Menya intiti umunani zishinzwe ubusugire bw’ifaranga ry’u Rwanda

Yanditswe na Habimana James
Kuya 15 Ugushyingo 2019 saa 02:42
Yasuwe :
0 0

Agaciro k’ifaranga ry’igihugu ni ingingo yitabwaho cyane mu bukungu bwacyo kuko ari ko kagena ubuhahirane hagati y’abagituye ndetse n’amahanga. Usanga gapimirwa ku idolari cyangwa andi akoreshwa ku masoko y’igihugu runaka ariko agaciro karyo gashobora guhindagurika bitewe n’ishusho y’ubukungu bw’Isi, akarere n’igihugu.

Buri munsi abantu bazindukira mu kazi, hari abajya gucuruza, gutwara abagenzi mu modoka, ku magare, moto n’ibindi. Bose bahurira ku ntego imwe yo gushaka amafaranga abafasha mu mibereho.

Gushaka amafaranga ni kimwe ariko agaciro kayo ku isoko ni ikindi kuko hari igihe usanga ibicuruzwa bihenze ku buryo ya mafaranga atashobora kubyigondera.

Mu bihugu bimwe birimo n’ibya Afurika humvikanye abantu bagiye guhaha umugati cyangwa akandi kantu koroheje, bakitwaza umufuka wuzuye amafaranga ku ngorofani cyangwa mu mifuka, ibi biterwa n’uko iryo faranga riba ryatangiye guta agaciro.

Urugero rwa bugufi ni Zimbabwe. Ku butegetsi bwa Robert Mugabe ubukungu bw’igihugu bwarahanantutse ibintu bitigeze bibaho ku Isi. Ifaranga ry’igihugu ryataye agaciro inshuro zirenga miliyoni 100.

Buri gihugu kigira itsinda ry’abahanga bakurikirana umunsi ku wundi uko ifaranga ryacyo rihagaze, akenshi bakarigereranya n’idolari rya Leta Zunze Ubumwe za Amerika kuko ariryo rikoreshwa hafi ku Isi yose.

Mu Rwanda naho hari urwego rukuriye izindi, rugenzura umunota ku wundi ko ifaranga rihagaze neza. Urwo rwego ni Banki Nkuru y’’Igihugu (BNR).

Muri BNR hari inama igizwe n’intiti umunani zizobereye mu bijyanye n’Ubukungu ari nazo zigenzura uko amafaranga ahagaze, ku buryo ubukungu bw’igihugu budahungabana.

IGIHE yifashishije urubuga rwa BNR yakusanyije iby’ingenzi ku bahanga mu by’ubukungu bakurikiranira hafi ifaranga ry’u Rwanda.

Ibyo wamenya ku ntiti umunani zishinzwe ubusugire bw’ifaranga ry’u Rwanda

-  Rwangombwa John : Guverineri wa BNR ni we uyoboye Inama y’Ubutegetsi y’iyi banki.

Rwangombwa yabaye Guverineri wa BNR kuva tariki 25 Gashyantare 2013 kugeza uyu munsi.

Yatangiriye imirimo mu Kigo cy’Igihugu cy’Imisoro n’Amahoro, RRA, aho yabaye Umuyobozi Wungirije ushinzwe Ibikorwa bya Gasutamo.

Nyuma yagiye muri Minisiteri y’Imari n’Igenamigambi mu 2002, aho yahawe inshingano z’Umuyobozi w’Ishami rishinzwe Umutungo w’Igihugu.

Guverineri wa Banki Nkuru y’u Rwanda, John Rwangombwa

-  Dr Monique Nsanzabaganwa : Ni Umuyobozi wungirije w’Inama y’Ubutegetsi muri BNR, akaba n’Umuyobozi wungirije muri BNR kuva muri Gicurasi 2011.

Nsanzabaganwa yabaye Minisitiri w’Ubucuruzi n’Inganda hagati y’umwaka wa 2008-2011, aza no kuba Umunyamabanga wa Leta ushinzwe Igenamigambi muri Minisiteri y’Imari n’Igenamigambi hagati y’umwaka wa 2003-2008. Yabaye kandi umwarimu muri Kaminuza Nkuru y’u Rwanda.

Visi Guverineri wa Banki Nkuru y'u Rwanda, Dr Nsanzabaganwa Monique

-  Dr. Ildephonse Musafiri: Ni inararibonye mu by’Ubukungu mu myaka irenga 15 ishize.

Dr. Ildephonse ubu ni Umuyobozi ushinzwe Ibikorwa na gahunda (Head of the Strategy and Policy Unit-SPU) mu Biro bya Perezida wa Repubulika. Mu nshingano ze kandi atanga ubujyanama kuri Perezida wa Repubulika mu bijyanye n’ubukungu, imibereho n’ibijyanye n’imiyoborere.

Yinjiye mu Nama y’Ubutegetsi ya BNR kuva muri Mata 2018. Yabaye Umuyobozi wungirije ushinzwe Ibikorwa (SPU) mu bijyanye n’ubukungu kuva muri Nyakanga 2016 kugeza muri Kamena 2018.

Dr. Ildephonse kandi yabaye Umwarimu muri Kaminuza y’u Rwanda aho yigishaga akanakora ubushakashatsi, yari anafite inshingano nk’Umuyobozi ushinzwe Ishami ry’Ubukungu.

Ubushakashatsi bwe bwibandaga mu gusesengura ubukungu, iterambere ry’icyaro, kugabanya ubukene n’ubusumbane, iterambere ry’ubuhinzi, ibiribwa n’ibindi.

Yagiye kandi atanga ubujyanama mu mishinga nk’Ikigega cya Leta Zunze Ubumwe za Amerika gishinzwe Iterambere Mpuzamahanga (USAID), Umuryango utabara Imbabare (Croix Rouge), Ikigo Mpuzamahanga gishinzwe Ubushakashatsi ku biribwa (IFPRI), Ikigo cy’Igihugu cyo kubungabunga Ibidukikije (REMA), Umushinga w’Abadage wita ku Iterambere (GIZ), Ikigo cy’Igihugu gishinzwe kongerera ubushobozi inzego z’ibanze (LODA) n’indi.

Musafiri kandi yakoze mu Muryango utegamiye kuri Leta w’Abanyamerika, World Vision, Ishami ry’u Rwanda mu gihe cy’imyaka ibiri, aho yari afite inshingano zo kwita ku bikorwa bigamije kongerera ubushobozi ibigo bitandukanye.

Yatangiye urugendo rwe rw’ubunyamwuga yigisha mu mashuri abanza n’ayisumbuye. Musafiri yize ibijyanye n’Iterambere mu by’Ubukungu muri Kaminuza y’u Rwanda aho yakuye Impamyabumenyi y’Icyiciro cya Kabiri cya Kaminuza n’iy’icya Gatatu mu bijyanye mu bijyanye n’Ubukungu. Impamyabumenyi y’Ikirenga mu bijyanye n’Ubukungu mu by’Ubuhinzi yo yayivanye muri Kaminuza ya Bonn mu Budage.

Avuga neza Icyongereza, Igifaransa ndetse n’Ikinyarwanda, akaba ashobora no kuvuga akanandika Ikidage.

Dr. Ildephonse Musafiri amaze imyaka 15 akora mu bijyanye n'Ubukungu

-  Keza Faith: Asanzwe ari Umuyobozi wa Irembo, Urubuga rwa internet rufasha abantu kubona serivisi za leta mu buryo bworoshye bakoresheje ikoranabuhanga.

Irembo ni urubuga rukoreshwa n’abasaga miliyoni umunani aho bagerwaho na serivisi zirenga 98 binyuze ku ba-agents 4000 mu gihugu hose.

Uretse Irembo, Keza yakoze mu Mujyi wa Silicon Valley-California nk’ushinzwe Ikoranabuhanga ryo gukora porogaramu zitandukanye muri Google, Delphix na Oracle.

Keza yasoje amasomo ye ya Kaminuza muri Massachusetts Institute of Technology (MIT) mu bijyanye n’amashanyarazi n’ikoranabuhanga rya mudasobwa (Electrical Engineering and Computer Science) no mu by’Ubukungu muri Sloan School of Management. Ubu ni umwe mu bagize Inama y’Ubutegetsi ya BNR n’iy’Ikigo cy’Igihugu cy’Iterambere (RDB).

Keza Faith ni we uyobora Irembo, serivisi yatangijwe n'Ikigo 'Rwanda Online Platform Ltd' ku bufatanye na Leta y'u Rwanda

-  Ivan Murenzi: Ni Umuyobozi Mukuru wungirije mu Kigo cy’Ibarurishamibare mu Rwanda (NISR) kuva tariki 5 Mata 2017. Ni umuhanga mu bijyanye n’imibare n’ubukungu uzobereye mu gukora ubushakashatsi, gukusanya amakuru no kuyasesengura.

Yakoranye n’ibigo bitandukanye birimo icy’Igihugu giharanira kugeza Serivisi z’imari ku baturage, Access to Finance Rwanda (AFR) aho yagiye akora ubushakashatsi mu iterambere ryabyo.

Murenzi afite Impamyabumenyi y’Icyiciro cya Gatatu cya Kaminuza mu bijyanye n’Ubukungu yakuye muri Williams College iherereye muri Massachusetts.

Umuyobozi Mukuru wungirije mu Kigo cy’Ibarurishamibare mu Rwanda (NISR), Murenzi Ivan

-  Rugwabiza Léonard: Ni Umujyanama mu by’Ubukungu muri Minisiteri y’Imari n’Igenamigambi. Yanabaye Umuyobozi Mukuru ushinzwe Ubukungu muri Minisiteri y’Imari n’Igenamigambi kuva mu 2015.

Rugwabiza yanahawe inshingano z’Umuyobozi Mukuru ushinzwe Igenamigambi n’Ubushakashatsi muri Minisiteri y’Imari n’Igenamigambi. Yamaze kandi imyaka ibiri ashinzwe ubukungu muri Banki Nyafurika Itsura Amajyambere, BAD.

Yabaye Umuyobozi ushinzwe Agashami k’Igenamigambi muri Minisiteri y’Imari n’Igenamigambi, agira uruhare kandi mu icurwa n’ishyirwaho rya zimwe muri gahunda z’ubukungu bw’u Rwanda.

Umujyanama mu by’Ubukungu muri Minisiteri y’Imari n’Igenamigambi, Rugwabiza Léonard

-  Murangwa Ndangiza Hadidja: Ni inzobere mu by’Imisoro n’Amategeko, akaba afite ubumenyi mu bijyanye n’ubujyanama mu by’imisoro. Ni umwe mu bagize inama y’Ikigo Mpuzamahanga cy’Ubukemurampaka cya Kigali (KIAC), akaba afite ubunararibonye yavanye mu kigo, The Chartered Institute of Arbitration cyo mu Bwongeza.

Mu byo yakoze harimo gutanga ubujyanama mu by’imisoro n’amategeko mu bigo bya leta n’iby’abikorera.

Yagiye kandi agaragara muri gahunda zerekeranye n’imisoro n’ibindi byose byatewe inkunga na Guverinoma y’u Rwanda, GIZ, Ikigega cy’Imari cya Banki y’Isi gifasha abikorera na Banki y’Isi.

Yabaye Umujyanama mu by’Amategeko muri IFC, umushinga wo gusoresha muri EAC, Umujyanama Mukuru mu by’Amategeko muri GIZ, akora muri TradeMark East Africa, muri African Tax Administration Forum (ATAF) no mu Kigo gishinzwe guteza imbere Umwuga w’Ibaruramari mu Rwanda (iCPAR).

Murangwa Ndangiza yabaye kandi mu nama z’ubutegetsi z’ibigo bitandukanye birimo icy’Ubwishingizi cya Gisirikare (MMI), icy’Igihugu cy’Iterambere (RDB) n’igishinzwe Ubuzima mu Rwanda (RBC).

Murangwa Ndangiza Hadidja ari mu ntiti zishinzwe ubusugire bw’ifaranga ry’u Rwanda

-  Chantal Habiyakare: Ni Umuyobozi Mukuru ushinzwe kugenzura Umutungo muri RwandAir Ltd kuva muri Kanama 2011.

Afite Impamyabumenyi mu by’Ubucuruzi n’Imari yavanye muri Kaminuza ya Concordia muri Canada, akaba yaranize amasomo ajyanye no kugenzura no gucunga umutungo.

Habiyakare amaze imyaka irenga 15 akora mu bijyanye no kugenzura imitungo, ubumenyi yavanye muri Canada na (ICPAR) mu Rwanda.

Yakoze mu myanya itandukanye yo gucunga imitungo harimo ibigo nka Fuller Landau LLP muri Canada na KPS cyo mu Rwanda.

Afite kandi ubumenyi buhambaye mu bijyanye n’icungamutungo, gutegura ubucuruzi n’ibindi harimo nko gukora igenamigambi rya banki, ibigo bikora ingendo zo mu kirere, iby’itumanaho, ibitaro, imiryango itari iya leta n’ahandi. Avuga neza Icyongereza, Igifaransa n’Ikinyarwanda.

Umuyobozi Mukuru ushinzwe kugenzura Umutungo muri RwandAir Ltd, Chantal Habiyakare
Intiti umunani zishinzwe ubusugire bw’ifaranga ry’u Rwanda. Bose uko ari umunani bari mu bagize Inama y'Ubutegetsi ya Banki Nkuru y'Igihugu (BNR)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza