00:00:00 IGIHE NETWORK KN KINYARWANDA EN ENGLISH FR FRANCAIS

RRA yashyizeho nyirantarengwa yo kwishyura umusoro

Yanditswe na Igizeneza Jean Désiré
Kuya 29 Ukuboza 2022 saa 08:43
Yasuwe :

Ikigo cy’Imisoro n’Amahoro, RRA, cyakanguriye abasora bose baba abo mu bigo bya Leta cyangwa ibyigenga, ko bagomba kwishyura umusoro bitarenze kuri uyu wa Gatanu tariki 30 Ukuboza 2022 saa sita z’amanywa, kugira ngo umusoro wabo uzabarwe nk’uwishyuwe muri uku kwezi.

Ni ubutumwa RRA yatanze kuri uyu wa Gatatu tariki ya 28 Ukuboza 2022. RRA ivuga ko abasora bashobora kwiringira ko bazasora mu matariki ya nyuma bityo bagahura n’ibibazo by’uko zimwe muri banki bakoresha zishobora kuba zitari gutanga serivisi bityo bakaba bagwa no mu bihano by’uko batishyuriye umusoro ku gihe.

Bijya bibaho ko banki zigabanya serivisi zitanga ku itariki ya 30 Ukuboza zikajya gukora ibaruramari rijyanye n’ibyo zakiriye mu mwaka hagamijwe kugira ngo zisoze umwaka zifite imibare ihuye, ibishobora kubangamira abasora baba bategereje kwishyura umusoro bwa nyuma.

Komiseri wungirije ushinzwe abasora muri RRA, Uwitonze Paulin, yabwiye IGIHE ko iyi ari yo mpamvu yatumye basaba abasora ko kuwa Gatanu mbere ya saa sita bagomba kuba bishyuye umusoro mu kwirinda ibihano bishobora guturuka ku gukererwa kwishyura.

Ati “Bagomba kwishyura hakiri kare kugira ngo batazahura n’izo mbogamizi. Twagiraga ngo babimenye kuko dufite amakuru y’uko hari banki zizafunga saa saba zo kuwa Gatanu na zo zikajya mu mibare yazo, mu kubyirinda rero bagakwiye kugerayo barangije kwishyura.”

Akomeza avuga ko nyuma y’ariya masaha ushobora kwishyura amakuru y’uko yabikoze aturuka kuri banki ashobora kuza atinze, ugasanga bimusabye kuzajya kuri yo banki kugaragaza ko yishyuye, uretse ibihano ashobora guhabwa, bikamutwara n’umwanya.

Ati “Uretse no kujya kuri banki natwe bitubaho ugasanga abasora baratugana agaragaza ko yishyuye ku gihe kandi na banki ziba zigomba kugaragaza ko ari byo koko ari porogaramu zabo zatinze kubigaragaza. Ibyo byose rero byagakwiriye kwirindwa aho kuba muri ibyo umuntu akaba ariho akorera amafaranga.”

Imisoro igomba kwishyurwa muri uku kwezi irimo avansi ya gatatu y’umusoro ku nyungu, umusoro ku nyongeragaciro utarishyuwe, umusoro ufatirwa utarishyuwe n’umusoro ku bihembo by’abakozi utarishyuwe.

Komiseri Uwitonze akavuga ko aho guta igihe banyura mu nzego zitandukanye bagaragaza ko bishyuye ku gihe, babikora ubu icyo gihe bakazaba barajwe ishinga no gukorera andi mafaranga cyane ko muri iyi minsi abantu baba bakeneye serivisi zijyanye no gusoza umwaka.

Yasabye ko abasora bagomba kwibuka no kugenzura ububiko bwabo (stock) kugira ngo barebe uko umwaka urangiye bahagaze bizafashe kwitegura uko bazatanga umusoro ku nyungu muri Werurwe umwaka utaha.

Yibukije abadafite inyemezabuguzi za EBM z’ibicuruzwa baranguye ko bakwihutira kuzaka mbere y’uko umwaka urangira ku babaranguje hirindwa ko ibikorwa bakoze mu bucuruzi bwabo bitazangwa kandi byarabayeho.

Ati “Ibyakozwe mu bucuruzi byose bitagaragazwa n’inyemezabuguzi za EBM cyangwa se ibindi bimenyetso byemerwa haba kuri gasutamo n’iyindi misoro ntabwo bizemerwa.”

“Ubwo rero niba hari uwo mwakoranye ntaguhe inyemezabuguzi ya EBM cyangwa iyo yaguhaye ifite ikibazo, wakwihutira kubikemura hakiri kare kuko ntabwo wazabasha kuyimukorera mu gihe tuzaba twageze mu wundi mwaka ngo bikunde. Hakwirindwa ibihombo bidafututse.”

RRA yahagurukiye ikoreshwa rya EBM kuko mu minsi yashize yatangaje ko nyuma y’uko abacuruzi benshi binangiye ntibatange inyemezabuguzi za EBM abandi bagahitishamo umuguzi kuyimuha cyangwa kutayimuha, ubu umuguzi uzajya afatanwa ibicuruzwa adafite inyemezabwishyu, ibyo yaguze bizajya bitezwa cyamunara.

Ni mu gihe kandi umucuruzi wese uzafatwa yacuruje ariko ntatange inyemezabuguzi ya EBM, azajya ahanwa kandi hakorwe n’ubugenzuzi bw’ububiko bw’ibicuruzwa bye kugira ngo ibyo yacuruje byose atabitangiye inyemezabuguzi abitangire umusoro byose.

Ikindi kandi uwo mucuruzi azajya akurikiranwa mu buryo bw’amategeko ku cyaha cyo kunyereza umusoro abigambiriye kandi ubucuruzi bwe bufungwe mu gihe cy’iminsi 30.

Mu 2019, hasohotse itegeko rigena ko n’abantu batabaruye muri TVA batangira gukoresha EBM mu bikorwa byabo bya buri munsi. Ni ukuvuga ko umucuruzi wese, yaba ubona umusaruro wa miliyoni 20 Frw cyangwa eshatu z’amafaranga y’u Rwanda ku mwaka, afite inshingano zo gukoresha ikoranabuhanga rya EBM atanga inyemezabuguzi.

RRA yasabye ko abasora bagomba kwishyura umusoro bitarenze kuwa Gatanu saa sita z'amanywa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .