00:00:00 IGIHE NETWORK KN KINYARWANDA EN ENGLISH FR FRANCAIS

RIB yafashe ibicuruzwa bya miliyoni 15 Frw bitujuje ubuziranenge

Yanditswe na Akayezu Jean de Dieu
Kuya 5 Ukuboza 2022 saa 05:46
Yasuwe :

Urwego rw’Ubugenzacyaha, RIB, rwatangaje ko mu bugenzuzi bwakozwe ku bufatanye n’inzego zitandukanye mu Mujyi wa Kigali, rwafashe ibicuruzwa bitujuje ubuziranenge bifite agaciro ka 15,988,025 Frw.

Ni mu bugenzuzi bwakozwe mu Karere ka Nyarugenge mu bihe bitandukanye, ahafashwe ububiko bw’umucuruzi ufite iduka riherereye mu Gakinjiro.

Ububiko bwafashwe bwari bubitse ibicuruzwa byinshi bivugwa ko byagurwaga muri cyamunara, bimwe bikaba byaratakaje ubuziranenge kubera ko igihe byagenewe kumara cyarenze.

RIB itangaza ko hafashwe amakarito y’inzoga zo mu bwoko bwa Stella Artois zarengeje igihe zifite agaciro ka 6,615,000Frw, n’amakarito 80 y’inzoga za Stella Artois yahawe ibirango bihisha amatariki yerekana igihe zizarangiriza igihe, zifite agaciro ka 1,200,000 Frw.

Ni mu gihe inzoga zo mu bwoko bwa Leffe zo hafashwe amakarito 337 afite agaciro ka 6,740,000 Frw.

Muri ubu bugenzuzi kandi hafashwe amacupa 1,569 y’amavuta y’imisatsi yo mu bwoko bwa Movit afite agaciro ka 1,255,200 Frw, n’amacupa 159 ya Movit yo kwisiga afite agaciro ka 47,700 Frw.

Umuvugizi wa RIB, Dr Murangira B. Thierry yavuze ko hanafashwe amacupa 28 y’amavuta atukuza uruhu azwi nka Mukorogo, afite agaciro ka 28,000 Frw. Hari n’amacupa 101 y’umutobe wa Novida afite agaciro ka 63,125 Frw.

Hafashwe kandi amapaki 39 y’amashashi afite agaciro 39,000 Frw.

RIB yaburiye abishora muri ibi bikorwa

Dr Murangira yibukije abacuruzi ko abakora ibyaha nk’ibi byo gucuruza ibintu byarengeje igihe bakoresheje amanyanga yo guhindura amatariki byagombaga kurangiriraho, bagirwa inama yo kubizinukwa.

Ati "RIB irihanangiriza abacuruzi bakora ibyaha nk’ibi byose byo guhindura amatariki agaragaza igihe igicuruzwa kigomba kurangirira ntibite ku ngaruka byagira ku buzima bw’abantu bakita gusa ku nyungu zabo z’amafaranga; ntabwo bikwiriye."

Yakomeje agira ati "Usibye kuba bitera igihombo abo bacuruzi; bigira ingaruka no ku buzima bw’abantu. Ibikorwa nk’ibi ntibizihanganirwa."

Dr Murangira yasabye abaguzi kujya basuzuma amatariki y’ibicuruzwa baguze, basanga bitujuje ubuziranenge bagatungira agatoki RIB.

Yashimiye abantu bose batanga amakuru ku bikorwa nk’ibi bigira ingaruka ku buzima bw’abantu, kugirango bihanwe.

Umucuruzi wafashwe ubu afungiye kuri sitasiyo ya RIB ya Nyarugenge, nyuma y’iminsi yihishahisha. Ari gukorerwa dosiye kugira ngo ishyikirizwe Ubushinjacyaha.

Abafashwe bahinduye amatariki y’igihe ibicuruzwa byari kuzarangirira bakurikiranyweho guhimba, guhindura inyandiko cyangwa gukoresha inyandiko mpimbano.

Baramutse babihamijwe n’urukiko bashobora guhanishwa igifungo kitari munsi y’imyaka itanu ariko itarenze irindwi, bakanatanga ihazabu iri hagati ya miliyoni 3 Frw na 5 Frw.

Izi nzoga zasanzwe mu bubiko zararengeje igihe
Abacuruzi bagiye bahisha itariki yo kurangiza igihe
Mu byafashwe harimo n'amavuta ahindura uruhu
Aya makarito na yo yasanganywe ibibazo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .