00:00:00 IGIHE NETWORK KN KINYARWANDA EN ENGLISH FR FRANCAIS

Kirehe: Abahinze ’hibiscus tea’ bakayiburira isoko baratabaza

Yanditswe na Hakizimana Jean Paul
Kuya 17 June 2022 saa 09:35
Yasuwe :

Abaturage bo mu Karere ka Kirehe bahinze ibihingwa bita imizabibu (hibiscus tea) barasaba leta kubafasha kubona isoko nyuma y’aho rwiyemezamirimo wabizezaga kuyibaguria ku giciro cyiza abatengushye.

Mu 2018 nibwo abaturage benshi bo mu Murenge wa Gahara batangiye gushishikarizwa guhinga ibyo bihingwa babibwirwa n’umugabo witwa Rubanguka Pascal wavugaga ko ahagarariye sosiyete izajya iyigura, ni ubutumwa ngo yagiye acisha mu nteko z’abaturage bituma benshi mu baturage batangira kuyihinga ku bwinshi.

Bamwe mu baturage bo mu Murenge wa Gahara baganiriye na IGIHE bavuze ko hari abahise babihinga ku buso bunini aho hari nk’abayihinze kuri hegitari zirenga ebyiri, abandi bagenda bayihinga nibura kuri hegitari imwe kuko ngo bari bijejwe isoko.

Habimana Jean Bosco utuye mu Mudugudu wa Susuruka mu Kagari ka Nyakagezi mu Murenge wa Gahara, ni umwe mu bari babihinze kuri hegitari imwe n’igice yejeje ubwa mbere abura isoko ahitamo kuyihinga ku gice cya hegitari kuri ubu.

Yagize ati “Twebwe dutangira guhinga izi mbuto batubwiraga ko ikilo bazajya baduhera 8000 Frw bituma tuyihinga ku bwinshi kuko twumvaga amafaranga ari menshi, byatumye tutihingira imyaka isanzwe nk’ibigori cyangwa ibishyimbo, ibyo twari twijejwe rero ntibyakunze kuko iya mbere yareze ntitwabona isoko.”

Habimana yavuze ko beza bwa mbere byari muri COVID-19 ikilo ngo cyari 8000 Frw cyaragabanutse cyane bagurirwa ku mafaranga 70 ku kilo, yavuze ko ibi byahise bibatera ibihombo ngo kuko bashoyemo abakozi benshi bizeye inyungu.

Ndayizeye Straton wari wahinze kuri hegitari ebyiri n’igice we yavuze ko yatunguwe n’uburyo yari aziko ikilo ari 8000 Frw akaza kugurirwa ku mafaranga 70, ibi ngo byagize ingaruka ku muryango we ngo kuko isambu yari guhingamo imyaka ibatunga yashyizemo ibyo bihingwa.

Ati “Njye nasaruye toni ebyiri n’ibiro 476 bampera kuri 70 Frw kandi nari narashoyemo abakozi, ubwo butaka nayihinzeho nari naracukuye imyobo ngiye guteramo insina za Fiya nshyiramo n’ifumbire, uwo mugabo araza ambwira ko izo nsina zitazampa inyungu nk’uko nahinga ’hibiscus tea’, yahise amfasha dusiba ya myobo dutera ’hibiscus tea’ ayingurira kuri make mba mpuye n’igihombo giteye ubwoba.”

Rubanguka Pascal ushinjwa n’abaturage kubagurira ku giciro gito we bihakanye akavuga ko abo agurira ku mafaranga make ari abamuzanira imbuto zitumye kandi ikirimo imbuto. Yavuze ko ubusanzwe ikilo akigurira abaturage ku 2500 Frw na we akayigemura i Kigali.

Yavuze ko kuri ubu afite abaturage 16 bazihinga kinyamwuga bo mu Karere ka Kirehe mu gihe abandi ngo bagenda bayihinga ku buso buto buto kandi ngo bose arayibagurira.

Umuyobozi w’Akarere ka Kirehe wungirije ushinzwe iterambere ry’ubukungu,Nzirabatinya Modeste, yabwiye IGIHE ko bagiye gukorera aba baturage ubuvugizi banaganire na rwiyemezamirimo wabahaye imbuto ngo ku buryo iki kibazo gikemuka mu maguru mashya.

Yavuze ko kandi nubwo uwo rwiyemezamirimo atabagurira ku giciro cyiza bashobora kwifashisha uruganda rukora imibavu rubarizwa muri aka Karere rukaba rwayigura.

Kuri ubu hari abahinze hibiscus tea baziburiye isoko
Habimana ni umwe mu bahinze hibiscus tea kuri hegitari imwe n'igice ariko ayiburira isoko
Ndayizeye avuga ko ubutaka yari afite bungana na hegitari ebyiri n'igice yabuhinzeho yizeye kuzabona isoko ariko biramuhombera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .