Leta igiye gushora miliyari 23 Frw mu kongerera ubushobozi BRD

Yanditswe na Habimana James
Kuya 20 Gicurasi 2019 saa 11:08
Yasuwe :
0 0

Minisiteri y’imari n’igenamigambi (MINECOFIN) yatangaje ko gahunda yo kuvugurura Banki Itsura Amajyambere y’u Rwanda (BRD), kugira ngo hongerwe ubushobozi bw’iyi banki bwo gufasha muri gahunda za leta zigamije iterambere.

Mu myaka itatu iri imbere, hazashyirwamo miliyari 23 zigamije kuvugura iyi banki, leta ifitemo imigabane myinshi.

Mu ngengo y’imari 2019-2020 izatangira muri Nyakanga uyu mwaka, leta izashyiramo miliyari 10 nk’uko Minisiteri y’imari n’igenamigambi Dr Uzziel Ndagijimana yabibwiye The New Times.

Yavuze ko leta yahisemo kuvugurura BRD kugira ngo ikomeze kugira uruhare mu iterambere ry’urwego rw’abikorera bityo rurusheho kuba umusemburo w’iterambere.

Minisitiri Ndagijimana yavuze ko BRD iri mu mavugurura mashya, ikaba ari yo mpamvu irimo kongerwamo amafaranga.

Yagize ati “BRD iri mu nzira z’amavugurura. Mu bihe byashize iyi banki yashyize imbaraga mu kugabanya amadeni yari ifite, leta ikaba izagenda iyifasha mu bihe bitandukanye ikoresheje ingengo y’imari yayo.”

Yavuze kandi ko muri aya mavugurura agiye kuba muri BRD, vuba aha leta izatangaza inama y’ubutegetsi nshya nyuma yo gutora umuyobozi mukuru mushya n’ushinzwe ibikorwa.

Iki cyemezo cya leta cyo gufasha BRD biri mu rwego rwo kuyiha imbaraga ngo ikomeze gufasha inzego zitandukanye zirimo iz’ubuhinzi, inganda, ubwubatsi, ibyoherezwa mu mahanga n’ibindi.

Mu gihembwe cya gatatu cy’umwaka wa 2018, ibikorwa bya BRD byari miliyari 229.6 Frw n’umutungo wa miliyari 62.2 Frw.

Aya mafaranga azashyirwa muri BRD ngo azayifasha kandi kuva mu gihombo cya miliyari 5 z’amafaranga yari ifite.

Raporo ya BRD y’umwaka wa 2017, igaragaza ko leta y’u Rwanda n’Ikigo cy’Ubwiteganyirize mu Rwanda (RSSB), byashyizemo miliyari 35 yari agamije gutuma iyi banki ikomeza gukora neza mu gihe izashaka indi mari ahandi nyuma ya 2018.

Gusa hashingiwe kuri raporo ya 2017, ni uko ubucuruzi bw’iyi banki bwari ku rwego rutari rwiza.

BRD yagaragaje ugusubira inyuma mu kwinjiza amafaranga aho yabonaga inyungu nto n’igabanyuka ry’ibyavaga mu ishoramari no kuba itaragaruzaga inguzanyo.

Mu mpera za 2017 iyi banki yari imaze guhomba miliyari 11.1

Ubu igikomeje kwibazwa ni ukumenya niba aya mafaranga ashyizwemo azafasha uru rwego rw’imari gukomeza gukora inshingano rufite zo guteza imbere igihugu.

Izi nshingano ni ugutanga inguzanyo y’igihe kirekire hagamijwe guteza imbere ubukungu bw’u Rwanda, biciye mu guteza imbere ibyoherezwa mu mahanga, kubagabanya ibizanwa mu gihugu, guhanga imirimo, kubaka inzu zihendutse, kongera amashanyarazi akagera kuri bose n’ibindi.

Umuyobozi Mukuru w’Ikigo cy’Imari n’Imigabane mu Rwanda (RSE), Pierre Célestin Rwabukumba we yagize ati “Intego nyamukuru za BRD ni iterambere ariko ushobora kubona inyungu kandi ugafasha n’ibikorwa by’iterambere, gutera imbere rero bizashingira ku buryo bazahuza ibi bintu bibiri ariko bakanareba ibyagenze nabi mu bijyanye n’imicungire.”

BRD yagiye ikora ibikorwa by’ishoramari bitandukanye mu bigo byigenga kuko mu mwaka wa 2018, uru rwego rwari rufite ibikorwa by’ishoramari bifite agaciro ka miliyari 14.7 mu bigo by’imbere mu gihugu byigenga.

Ifite ibikorwa byayo mu bigo nka Trust Industries Ltd, Kinazi Cassava Plant, Development Fund, Great Lakes Cement Company, Eastern Province Investment Company, na Rwanda Enterprise Investment Company.

Ishoramari muri ibi bigo rihagaze kuri miliyari 9.2 ariko ngo imyinshi muri iyi mishinga ifite ibibazo.

Umuyobozi Mukuru wa BRD, Eric Rutabana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza