00:00:00 IGIHE NETWORK KN KINYARWANDA EN ENGLISH FR FRANCAIS

Paul Russo yagizwe Umuyobozi Mukuru wa KCB Group Plc

Yanditswe na IGIHE
Kuya 25 May 2022 saa 09:14
Yasuwe :

Inama y’ubutegetsi ya KCB Group Plc yagize Paul Russo, Umuyobozi Mukuru asimbuye Joshua Oigara wari umaze imyaka icyenda n’igice kuri uyu mwanya.

Itangazo rya KCB Group rivuga ko Paul Russo agomba gutangira izi nshingano kuri uyu wa Gatatu tariki 25 Gicurasi 2022.

Russo yagizwe Umuyobozi Mukuru nyuma y’amezi abiri hatangiye igikorwa cyo gushaka umusimbura wa Joshua Oigara wagize uruhare rukomeye cyane mu iterambere rya KCB Group.

Uwamusimbuye afite ubunararibonye mu by’amabanki, ubuyobozi, gucunga abakozi, gushyiraho ingamba no gukora ubucuruzi.

Yari asanzwe ari Umuyobozi muri Banki Nkuru ya Kenya n’Umuyobozi muri KCB Group ushinzwe ubucuruzi mu karere. Amaze imyaka 20 mu nzego z’ubuyobozi za KCB Group, aho yanabaye ushinzwe abakozi.

Russo afite impamyabumenyi y’icyiciro cya gatatu cya Kaminuza mu bucuruzi yakuye muri Strathmore University Business School ndetse n’iy’icyiciro cya kabiri cya kaminuza mu micungire y’ubucuruzi yakuye muri Moi University n’izindi.

Inama y’ubutegetsi ya KCB Group yashimangiye ko ifite icyizere muri Russo cyo kuzagera ku ntego z’iterambere yifuza bitewe n’uburyo yarebereye ubucuruzi bw’iyi banki mu bihugu nka Tanzania, u Rwanda, u Burundi, Uganda, Sudan y’Epfo n’indi mirimo yagiye akora neza.

Umuyobozi w’Inama y’Ubutegetsi ya KCB Group, Andrew Wambari Kairu, yavuze ko ’Paul Russo ari we muntu wari ukwiye akazi ko kuyobora iyi banki kandi azayigeza ku rundi rwego bigendanye n’intumbero z’iterambere ifite zo kuba banki ikomeye mu karere ifite imipinduka zikenewe mu bucuruzi kandi igira uruhare rukomeye mu bukungu n’iterambere rusange ry’abaturage’.

KCB Group Plc ni yo ibarizwamo KCB Bank Rwanda Ltd iherutse kwihuza na Banki y’Abaturage y’u Rwanda (BPR Plc ), muri gahunda yayo yo kurushaho gushora imari no kwaguka mu Karere.

Uku kwihuza bizatuma abakiliya ba KCB bagira amashami menshi hirya no hino mu gihugu, mu gihe abakiliya ba Banki y’Abaturage bazungukira mu ikoranabuhanga riteye imbere, ibisubizo mu bijyanye no guhererekanya amafaranga ndetse na serivisi za banki mpuzamahanga zitangwa na KCB.

Paul Russo yagizwe Umuyobozi Mukuru wa KCB Group Plc, asanzwe ari umuntu umenyereye iby'amabanki n'ubucuruzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .