MINAGRI yavuze ku nka 200 zatanzwe na Minisitiri w’u Buhinde ku baturage ba Rweru

Yanditswe na Habimana James
Kuya 15 Mutarama 2020 saa 10:20
Yasuwe :
0 0

Minisitiri w’Ubuhinzi n’Ubworozi, Dr Mukeshimana Geraldine, yavuze ko nyuma y’aho Minisitiri w’Intebe w’u Buhinde, Narendra Modi, yemereye koroza inka 200 abaturage bo mu Mudugudu wa Rweru mu karere ka Bugesera, ubu zose zamaze kubageraho.

Dr Mukeshimana yabigarutseho kuri uyu wa Kabiri mu kiganiro n’itangazamakuru, cyibanze ku ngingo zitandukanye zireba ubuhinzi n’ubworozi mu gihugu.

Muri Nyakanga 2018, Perezida Kagame na Minisitiri w’Intebe w’u Buhinde, Narendra Modi, basuye Umudugudu w’Icyitegererezo wa Rweru mu Karere ka Bugesera aho Minisitiri w’Intebe w’u Buhinde yiyemeje gutanga inka 200 ku bawutuye.

Modi yari mu Rwanda kuva ku wa 23 Nyakanga mu ruzinduko rw’iminsi ibiri yasoje tariki 24 Nyakanga 2018.

Nyuma yo gusura Rweru, Modi yavuze ko “Gahunda ya Girinka iri kugira uruhare mu guhindura ubuzima bw’abatuye mu cyaro hirya no hino mu Rwanda. Nanabwiye Perezida Paul Kagame kuri gahunda natwe dufite mu Buhinde zigamije iterambere ry’ibyaro byacu.”

Dr Mukeshimana yavuze ko kuri uwo munsi, Minisitiri Modi yahise atanga inka 47 muri izo 200 yari yiyemeje gutanga.

Yagize ati “Ubu Inka zose zaratanzwe, nk’uko n’ubundi dusanzwe tubikora dufite n’ubundi abantu badufasha muri Girinka, buriya Minisitiri w’Intebe w’u Buhinde ni umwe mu bantu badufashije baduhaye hafi ibihumbi 200 yo kugura inka zijya muri Girinka, uriya munsi w’ibirori twatanze inka 47 ariko twari turi no muri gahunda yo gutanga inka aho muri Rweru no muri Bugesera, izo nka zose uko ari 200 zaratanzwe, n’ubu uwajyayo yahasanga inka zirenze 200.”

Dr Mukeshimana yavuze ko muri rusange leta imaze gutanga inka ibihumbi 360 mu gihugu zahawe abatishoboye ngo zibateze imbere.

Gahunda ya Girinka yatangijwe na Perezida wa Repubulika mu 2006, nyuma yo kubona ko hari umubare munini w’abana bafite imirire mibi ndetse n’imiryango myinshi iri mu bukene.

Umuryango uhabwa inka, yabyara hakorozwa undi ukennye.

Muri Nzeri 2019, Minisitiri Narendra Modi, nawe yatangaje ko ateganya gutangiza mu gihugu cye iyi gahunda mu rwego rwo gushyira ingufu mu guteza imbere ubukungu bw’abaturage be.

Modi yabitangarije muri Leta ya Uttar Pradesh, ubwo yagezaga ku baturage ibyo amaze kugeraho mu minsi 100 yari amaze ku butegetsi muri manda ye ya kabiri aherutse gutorerwa.

Yagize ati “Hari igihugu cyitwa u Rwanda muri Afurika, nagiyeyo, mu Rwanda hari gahunda bafite yihariye aho leta iha abaturage batuye mu cyaro inka ariko bakaba bafite amabwiriza ko inka izayivukaho mbere, izahabwa abandi batayite.”

Modi yakomeje agira ati “Mu buzima bw’abaturage b’u Buhinde ubworozi ni ikintu gikomeye, ese koko umuryango wo mu bice by’icyaro wabaho utabikoze? Sinzi impamvu hari abantu bamwe batungurwa iyo bumvise ibi.”

Kuva iyi gahunda yatangizwa mu Rwanda, Minisiteri y’Ubuhinzi n’Ubworozi igaragaza ko zimwe mu mbogamizi yagiye ihura nazo zirimo abaturage bazihabwa aho kuzifata neza ugasanga zirapfuye, cyangwa abandi bakazigurisha ntizire icyo zibafasha.

Inkuru bifitanye isano: Perezida Kagame yashimye Narendra woroje inka 200 abatuye mu Mudugudu wa Rweru

Minisitiri Modi yatangaje ko iyi gahunda agiye kuyitangiza no mu guhugu cye
Modi yasinze atanze inka 200 ariko ngo n'izindi zamaze kubageraho
Muri Nyakanga 2018 Narendra Modi ari kumwe na Perezida Kagame basuye abaturage ba Rweru hanatangwa inka zo kubafasha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .