntabikubuza kugura n’iby’ahandi kuko, Umunyafurika waba ufite coltan nko muri Ethiopia n’ahandi, aho kugira ngo ayijyane muri Aziya amare amezi atatu mu nzira kubera ko bakoreshaga ubwato kuki atayizana hano nyuma y’ibyumweru bitatu aho kugira ngo ayijyane muri Indonesia azishyurwe nyuma y’amezi atatu.”

Raporo yo mu 2020 y’’Ikigo cy’Igihugu cy’Ibarurishamibare yerekana ko mu myaka itanu ishize, ni ukuvuga kuva mu 2015 kugeza mu 2019, u Rwanda rwinjije asaga miliyari 1, 4 y’amadolari ya Amerika avuye mu mabuye y’agaciro yoherejwe mu mahanga.

Nko mu bihembwe bine by’umwaka wa 2015, amabuye y’agaciro yagurishijwe mu mahanga yinjije miliyoni 149$. Icyo gihe hacurujwe gasegereti, coltan, wolfram n’ubundi bwoko bw’amabuye (budasobanurwa ubwo ari bwo muri iyi raporo).

Umwaka wakurikiyeho wa 2016, hinjiye miliyoni zisaga 166, 5$ aho gasegereti yinjije miliyoni 34,8$; coltan yinjiza miliyoni 39,7$; wolfram yinjiza miliyoni 11,9$ naho ubundi bwoko bw’amabuye bwinjiza miliyoni 80$.

Mu 2017 umusaruro wariyongereye ndetse usa n’uwikubye inshuro zirenze ebyiri kuko igihugu cyinjije miliyoni zisaga 373$ yakusanyijwe mu bihembwe bine by’uwo mwaka.

Gasegereti yavuyemo miliyoni zisaga 50,1$; coltan miliyoni 62,1$; wolfram yinjije miliyoni 12,6$ mu gihe ubundi bwoko bw’amabuye bwinjije miliyoni 248, 5$.

Umwaka wa 2018 ho hinjijwe miliyoni 346, 6$, ubundi bwoko bw’amabuye y’agaciro ni bwo bwari ku isonga mu kwinjiriza igihugu angana na miliyoni 204, 4$.

Agaciro k’ibyoherezwa mu mahanga n’u Rwanda bivuye mu bucukuzi bw’amabuye y’agaciro kavuye kuri miliyoni 373$ mu 2017 kagera kuri miliyoni 733$ mu 2020.

Nubwo mu 2021 umusaruro w’amabuye y’agaciro yoherezwa mu mahanga wamanutse ukagera kuri miliyoni 516$ kubera ibiciro biri hasi ku isoko mpuzamahanga, mu mwaka wa 2022 ibyoherejwe mu mahanga Mutarama- Nzeri byageze kuri miliyoni 585$.

Ubucukuzi bw'amabuye y'agaciro buza ku mwanya wa kabiri mu kwinjiriza igihugu amafaranga menshi
Ahenshi muri Afurika batunganya Coltan kugera kuri iyi fu izwi nka Spiral Concentrate
Uru ruganda ruzajya rutunganya Coltan kugeza ivuyemo Niobium

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .