KCB na UoK byinjiye mu bufatanye bwo gufasha abanyeshuri kwimenyereza umwuga

Yanditswe na Ishimwe Israel
Kuya 18 Kamena 2019 saa 05:18
Yasuwe :
0 0

Banki y’Ubucuruzi ya KCB Bank Rwanda Plc yasinye amasezerano na Kaminuza ya Kigali (UoK) azafasha abanyeshuri bayo kubona aho kwimenyerereza umwuga mu kubategurira kuba abakozi bahatana ku isoko ry’umurimo mu Rwanda no mu Karere ka Afurika y’Uburasirazuba.

Aya masezerano yashyiriweho umukono muri UoK, kuri uyu wa 18 Kamena 2019, nyuma yo kuganirizwa icyerekezo cy’iterambere ry’imari ryiganjemo imikoreshereze y’ikoranabuhanga.

Imikoranire hagati y’impande zombi iri mu cyerekezo cya KCB cyo guha ubushobozi urubyiruko no guteza imbere sosiyete muri rusange.

KCB iteganya gukorana na kaminuza zo mu Rwanda mu gufasha abanyeshuri bazo kwimenyereza umwuga binyuze muri serivisi itanga, yatangiriye kuri UoK.

Umuyobozi ushinzwe Iyamamazabikorwa n’Itumanaho muri KCB, Akimanzi Albert, yavuze ko bishimiye gukorana na UoK mu gutegura neza ahazaza h’abanyeshuri.

Yagize ati “Twizeye ko nimuhabwa (abanyeshuri) umwanya muzakorana imbaraga. KCB ifite umwanya wanyu waba wiga ubukungu, ikoranabuhanga n’ibindi. Ni intangiriro ariko turashaka kubona abanyeshuri baza bimenyereza bagahabwa imirimo kandi ni yo ntego. Turashaka gutanga umusanzu wacu mu iterambere ry’ubukungu.’’

Mu bakozi ba KCB, abagera kuri 50% ni abayobozi bakuru muri banki batangiye ari abakozi bato, ariko ubu bagiriwe icyizere cyo kuyobora amashami.

Yakomeje abwira abanyeshuri ko “Namwe muzagera kure, icyo mukeneye ni ukugira imyitwarire myiza. Dufite ubushake bwo guteza imbere gahunda zizamura urubyiruko n’umuryango muri rusange mu cyerekezo kizima.’’

Gahunda ya KCB yo kwimenyereza umwuga ni igikorwa kigamije gushyigikira urugendo rw’igihugu rwo kubaka ubushobozi bw’abagituye binyuze mu guha abanyeshuri umwanya wo kugaragaza ibyo bashoboye.

Umuyobozi wungirije wa Kaminuza ya Kigali, Prof. Abraham Waithima, yashimye gahunda ya KCB avuga ko izafasha abanyeshuri gusoza amasomo bafite ubumenyi bukenewe ku isoko ry’umurimo.

Yagize ati “Ni amahirwe ku banyeshuri bacu bitegura kujya mu mirimo. Nibazava muri kaminuza bazaba bafite ubumenyi buhagije bwaba ubwo bahawe muri kaminuza nubwo bakuye muri KCB.’’

Yagize ati “Dukeneye gukorana n’urwego rw’abikorera kandi ntibyagerwaho tudasohora abanyeshuri bafite ubumenyi bukenewe ku isoko ry’umurimo. Amakosa twakoze dutangira akazi ntakwiye gusubirwamo n’abanyeshuri bacu, niyo mpamvu tubatekerezaho iteka.”

Abanyeshuri bitabiriye isinywa ry’aya masezerano bahanuwe kutarangamira amasomo bahabwa mu ishuri, ahubwo bakanagerageza gushaka ubundi bumenyi bakuye kuri internet bakabubyaza umusaruro.

Mu biganiro bahawe basangijwe uko ikoranabuhanga ryahinduye imikorere y’amabanki kuva ku guhererekanya amafaranga, gusaba inguzanyo, kubitsa no kubikuza amafaranga byose bisigaye bikorerwa kuri telefoni.

KCB yatangiye gukorera mu Rwanda mu Ukuboza 2008, ifite amashami atandukanye mu gihugu. Yagize uruhare mu bikorwa byinshi bifitiye inyungu abaturage birimo uburezi, kurengera ibidukikije no gufasha abantu kwiteza imbere.

Ibicishije muri gahunda ya “Igire”, yatangiye kurihira ishuri urubyiruko 200 no kurufasha kwihangira imirimo. Ruzigishwa imyuga itandukanye irimo gusudira, kubaka, gutwara imodoka n’ibindi mu gihe cy’amezi atandatu, iyi gahunda ikazatwara miliyoni 100 Frw.

Abanyeshuri baganirijwe ku iterambere ry'urwego rw'imari bijyanye n'ikoranabuhanga ryashinze imizi
Abatanze ikiganiro basangije abanyeshuri uko bakwiye kwigirira icyizere mu gutegura ahazaza habo
Abanyeshuri bahawe umwanya wo kubaza ibibazo bitandukanye
Umuyobozi ushinzwe Iyamamazabikorwa n’Itumanaho muri KCB, Akimanzi Albert (iburyo) n'Umuyobozi wungirije wa Kaminuza ya Kigali, Prof. Abraham Waithima, bashyira umukono ku masezerano
Banki y'ubucuruzi ya KCB na Kaminuza ya Kigali byinjiye mu bufatanye bwo gufasha abanyeshuri kwimenyereza umwuga
Nyuma yo gsusinya amasezerano hafashwe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza