00:00:00 IGIHE NETWORK KN KINYARWANDA EN ENGLISH FR FRANCAIS

Netflix yashyizeho igiciro ku bashaka gusangira ifatabuguzi bari muri Amerika y’Amajyepfo

Yanditswe na IGIHE
Kuya 19 July 2022 saa 10:22
Yasuwe :

Sosiyete icuruza amashusho mu buryo bw’ikoranabuhanga, Netflix, yashyizeho amafaranga azajya yishyuzwa abakiliya bayo bashaka gusangira konti y’ifatabuguzi ryabo muri Amerika y’Amajyepfo.

Netflix ivuga ko uyu munsi gusangizanya konti hagati y’ingo byica ishoramari ry’igihe kirekire ryayo n’imikorere muri rusange. Uwaguze ifatabuguzi rya Netflix ashobora guha abandi konti ye n’umubare w’ibanga nabo bakabasha kureba amashusho ntacyo bishyuye.

Gusangizanga konti n’imibare y’ibanga byiganje cyane muri Amerika y’Amajyepfo, akaba ari naho Netflix yakoreye amagenzura abiri igasanga abantu batagura ifatabuguzi ryabo bwite ahubwo basangizanya konti.

Kuri ubu abakiliya ba Netflix muri Argentine, El Salvador, Guatemala, Honduras na République Dominicaine, bazajya basabwa kwishyura inyongera ku ifatabuguzi mu gihe bashaka gusangiza abandi konti zabo cyangwa kuzikoresha ahandi.

Netflix kuri uyu wa Mbere yatangaje ko ibi bitareba abakoresha Netflix kuri telefoni na mudasobwa cyangwa abantu bari mu biruhuko.

Niba ufite ifatabuguzi rya Netflix mu rugo, kurikoresha mu rundi ukoresheje konti imwe uzajya usabwa kwishyura amadolari 1,70 muri Argentine n’amadolari 2,99 mu bindi bihugu.

Netflix ivuga ko ingo zirenga miliyoni 100 zikoresha konti zishyuwe n’abandi bantu, ikinubira uburyo abantu basangizanya imibare y’ibanga, ari nayo mpamvu abiyandikisha kuri uru rubuga bakomeje kugabanuka.

Nibura abakiriya ibihumbi 200 bavuye kuri Netflix mu gihembwe cya mbere cy’uyu mwaka, bikaba biteganyijwe ko mu gihembwe cya kabiri bashobora kugabanukaho miliyoni ebyiri. Agaciro k’umugabane wayo kagabanutseho hejuru ya 65% uyu mwaka nyuma y’uko abashoramari bagaragaje impungenge ko ubucuruzi bwayo buri mu kaga.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .