Minisitiri w’Intebe yatangije ikoreshwa ry’imodoka za mbere zifashisha amashanyarazi mu Rwanda (Amafoto)

Yanditswe na Cyprien Niyomwungeri
Kuya 29 Ukwakira 2019 saa 02:16
Yasuwe :
0 0

Minisitiri w’Intebe, Dr Edouard Ngirente, yatangije ikoreshwa ry’imodoka za mbere zikoresha amashanyarazi z’uruganda Volkswagen zigiye gutangira kwifashishwa mu gutwara abantu mu mushinga wa Move, aho umuntu akoresha porogaramu ya telefoni mu gusaba gutizwa imodoka ya mu gihe runaka.

Izi modoka ziswe e-Golf, ziratangira gukoreshwa mu Rwanda kuri uyu wa Kabiri ku bufatanye bwa Volkswagen n’ikigo cyo mu Budage, Siemens, aho cyo kizajya gitanga uburyo bwo kongera umuriro w’amashanyarazi mu modoka.

Ku ikubitiro imodoka enye nizo zatangiye gukoreshwa ariko hari gahunda yo kwagura zikagera kuri 50, ndetse na sitasiyo zazo zikava kuri imwe zikagera kuri 15 mu gihugu hose.

Minisitiri w’Intebe Dr Ngirente yavuze ko gutangiza ikoreshwa ry’izi modoka ari intambwe ijya mbere yo gushyigikira uburyo bwiza bwo gutwara abantu binyuze mu gutiza imodoka bwatangijwe mu Rwanda.

Ati “Ibi birerekana ko twiyemeje gushyira imbere ikoranabuhanga kugira ngo rihindure iterambere ry’ubukungu bwarwo. Bifite kandi umumaro mu kurengera ibidukikije no guteza imbere ikoranabuhanga”.

Yakomeje avuga ko abanyarwanda bazi ko kurengera ibidukikije no kurwanya ibyuka bihumanya ikirere ari ingenzi kandi ubu buryo bwo gukoresha izi modoka bukazatuma bagera ku byo biyemeje mu kurwanya ibyo byuka.

Minisitiri w’Intebe yashimye uburyo ishoramari rya Volkswagen ririmo gutanga imirimo bigendanye n’umuhigo wa leta y’u Rwanda wo guhanga imirimo miliyoni mu 2024.

Umuyobozi Mukuru wa Volkswagen mu Rwanda, Rugwizangoga Michaella, yavuze ko muri gahunda ya Move, yo gutiza imodoka kugera mu mpera z’uyu mwaka imodoka zirenga 200 zizaba zikoreshwa mu Rwanda harimo izo mu bwoko bwa Polo, Amarok, Teramont na Passat. Abashoferi 20 b’abagore bakora muri iyi gahunda.

Ati “Imodoka zikoresha amashanyarazi zimaze gukoreshwa ahantu henshi ariko nyuma y’ubushakashatsi, amahugurwa n’ibindi byakozwe, uyu munsi turatangiza izi modoka mu Rwanda ari nazo za mbere za Volkswagen muri Afurika.”

Izi modoka zagejejwe ku isoko ry’u Rwanda ku bufatanye bwa Volkswagen na Siemens, aho izatanga uburyo bwo kongera umuriro muri izo modoka.

Umuyobozi wa Volkswagen muri Afurika y’Epfo, Thomas Schafer, yavuze ko gutangiza ikoreshwa ry’izi modoka ari ugukomereza ku rugendo rwatangiye mu 2016 ubwo u Rwanda rwasinyaga amasezerano y’ubufatanye n’u Rwanda na Volkswagen, yo gushyira uruganda ruteranyiriza imodoka hano no gutangiza uburyo bwo gutwara abantu ndetse no guhugura.

Ati “Kugera ku musaruro mwiza kwa gahunda twatangije yo gutiza abantu imodoka byatweretse ko u Rwanda rufite icyerekezo cyo kuva ku modoka zikoresha amavuta rukajya ku zikoresha amashanyarazi. Dufite kandi icyizere dukura kuri ubwo bwabyaye umusaruro tutari twiteze”.

Batiri y’iyi modoka igura ibihumbi $8 bivuze ko igiciro cyayo kingana n’icy’imodoka isanzwe bimeze kimwe ariko hakiyongeraho ibyo bihumbi $8, niyo mpamvu zihenze ariko igiciro cya batiri kirimo kugabanywa.

Thomas Schafer avuga ko uko imodoka z’amashanyarazi zikorwa ari nyinshi ku Isi niko igiciro kigabanyuka, ku buryo mu myaka itanu cyangwa itandatu igiciro cy’imodoka zikoresha amashanyarazi kizagabanyuka.

Ati “Ubu ntabwo ari izo kugurisha turashaka mbere na mbere kuzikoresha mu buryo bwo kuzisangira aho ukoresha telefoni yawe ukayisaba ariko birashoboka ko umwaka utaha tuzatangira kuzigurisha”.

U Rwanda rurashaka kuba igihugu cy’intangarugero mu kurengera ibidukikije kandi natwe nibyo dushaka, ni ibintu bigendanye kandi dushyigikiye.

“Turashaka kuzana imodoka 50 kandi muri Kigali turatekereza ko ari ikintu cyiza abantu bashobora kuzibona, kuryoherwa na zo, ariko niba abantu bazikunze twakongera.”

Umuyobozi wa Siemens muri Afurika y’Amajyepfo n’Uburasirazuba, Sabine Dall’Omo, yashimangiye ko ‘uko imijyi ya Afurika itera imbere n’ikoranabuhanga rigatera imbere, niyo mpamvu hakenewe uburyo bwo gutwara abantu bugezweho kandi burambye mu Mujyi wa Kigali’.

Iyi modoka itagira imyotsi ishobora kugenda kilometero 230, igashyirwamo umuriro iyo bikorewe mu rugo ni hagati y’amasaha 10 na 11, naho kuyishyiramo umuriro ku buryo bwihuse [kuri sitasiyo] ni iminota 45.

Izi modoka za e-Golf ntabwo zateranyirijwe mu Rwanda ahubwo zakorewe mu Budage zizanwa mu gihugu.

Volkswagen Group iteganya gushora miliyari €30 mu gukora imodoka zikoresha mashanyarazi, aho iteganya kongera ubwoko bw’imodoka zikoresha amashanyarazi gusa, zikava ku bwoko butandatu bukagera kuri 50 bitarenze umwaka wa 2025.

Nyuma yo gutangiza ikoreshwa ry’izi modoka mu Rwanda, Volkswagen ivuga ko aho ishaka gukomereza ari muri Ghana, bakaba bari mu biganiro n’iki gihugu.

Ibyo wamenya kuri e-Golf

Irakoze Serge uhagarariye abashoferi muri Volkswagen Mobility Solutions, wakoze amahugurwa ku modoka nshya yitwa e-Golf, avuga ko ari imodoka nziza ije gukemura ibibazo bijyanye no guhumanya ikirere kuko nta myotsi itera ari amashanyarazi gusa.

Iyi modoka nta kidasanzwe kuko ifite amapine ane nk’izindi, yagenewe gutwara abantu nk’ibisanzwe ariko umwihariko wa mbere ni uko idakoresha ibikomoka kuri peteroli igakoresha amashanyarazi.

Ifite batiri ishyirwamo amashanyarazi hanyuma ukagenda kilometero 230 cyangwa bikiyongera bitewe n’uburyo wayitwayemo.

Irakoze ati “Iyo uyitwaye ukongera umuvuduko cyane umuriro ushira vuba nk’uko bigenda ku modoka zisanzwe. Uko ukoresheje cyane batiri ishiramo.”

Bishobora no kugera ku bilometero 300 bitewe nuko washyizemo uburyo bwitwa ‘Economic’, ariko ushyize no mu buryo bwa Economic+ yagenda ibilometero birenze 300.

Igira imigozi ibiri yo kongeramo umuriro [Chargeur ebyiri], umwe ushobora gucomekwa nko mu rugo n’undi ishyirwa kuri sitasiyo. Kuri sitasiyo yuzurira hagati y’iminota 45 n’isaha naho iyo mu nzu bifata hagati y’amasaha arindwi na 10.

Ikozwe na batiri kuko ituruka imbere ikagera inyuma. Ku mapine yayo, iyo itobotse hari umuti wabugenewe ushyiraho ugahita ukomeza urugendo.

Irakoze avuga ko iyi modoka ari ‘automatique’, iyo uyirebye ikaba ari iyisanzwe ariko abagiye kuyitwara babanza guhugurwa mu ‘kukwereka ugiye kuyitwara uko imodoka agiye gutwara imeze, uko igenda kuko iyo iguciyeho ntabwo wabyumva kuko ntihinda, iyo uyakije ni gute umenya ko yatse n’ibindi’.

Ubusanzwe iyo wakije imodoka wumva ijwi ryayo ko yatse ariko izi zo bisaba kubirebera muri ‘tableau’. Igenda kilometero 160/h.

Minisitiri w'Intebe Dr Ngirente n'abandi bayobozi ubwo batangizaga ikoreshwa ry'imodoka zikoresha amashanyarazi mu Rwanda
Umuyobozi Mukuru wa RwandAir, Yvonne Makolo (iburyo) yitabiriye uyu muhango
Abayobozi batandukanye bitabiriye itangizwa ryo gukoresha imodoka zikoresha amashanyarazi
Umuyobozi Mukuru wa Volkswagen mu Rwanda Rugwizangoga avuga ko izi modoka zizifashishwa mu buryo busanzwe bwo kuzitiza abantu bakitwara cyangwa bagatwarwa n'abashoferi babo
Umuyobozi wa Siemens muri Afurika y’Amajyepfo n’Uburasirazuba, Sabine Dall’Omo, yashimangiye ko bashyigikiye gahunda yo kurwanya imyuka yangiza ikirere mu Rwanda
Iki gikorwa cyatangiranye imodoka enye ariko mu minsi iri imbere zizagera kuri 50
Iyi modoka ikoresha amashanyarazi gusa
Umuyobozi wa Volkswagen muri Afurika y’Epfo, Thomas Schafer, yavuze ko gutangiza ikoreshwa ry’izi modoka ari ugukomereza ibiri mu masezerano bafitanye n'u Rwanda
Minisitiri w'Intebe Dr Ngirente yashimye ishoramari rya Volkswagen mu Rwanda kuko ririmo kurufasha guhanga imirimo
Siemens izashyiraho sitasiyo zo kongereramo amashanyarazi
Minisitiri w'Intebe agiye kuganura iyi modoka
Mu cyumweru gishize nibwo Volkswagen yatangije ikoreshwa ry'izi modoka zikoreshwa n'amashanyarazi
Kuri sitasiyo iyi modoka izajya yongerwamo amashanyarazi iminota 45
Sitasiyo yongera amashanyarazi mu modoka

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza