Rubavu: Abagore bahinga imbuto barimo gutyaza ubwenge mu gutegura imishinga

Yanditswe na Mukwaya Olivier
Kuya 4 Ukuboza 2019 saa 02:04
Yasuwe :
0 0

Abagore bahinga imbuto barimo gutyaza ubwenge mu mwiherero w’iminsi itatu uzabafasha kumenya uko bategura imishinga babifashijwemo n’umushinga w’ubuhinzi bw’imboga n’imbuto Hortinvest ku bufatanye na AgriProFocus na ICCO Cooperation.

Uyu mwiherero uhurije hamwe abagore 30 bahinga bakanacuruza imbuto baturuka mu turere turimo Muhanga,Ngororero,Karongi,Rutsiro,Nyabihu na Rubavu.

Barengayabo Thérèse wo mu karere ka Rutsiro uhinga imbuto za Maracuja, yavuze ko yabikoze ashaka kwiteza imbere ariko nyuma aza gusanga ashore amafaranga menshi.

Ati “Nsanzwe mpinga imbuto za Maracuja ariko nabikoraga ku buryo bucirirtse bwo hasi cyane natangiye nshaka kwiteza imbere ariko ubu nasanze nakoreshaga amafaranga menshi ariko nkinjiza make nkanakora mu buryo butarimo ubuhanga ndizera kuzava hano nongera amafaranga ninjiza’’.

Umulisa Bienvenue uhinga imiteja, amashu, karoti n’ibitunguru mu murenge wa Busasamana mu karere ka Rubavu, yavuze ko uburyo yahingagamo atamenyaga niba yunguka cyangwa ahomba.

Ati’ “Umurenge wacu urera cyane ariko nsanzwe nkora mu buryo busanzwe. Ndashima abarimo kuduhugura kuko ndimo kubona hari icyo ndimo kwiyungura kuko ubusanzwe napfaga guhinga gusa ariko ibyo kuvuga ngo nashoye aya navanyemo aya ntabyo nakoraga.Ubu turimo kwiga gutegura umushinga neza tukamenya ayo twashoye, ayo twinjije n’inyungu.”

Umukozi w’umushinga wa Hortinvest mu Ntara y’Iburengerazuba, Uzamukunda Assoumpta yavuze ko bahuje abagore bari mu buhinzi kuko usanga badakunze gukora kinyamwuga.

Ati “Twahuje abagore bakorera mu turere Hortinvest ikoreramo kuko kimwe mu bibazo twabonye nuko abagore bari mu buhinzi badakora kinyamwuga n’abagerageza kubikora ugasanga akenshi baticara ngo bige umushinga neza bigatuma bakora ariko ntibunguke. Ni yo mpamvu twabahurije hamwe kugira ngo tubahe ubumenyi kuko ubushobozi bwo barabufite’’.

Umuyobozi w’akarere ka Rubavu wungirije ushinzwe imibereho myiza y’abaturage, Ishimwe Pacifique yavuze ko bategereje umusaruro ufatika kuri babo bagore kuko nibashyira mu bikorwa ibyo bize bizagirira akamaro imiryango yabo n’abaturanyi.

Ati’ “Dutegereje umusaruro ukomeye muri aya mahugurwa kuko niba aba bagore barimo guhugurwa bagashyira mu ngiro ibyo bize, bagakora imishinga ntabwo tuzavuga ubukene kuko bazafasha abaturanyi babo n’imiryango yabo muri rusange izamuke’’.

Akomeza avuga ko nyuma y’aya mahugurwa bazakomeza kubakurikirana bakabahuza n’amasoko.

Ati “Bazava hano buri wese afite umushinga we. Tuzagenda tubakurikirana ku buryo bagenda bayishyira mu bikorwa turebe aho barimo kugira intege nke dukoranye cyane n’ubuyobozi kandi tuzabahuza n’amasoko. Twahisemo gukorana n’abagore kuko akenshi usanga hari intege nke bitewe n’inshingano baba bafite mu ngo zabo’’.

Umushinga w’ubuhinzi bw’imboga n’imbuto, Hortinvest witezweho gufasha abahinzi barenga ibihumbi 40 bibumbiye muri Koperative 30 zo mu turere dutandatu no kurandura imirere mibi mu Banyarwanda.

Ikigo gishinzwe kohereza mu mahanga ibikomoka ku buhinzi n’ubworozi (NAEB) igaragaza ko nubwo umusaruro w’imboga n’imbuto ugenda wiyongera, utaragera ku wifuzwa kuko umwaka ushize u Rwanda rwinjije miliyoni 24Frw mu zo rwohereje mu mahanga mu gihe rwari rwiyemeje kwinjiza miliyoni 26 Frw.

Aba bagore barimo guhugurwa kwiteza imbere bahanga imishinga ibyara inyungu
Umukozi wa AgriProFocus ubwo yabahaga amahugurwa ku kongera umusaruro
Aya mahugurwa y'iminsi itatu yitezweho gufasha abagore bakora ubuhinzi bw'imboga n'imbuto
Umuyobozi w’akarere ka Rubavu wungirije ushinzwe imibereho myiza Ishimwe Pacifique,yashimye abafatanyabikorwa barimo guhugura abagore
Umwe mu bari gutanga amahugurwa asobanura uburyo abakora ubuhinzi bw'imboga n'imbuto bakongera umusaruro
Umukozi w’umushinga wa Hortinvest mu Ntara y’Iburengerazuba, Uzamukunda Assoumpta yavuze ko bahuje abagore bari mu buhinzi kuko usanga badakunze gukora kinyamwuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza