NAEB yahaye Koperative z’abahinzi b’icyayi imodoka zizabafasha gutwara umusaruro ku nganda

Yanditswe na Thamimu Hakizimana
Kuya 25 Mutarama 2020 saa 11:03
Yasuwe :
0 0

Ikigo gishinzwe guteza imbere ibyoherezwa mu mahanga bikomoka ku buhinzi n’ubworozi (NAEB), cyahaye inkunga y’imodoka amakoperative atanu y’abahinzi b’icyayi zizajya zibafasha gutwara umusaruro ku nganda.

Ayo makoperative ni ayo mu Karere ka Nyamasheke, Nyaruguru, Karongi na Rutsiro. Arimo Koperative z’abahinzi b’icyayi za Gatare (COTHEGA), iya Muganza (COOTHEMUKI) iya Nyamagabe (COTHEGAB), iya TUTHEGROC na KOTECOGRO.

Imodoka zatanzwe zikaba zirimo amoko atatu; izizajya zitwara umusaruro zinyuze mu mihanda mibi, izikurura n’izisanzwe, zose zikaba zifite agaciro ka miliyoni 387 Frw.

Abahinzi b’icyayi bavuga ko bagorwaga no kugeza umusaruro w’icyayi ku nganda rimwe na rimwe ugasarurwa ariko ukarara mu mirima bitewe no kutagira imodoka zibafasha kuwutwara kubera urugendo rurerure ruri hagati y’imirimo n’inganda.

Iyi nkunga ikaba yatanzwe muri gahunda y’umushinga wa PRICE ufatanya na NAEB. Izagirira akamaro abagize amakoperative atanu bagera ku 10500.

Abahinzi b’icyayi, babwiye IGIHE ko izi modoka bahawe zizabafasha kongera cyane umusaruro w’icyayi bahinga.

Umuyobozi wa Koperative z’abahinzi b’icyayi mu Karere ka Nyamasheke, Jeannette Mukantagungira, yagize ati “Twabyishimiye kuko zije gukemura ikibazo twahuraga na cyo kubera imihanda mibi yacu, zizadufasha cyane kuko icya mbere n’imodoka zidahura n’ubunyerere. Zizatuma koperative zacu zongera ubwiza bw’icyayi n’ubwinshi kubera ko nta musaruro uzongera gupfa ubusa.”

Yongeyeho ko abahinzi bagiye kongera igihe cyo gusoroma icyayi bitume n’amasaha menshi bafataga bajya kuzana icyayi mu mirima bakijyana ku nganda agabanuka.

Umuhinzi w’Icyayi mu Karere ka Karongi, Hagumineza Elias, yemeza ko imodoka bahawe zigiye gutuma umusaruro babonaga wikuba kabiri.

Ati “Kuba tubonye ziriya modoka biratuma umusaruro wikuba Kabiri mu bwinshi kandi unazamuke mu bwiza kuko twagiraga ikibazo cy’imodoka nkeya kandi zitari nzima none kuba tubonye izindi biraduha icyizere cy’uko umusaruro uziyongera.”

Umuyobozi w’Impuzamahuriro y’abahinzi b’Icyayi, Karamaga François, ashimangira ko izi modoka aba bahinzi bahawe zizatuma umusaruro n’ubwiza bw’icyayi bahinga byiyongera.

Ati “Hari igihe umusaruro wararaga hanze nturare mu nganda ariko ubwo imodoka zabonetse bizabafasha kuko nta musaruro uzongera kurara mu nzira cyangwa mu murima kubera ikibazo cy’umuhanda mubi”.

Avuga ko iyo abahinzi babonye inkunga nk’iyi bituma umusaruro uzamuka vuba vuba n’imibereho ikarushaho gutera imbere.

Karamaga yongeraho ko mbere abahizi bahuraga n’ikibazo cyo kugeza umusaruro wabo ku nganda, ashimangira ko imodoka bahawe zigiye kugikemura.

NAEB ibinyujije mu mushinga wa PRICE kuva mu 2012 imaze guha inkunga zitandukanye abahinzi b’icyayi zifite agaciro k’asaga miliyoni 605 z’amafaranga y’u Rwanda.

Imiterere y'ipine ry'imodoka itwara umusaruro no mu mihanda mibi ikaba yagera no mu murima
Imodoka imwe itwara umusaruro no mu nzira zitameze neza koperative z'abahinzi b'icyayi zahawe igura miliyoni 30 z'amafaranga y'u Rwanda
Mukantagungira avuga ko izi modoka zizabafasha kugeza umusaruro mu nganda
Umuyobozi w'impuzamahuriro y'abahinzi b'icyayi Karamaga avuga ko izi modoka zizafasha cyane abahinzi
Zimwe mu modoka zitwara umusaruro no mu mihanda itameze neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .