Koperative zasabwe guhashya imikorere mibi kugira ngo zirushesho gutanga umusaruro

Yanditswe na Akayezu Jean de Dieu
Kuya 6 Nyakanga 2019 saa 09:30
Yasuwe :
0 0

Abanyamuryango n’abayobora amakoperative atandukanye hirya no hino mu gihugu basabwe kwimakaza ireme no gutanga serivizi zinoze hibandwa ku kuzamura imibereho y’abanyamuryango kugira ngo umusaruro wazo mu iterambere wiyongere.

Byagarutsweho kuri uyu wa Gatandatu tariki 6 Nyakanga 2019 mu Murenge wa Rugarama, Akarere ka Gatsibo, mu birori byo kwizihiza Umunsi Mpuzamahanga wahariwe Amakoperative. Ni umunsi wizihijwe ku nshuro ya 15 mu Rwanda, naho ku rwego rw’Isi watangiye kwizihizwa mu 1923.

Guverineri w’Intara y’Iburasirazuba, Mufulukye Fred, yavuze ko kwizihiza uyu munsi bije mu gihe u Rwanda rwizihiza isabukuru y’imyaka 25 u Rwanda rubohowe na FPR Inkotanyi yakuye u Rwanda n’Abanyarwanda ku ngoyi y’ubutegetsi bubi bwaranzwe n’ivangura bukarugeza kuri Jenoside yakorewe Abatutsi.

Insanganyamatsiko y’uyu mwaka igira iti ‘Koperative; Umurimo Unoze’.

Mufulukye yavuze ko Leta y’u Rwanda ikomeje gukangurira Abanyarwanda b’ingeri zose gushyira hamwe muri za koperative zikora neza kandi zunguka zikungukira abanyamuryango bose n’igihugu muri rusange.

Yakomeje agira ati “Gukorera muri koperative ni inzira nziza yo kunoza umurimo kuko niba koperative ihuza abantu benshi nta kabuza ko bahuje imbaraga n’ibitekerezo by’ibyo bakora, koperative zagera ku bikorwa by’indashyikirwa tukaba tubasaba mwese gukorera muri koperative.”

Guverineri Mufulukye yavuze ko n’ubwo hari byinshi byo kwishimira byagezweho mu rwego rw’amakoperative mu Rwanda hakiri ibyo kunozwa, asaba abayobora amakoperative guharanira kwimakaza ireme ry’ibyo bakora, gutanga serivisi inoze no kunoza imicungire yayo.

Yagize ati “Koperative zigomba gufata iya mbere mu kwimakaza ireme ry’ibyo zikora zitanga serivisi inoze. Uyu munsi ni umwanya mwiza wo kongera kwitekerezaho no gutekereza ku gikorwa koperative yiyemeje gukora ndetse bakanatekereza akamaro gifitiye abanyamuryango mu kuzamura imibereho yabo n’iterambere ry’igihugu.”

Imibare y’Ikigo cy’Igihugu Gishinzwe Guteza Imbere Amakoperative, RCA, igaragaza ko kugeza ubu mu Rwanda habarurwa koperative 9706, zikorera mu nzego zitandukanye z’ubukungu aho agizwe n’abanyamuryango basaga miliyoni eshanu. Aya makoperative afite umugabane shingiro ungana na miliyari 47 Frw.

Mu Rwanda kandi hari amakoperative yo kuzigama no kugurizanya agera kuri 447, arimo 416 ya Umurenge Sacco. Yose hamwe afite abanyamuryango bakabakaba miliyoni eshatu, bafite ubwizigame bungana na miliyari 70 Frw.

Mu myaka itanu ishize aya makoperative yose amaze gutanga inguzanyo ingana na miliyari 296 Frw.

Umuyobozi Mukuru w’Ikigo cy’Igihugu gishinzwe guteza Imbere Amakoperative, RCA, Prof. Harerimana Jean Bosco, yavuze ko hari byinshi bishimira kuri uyu munsi ariko ko hari byinshi byo gushyiramo imbaraga kandi biteguye kubigeraho bafatanyije.

Yagize ati “Haracyari byinshi byo gushyiramo imbaraga birimo kunoza imiyoborere, icungamutungo, kurwanya ba bihemu, kwinjiza ikoranabuhanga mu makoperative, gutoza abanyamuryango inyungu zo kwigira no kugira koperative iyabo.”

Yakomeje agira ati “Ibi byose kimwe n’ibindi nibyo bizatuma umurimo unoga ariko na bwa bushomeri buranduka burundu kuko koperative bizwi ko ari inzira yo gutanga akazi.”

Prof. Harerimana avuga ko ibi byose bizagerwaho habayeho ubufatanye n’inzego zitandukanye zirebwa n’iterambere ry’amakoperative.

Mu Karere ka Gastibo hizihirijwe, Umunsi Mpuzamahanga w’Amakoperative, habarurwa amakoperative 251, afite abanyamuryango basaga ibihumbi 21.

Umuyobozi w’Akarere ka Gatsibo, Gasana Richard, yavuze ko abari muri aya makoperative bose nta n’umwe uri mu cyiciro cya mbere cy’ubudehe kandi na bake bari mu cya kabiri bagenda batera imbere ku buryo mu minsi iri imbere bazagenda bazamuka.

Ubwo hizihizwaga uyu munsi mu birori byabereye mu Murenge wa Rugarama, hanatanzwe ibihembo kuri koperative zabaye indashyikirwa mu gihugu hose mu guteza imbere abanyamuryango bazo.

Hahembwe Koperative y’Abahinzi ba Kawa mu Ntara y’Amajyaruguru, Abakundakawa, Koperative y’Abagore baboha agaseke, AGASEKE Kiziguro, Koperative y’abatwara ibintu mu modoka nini ikorera mu Karere ka Kicukiro, COTRAMACK, Koperative y’Abahinzi b’Umuceri mu karere ka Gatsibo, Coproriz-Ntende n’izindi.

Guverineri w’Intara y’Iburasirazuba, Mufulukye Fred, yasabye abayobora amakoperative kwimakaza ireme ry'ibyo bakora no gutanga serivisi inoze
Guverineri w’Intara y’Iburasirazuba, Mufulukye Fred, asobanuza ibikorwa by'umwe mu baje kumurika
Guverineri Mufulukye ashyikiriza igikombe Umuyobozi wa Koperative COPRORIZ Ntende, Rugwizangoga Elise
Prof. Harerimana ashyikiriza igihembo Umuyobozi wa Koperative Abakunda Kawa
Habaye imurikabikorwa amakoperative yo muri Gatsibo agaragaza ibikorwa byayo
Hanakozwe akarasisi ko kwishimira ibyiza byo gukorera muri koperative
Abahawe ibihembo byo kuba indashyikirwa bafashe ifoto n'abayobozi
Abanyamuryango ba Coproriz Ntende (Cooperative de Promotion des Riziculteurs de Ntende) babyinnye intsinzi
Abanyamuryango ba koperative bafite akanyamuneza bishimira ibyiza bagezeho
Abayobozi batandukanye basuye ibikorwa bya Koperative y’abatwara ibintu mu modoka nini ikorera mu Karere ka Kicukiro, COTRAMAVK
Abayobozi batandukanye basuye ibikorwa bya koperative zikorera mu Karere ka Gatsibo
Bagize n'umwanya wo gucinya akadiho basingiza ibyiza byo gukorera muri koperative
Gatsibo ifite koperative zikora ibikorwa bitandukanye
Hotel y'inyenyeri ebyiri yubatswe n'abanyamuryango ba Koperative COPRORIZ Ntende, ikorera mu Murenge wa Rugarama mu Karere ka Gatsibo
Imashini itunganya umutobe yari mu imurikabikorwa ryateguwe ku munsi wahariwe amakoperative
Kawa nayo yamuritswe ku Munsi Mpuzamahanga w'amakoperative
Koperative y'abagore baboha uduseke ni imwe mu zimaze kubaka ubushobozi bw'abanyamuryango bayo muri Gatsibo
Ubwiza bwa hotel yubatswe na Koperative COPRORIZ Ntende
Umuyobozi Mukuru w’Ikigo cy’Igihugu gishinzwe guteza Imbere Amakoperative, RCA, Prof. Harerimana Jean Bosco, yasabye ubufatanye bw'inzego mu gukomeza guteza imbere abanyamuryango b'amakoperative
Umuyobozi w’Akarere ka Gatsibo, Gasana Richard, yavuze ko abaturage baba muri koperative nta n'umwe uri mu cyiciro cya mbere cy'ubudehe
Umuyobozi w’Ingabo zikorera mu Karere ka Gatsibo na Nyagatare, Lt Col Gakuba asuhuza abahagarariye amakoperative n'abanyamuryango bayo bitabiriye Umunsi w'Amakoperative

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza