Mu Rwanda nibura hatanzwe ruswa ya miliyari 17 FRW mu 2019

Yanditswe na Ferdinand Maniraguha
Kuya 3 Ukuboza 2019 saa 04:19
Yasuwe :
0 0

Nibura miliyari zisaga 17 Frw zatanzwe nka ruswa muri uyu mwaka wa 2019, hashingiwe ku bushakashatsi bushya bw’Umuryango urwanya ruswa n’akarengane, ishami ry’u Rwanda (Transparency International Rwanda).

Byagaragajwe mu imurika ry’ubwo bushakashatsi ngarukamwaka buzwi nka Rwanda Bribery Index 2019 ryabereye muri Lemigo Hotel kuri uyu wa Kabiri tariki 3 Ukuboza 2019.

Ubushakashatsi bwakorewe ku bantu 2459 mu gihugu hose. 63.3% by’ababajijwe baba mu cyaro naho 36.7% baba mu mijyi. Mu babajijwe, 73.7% babona amafaranga ari munsi ya 31 000 Frw ku kwezi.

Mu basubije, 18.5% bavuze ko bahuye na ruswa mu mezi 12 ashize, naho 81.5 % bavuze ko nta ruswa bahuye nayo. Ni igabanyuka ryiza kuko umwaka ushize abahuye na ruswa bari kuri 20.4 %.

Mu bavuze ko bahuye na ruswa, igiteranyo cya ruswa yose batswe ni 20,662,300 Frw. Bivuze ko buri umwe nibura yagiye yishyura ruswa ya 85,030 FRW.

Transparency International Rwanda ishingiye kuri ayo mafaranga yishyuwe, bagahuza n’umubare w’abanyarwanda bari hejuru y’imyaka 18, yasanze nibura mu gihugu hose haratanzwe ruswa ya 17,406,658,639 Frw.

Ni imibare Umuyobozi Nshingwabikorwa w’uwo muryango, Apollinaire Mupiganyi yavuze ko iteye inkeke kuko iyo ayo mafaranga aza kuba mu isanduku ya Leta yari kuvamo ingengo y’imari y’akarere kamwe cyangwa hakavamo amafaranga yunganira abanyeshuri ku mashuri (capitation grant) yafasha abanyeshuri miliyoni 1.6.

Hakurukijwe ubushakashatsi, inzego zatanzwemo ruswa nyinshi ku isonga haza Urwego rw’Ubugenzacyaha (RIB) hatanzwe ruswa isaga miliyoni esheshatu, mu bucamanza hatanzwe ruswa ya 4 140 000 Frw, Inzego z’ibanze ni 3 424 800 Frw, naho mu Ishami rya Polisi rishinzwe umutekano wo mu muhanda ni 2 750 000 Frw.

Icyakora iyi mibare ntirimo ikibazo cyihariye cyagaragaye aho umwe mu bakozi b’Urwego rushinzwe imirimo imwe n’imwe ifitiye igihugu akamaro (RURA) yishyuwe ruswa ya miliyoni icyenda.

Mu bigo abakoreweho ubushakashatsi batunze agatoki kuba baratswemo ruswa, ku isonga hari iby’imyuga n’ubumenyingiro biri ku kigero cya 12.80%, Ishami rya Polisi rishinzwe umutekano wo mu muhanda riri ku kigero cya 12.40% riivuye kuri 15.4 % umwaka ushize, ku mwanya wa gatatu haza Urwego rw’abikorera rufite 9.90% bivuye kuri 19.29 % umwaka ushize, Urwego rw’Ubugenzacyaha (RIB) biri ku kigero cya 8.50% bivuye kuri 6.12 % umwaka ushize , ubucamanza biri kuri 8.30%.

Hakurikijwe abatswe ruswa bakazitanga, inzego ziza ku isonga ni Ishami rya polisi ishinzwe umutekano wo mu muhanda biri ku kigero cya 9.07 %, RIB biri kuri 7.08%, ibigo by’imyuga n’ubumenyingiro biri ku 5.13 % naho ubucamanza biri kuri 4.53 %

Muri serivisi zagaragayemo itangwa rya ruswa cyane harimo izo gutanga ibyangombwa byo kubaka, impushya zo gutwara ibinyabiziga, gufungurwa muri za gereza, ubugenzuzi bw’imashini zitanga inyemezabuguzi (EBM), serivisi z’ubuvuzi bw’amatungo, gutanga amasoko mu bikorera, guteza kashe mpuruza no kugomboza ibinyabiziga byafashwe byica amategeko y’umuhanda.

Ingabire Marie Immaculée, Umuyobozi wa Transparency International Rwanda yavuze ko bizeye ko ubu bushakashatsi buzafasha ibigo byagaragayeho ruswa kwikubita agashyi.

Ati “Ndizera ko ahagaragaye ibyuho dufatanyije twabibonera igisubizo. Ndashaka gushimira REG, mbere na mbere nabonye bajya i Nkumba mu Itorero n’umuyobozi Mukuru yari ahari. Biyemeje ko bagiye kongera imbaraga kandi byatanze umusaruro. Ndanashimira Polisi, kuko hari ahantu henshi ihurira n’abaturage kandi ni henshi, ntabwo byoroshye gucunga abo bantu bose ariko baragerageza.”

Umuvunyi Mukuru Wungirije, Musangabatware Clement yavuze ko bagiye kongera imbagara mu nzego byagaragaye ko zivugwamo ruswa cyane, bashake ingamba zatuma bigabanyuka.

Ati “Icyo ubu bushakashatsi budufasha ni ukumenya aho tugomba gushyira imbaraga kubera ko abaryi ba ruswa yaba abayitanga n’abayakira nabo baba bafite amayeri menshi. Natwe tugomba kwegera ziriya nzego zagize umusaruro udashimishije kugira ngo ruswa ivugwamo igabanyuke. Abakoze neza nabo tuzakomeza kubegera kugira ngo bagume mu nzira nziza.”

Umuyobozi Mukuru wa sosiyete y’u Rwanda ishinzwe ingufu (REG), Ron Weiss yavuze ko kimwe mu byatumye bagira amanota meza mu kurwanya ruswa byaturutse ku bushake bw’ubuyobozi bw’icyo kigo.

Yavuze ko hari bamwe mu bakozi bajyaga gutanga serivisi ku baturage nk’ahabaye ikibazo cy’amashanyarazi, bakabanza kwaka amafaranga y’itike kandi bitemewe n’amategeko.

Weiss yavuze ko bamaze kumenya ko bikorwa kandi bikabatesha amanota, bafashe ingamba n’ibihano bikakaye .

Ati “Twiyemeje kutajenjekera ibijyanye na ruswa, abayobozi bose biyemeje kutabyihanganira. Ntabwo twakwihanganira utuntu duto ndetse n’ibinini. Aho byagiye biba ngombwa twagiye tubata muri yombi cyangwa tukirukana, tugasaba na komite ishinzwe imyitwarire igafata ingamba.”

Ubushakashatsi bwagaragaje ko ikibazo gikomeye kigihari ari uko mu batswe ruswa, 86.8% nta rwego bigeze babimenyesha.

Mu biganiro byatanzwe, havuzwe ku kongera imbaraga mu gishishikariza abanyarwanda kumenyekanisha aho bahuye na ruswa kugira ngo bicike
Umuyobozi Mukuru wa sosiyete y’u Rwanda ishinzwe ingufu (REG), Ron Weiss yavuze ko kimwe mu byatumye bagira amanota meza mu kurwanya ruswa byaturutse ku bushake bw’ubuyobozi bw’icyo kigo
Depite Dr Frank Habineza ni umwe mu bitabiriye watanze igitekerezo ku kurwanya ruswa
Umuvugizi w'Inkiko, Harrison Mutabazi yavuze ko bagiye gushyira imbaraga mu kurwanya ruswa mu rwego rw'ubucamanza
Polisi yiyemeje gukomeza ubugenzuzi mu bakozi bayo kugira ngo ruswa icike
Ingabire Marie Immaculée, Umuyobozi wa Transparency International Rwanda yavuze ko bizeye ko ubu bushakashatsi buzafasha ibigo byagaragayeho ruswa kwikubita agashyi
Ibiganiro byatanzwe byagarutse ku gusaba Leta kongera ingufu mu igenzura ry'imitangire ya serivisi no kuziba ibyuho bishobora gutangirwamo ruswa

Amafoto: Munyarugerero Gift


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza