RRA yiyemeje gukusanya imisoro ya miliyari zisaga 1500 Frw muri uyu mwaka w’ingengo y’imari

Yanditswe na HABIMANA James
Kuya 10 Nyakanga 2019 saa 12:56
Yasuwe :
0 0

Ikigo cy’Igihugu cy’Imisoro n’Amahoro, RRA, kivuga ko intego gifite muri uyu mwaka w’ingengo y’imari wa 2019/2020 ari ugukusanya imisoro ingana na miliyari 1535.8 Frw, zivuye kuri miliyari 1373.06 zakusanyijwe mu mwaka ushize.

Komiseri Mukuru wa RRA, Bizimana Ruganintwali Pascal, yavuze ko mu myaka itatu ishize, iki kigo cyakoze ibikorwa bigamije kuzamura imyumvire ku misoro ku buryo buri cyiciro cy’abarebwa n’umusoro batanze ibitekerezo, bakagaragaza n’imbogamizi bahura nazo.

Ati “Ndashimira abaturarwanda ku bufatanye batugaragarije mu kugera kuri iyi ntego, imibare y’ibaruramari yose ntirahuzwa kugirango tubamenyeshe amafaranga yakusanyijwe muri uyu mwaka dusoje ariko ndizeza ko tuzayibagaragariza mu minsi iri imbere.”

Bizimana yavuze ko mu mwaka w’ingengo y’imari wa 2019/2020 basabwa gukusanya miliyari 1535.8 Frw avuye mu misoro na miliyali 20.0 Frw azava mu bindi bitari imisoro.

Bizimana yavuze ko RRA yahawe kandi inshingano zo kuzashyira mu ngengo y’imari y’umwaka wa 2019/2020 igice cyayo kingana na 54.1%. Ingengo y’imari muri rusange izaba ingana na miliyari 2,876.9 Frw.

Yagize ati “Ubwo twasozaga ingengo y’imari yo mu 2017/2018 twamenyesheje abaturarwanda ko mu mwaka wa 2018/2019 tuzibanda ku kuzamura imyumvire y’abasora bari mu byiciro birimo ubwubatsi, amahoteri hamwe n’ikoranabuhanga n’itumanaho kandi koko ibi bikorwa byatanze umusaruro ushimishije."

Yavuze ko Abanyarwanda n’Abaturarwanda bagomba kuzirikana ko kunyereza imisoro n’amahoro ari icyaha nk’ibindi kandi kimunga ubukungu bw’igihugu utaretse n’abaturage bacyo, kugikora bikagaragaza umuntu adakunda igihugu nk’uko bigenda ku bindi byaha.

Ati “Turabasaba kudufasha kukirwanya no gutanga amakuru ku bantu bose bakora batubahiriza amategeko y’imisoro n’amahoro, gusa ndashimira abakomeje kwitabira gutanga imisoro n’amahoro n’abatanga amakuru ku bayinyereza.”

Yavuze ko gahunda iki kigo gifite muri uyu mwaka, harimo kunoza ingamba ku nzego zirimo ikoranabuhanga n’itumanaho, amahoteli, utubari n’amaresitora, abatumiza ibicuruzwa mu mahanga n’abunganira abatumiza ibintu mu mahanga, hagamijwe ko umusoro ukomeza kwiyongera.

RRA ivuga ko izakorana n’Urugaga rw’Abikorera (PSF) n’abunganira abatumiza ibintu mu mahanga (RWAFFA) hatangwa amahugurwa.

Mu bindi RRA izakora ngo harimo gukoresha ikoranabuhanga ku batumiza ibicuruzwa mu mahanga n’ababunganira ariko rimwe na rimwe bakora nabi bagamije kunyereza imisoro n’amahoro.

Iki kigo cyavuze ko kizatangiza umushinga wo gutanga imashini za EBM ku bacuruzi bose hanashyirwa ingufu mu kugenzura ko zikoreshwa neza, kuko ngo usanga hari ubusumbane mu biciro ku bazikoresha n’abatazikoresha.

Bizimana yanavuze ko bazakomeza gukorana n’itangazamakuru hamenyekanishwa serivisi batanga, no gushyira mu bikorwa ibiteganywa n’amategeko hakurikiranwa abatubahiriza amategeko y’isoresha bagambiriye kunyereza imisoro n’amahoro.

Komiseri Mukuru wa RRA, Bizimana Ruganintwali Pascal avuga ko hakomeje ubukangurambaga bugamije kuzamura ubumenyi ku misoro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza