00:00:00 IGIHE NETWORK KN KINYARWANDA EN ENGLISH FR FRANCAIS

Mobile Money yatangiye gukorana na Airtel Money

Yanditswe na Muyisenge Jean Felix
Kuya 27 May 2022 saa 01:11
Yasuwe :

Guhera kuri uyu wa Kane tariki ya 26 Gicurasi 2022, abafatabuguzi ba MoMo Rwanda na Airtel Money bashobora kohereza no kwakira amafaranga ku mirongo yombi.

Ibi byagarutsweho nyuma y’ubufatanye bw’i ikigo gitanga serivisi zo guhererekanya amafaranga hifashishijwe ikoranabuhanga, RSwitch, Mobile Money Rwanda Ltd na Airtel Mobile Commerce Ltd itanga serivisi za Airtel Money, mu guhuza imirongo biciye mu mushinga wa eKash wo guhuza imiyoboro yo guhererekanya amafaranga.

eKash kandi yatangijwe ku bufatanye n’Ikigo gihuza ibigo by’imari mu buryo bw’itumanaho no guherekanya amafaranga, Rswitch.

Igiciro cyo kohereza no kwakira amafaranga kizaguma uko cyari kimeze, ni ukuvuga ko amafaranga umuntu ukoresha MTN yakatwaga yohereza amafaranga kuri nimero ya MoMo ari yo azakomeza agakatwa yoherereza umuntu uri muri Airtel Money.

Abakoresha Airtel Money nabo bazakomeza kwishyura ikiguzi bari basazwe batanga kuri izi serivisi zo kohereza no kwakira amafaranga.

Kugira ngo wemererwe gukoresha izi serivisi, bisaba kubanza kwiyandikisha aho wemera amategeko n’amabwiriza yashyizweho n’umuyoboro ukoresha ukanda *182*11# ubundi ugakurikiza amabwiriza.

Igihe umaze kwiyandikisha ushaka gutangira kohereza amafaranga ukanda *182*1*2# ugakurikiza amabwiriza.

Umuyobozi uhagarariye Mobile Money, Chantal Kagame yatangaje ko eKash atari amahirwe bahaye Abanyarwanda ahubwo ari uburenganzira bwabo.

Ati “Ibyo tumaze igihe dutegura byose bigamije kudufasha gutanga serivisi nziza zihuse kandi zizewe.”

Umuyobozi ushinzwe serivisi zo kwishyurana muri Banki Nkuru y’u Rwanda (BNR), John Karamuka, yatangaje ko iyi ari intambwe itewe mu rugendo u Rwanda rwatangiye rwo kugera kuri gahunda yo guhuza ibigo kora serivisi zo guherekanya amafaranga kugira ngo abafatabuguzi babo boherezanye amafaranga nta mbogamizi ziriho.

Ati “Twakoze inyigo y’umushinga wo gufasha Abanyarwanda bakoresha serivisi z’ibigo nka banki, SACCO, ibigo by’imari biciriritse n’ibindi bitandukanye guhererekanya amafaranga, mu buryo nk’ubu bwa eKash”.

Yanagaragaje ko RSwitch ari yo izahuza imiyoboro y’ibi bigo kugira ngo izo serivisi zo guherekanya amafaranga zishoboke.

Umuyobozi Mukuru w’ishami ryo guhanga udushya n’ikoranabuhanga rishya muri Minisiteri y’Ikoranabuhanga na Inovasiyo, Esther Kunda yashimiye Mobile Money Rwanda Ltd na Airtel Mobile Commerce Ltd kuba yateye iyi ntambwe yo korohereza Abanyarwanda guhererekanya amafaranga mu buryo bwihuse.

Uyu muyobozi kandi yanahishuye ko bari gukorana na za banki ku buryo mu gihe cya hafi nazo zizatangira gukorana muri ubu buryo.

Umuyobozi wa Airtel Mobile Commerce, Jean Claude Gaga yatangaje ko eKash izafasha kwagura serivisi za Airtel ku bagenerwabikorwa batandukanye.

eKash ni bumwe mu bundi buryo butandukanye bwitezweho mu kwihutsha umushinga w’ihererekanya ry’amafaranga hagati y’imirongo itandukanye ihuza amabanki, Ibigo by’imari biciriritse (Microfinances), SACCO ndetse n’ibindi bigo by’imari.

Ibi bijyanye n’icyerekezo cya Guverinoma y’u Rwanda kigamije kugera kuri gahunda y’ubukungu bushingiye ku kohererezanya amafaranga mu buryo bw’ikoranabuhanga (Cashless economy).

Guhera kuri uyu wa kane tariki ya 26 Gicurasi 2022, abafatabuguzi ba MoMo Rwanda na Airtel Money bashobora kohereza no kwakira amafaranga ku mirongo yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .