Isura y’ubworozi bw’inkoko nyuma y’imyaka isaga 70 bumaze mu Rwanda

Yanditswe na Akayezu Jean de Dieu
Kuya 1 Ukwakira 2019 saa 05:28
Yasuwe :
0 0

Kuva mu myaka ya 1940, ubworozi bw’inkoko bwatangiye kugaragara mu rwa Gasabo ariko uburyo bwakorwagamo bwari gakondo ndetse mu myaka 10 ishize aborozi b’inkoko ntibari bazi ko umuntu ashobora korora inkoko zikamubyarira inyungu.

Politiki y’igihugu y’ubuhinzi n’ubworozi yashyize imbere ubworozi bw’amatungo magufi arimo inkoko, kugira abakora muri ubwo bworozi babashe kwiteza imbere kandi babubonemo umusaruro.

Mu ruzinduko aherutse kugirira mu Karere ka Rulindo, Minisitiri w’Intebe w’u Rwanda, Dr Ngirente Edouard yasuye ibikorwa birimo koperative y’aborozi b’inkoko iri ahitwa mu Kinini mu Murenge wa Mbogo.

Abagize iyi koperative bamubwiye ko bafite izigera ku 46 000 zitanga umusaruro w’amagi agera ku bihumbi 30 ku munsi, aho bayagemura ku masoko yo mu Rwanda no muri Repubulika Iharanira Demukarasi ya Congo.

Imibare y’Ikigo cy’Igihugu gishinzwe guteza imbere Ubuhinzi n’Ubworozi, RAB, igaragaza mu Rwanda habarurwa inkoko zigera kuri miliyoni esheshatu zirimo amoko y’izitanga inyama, izitanga amagi [nazo zirimo amoko atandukanye] n’izindi.

RAB ivuga ko mu myaka icumi ishize umusaruro w’ibikomoka ku nkoko birimo amagi n’inyama wiyongereye aho nk’amagi yari toni ibihumbi bitanu mu gihe kuri ubu amagi asigaye asarurwa ku mwaka angana na toni ibihumbi 40.

Ni mu gihe umusaruro w’amagi wavuye kuri toni 3000 ugera kuri toni 8500. Nibura 30% by’uyu musaruro byoherezwa ku isoko ryo hanze mu gihe 70% ari ugurishwa imbere mu gihugu.

Kuva kuri uyu wa Kabiri mu Rwanda hatangiye Inama Mpuzamahanga yiga ku iterambere ry’ubworozi bw’inkoko no kongera umusaruro w’ibikomoka ku nkoko. Iyi nama yahujwe n’imurikabikorwa ry’ibikomoka ku nkoko.

Iyi nama y’iminsi ibiri ihurije hamwe impuguke mu bworozi bw’inkoko ziturutse mu bihugu 40 byo hirya no hino ku Isi, mu gihe abamurika bo bagera ku 130.

Umuyobozi w’Ishami ry’Ubworozi, ubushakashatsi no gusakaza ibyavuye mu bushakashatsi muri RAB, Dr Ndayisenga Fabrice yabwiye Radio Rwanda ko biteze kumurikira amahanga n’abashora imari intambwe u Rwanda rumaze gutera mu bworozi bw’inkoko n’amahirwe ahari ku bashobora kubenguka isoko ry’u Rwanda.

Ati “Turabamurikira intambwe tumaze kugeraho kuko muri iyo myaka icumi twakubye inshuro zigera kuri enye umusaruro twari dufite nk’igihugu, ariko iyi nama turayungikiramo kuba abo bafatanyabikorwa baturutse mu bihugu bitandukanye turabereka amahirwe ahari mu bworozi bw’inkoko.”

Mu byakunze kugaragazwa n’aborozi b’inkoko, harimo ibiciro by’amagi bikiri hasi kandi ugasanga abayarangura bayagurisha ku giciro cyo hejuru. Hari kandi n’ibibazo cy’icyororo ndetse n’ibiryo by’inkoko bigoye kubona.

Dr Ndayisenga yagize ati “Icyo cyo cyavugutiwe umuti, politiki zose zagiyeho zaje zireba igikenewe cyose kugira ngo ubworozi bukorwe neza. Ahantu biva ni mu maturagiro aho leta yafashe iryo yari ifite iryegurira abikorera.”

“Hari n’andi maturagiro za Musanze, Gahanga na Bugesera, ni ibintu navuga ko mu myaka mike cyane byahise bishyirwamo ingufu ku buryo icyororo cyo nta kibazo gihari kandi n’ibijyanye n’ibiryo by’inkoko ubu twashyizemo imbaraga kuko hirya no hino mu gihugu dufite inganda zirindwi.”

Ku kijyanye n’ibiciro, Dr Ndayisenga yavuze ko hari abaza mu bumamyi ugasanga bagura amagi n’aborozi nyuma nabo bakajya kuyagurisha ku giciro cyo hejuru, ibintu yavuze ko leta yabihagurukiye.

Minisiteri y’Ubuhinzi n’Ubworozi itangaza ko u Rwanda ruzorora inkoko zisaga miliyoni 12 (2017-2024) hagamijwe kongera umubare w’amatungo no kuzamura toni z’inyama rubona ku mwaka.

Mu 2016 inkoko zo mu Rwanda zatangaga toni 30 000 z’inyama ku mwaka, mu gihe Guverinoma ifite intego ko mu myaka itanu kuva icyo gihe inkoko zizaba zitanga inyama zingana na toni 100 000 ku mwaka ngo zibashe guhaza isoko ry’imbere mu gihugu.

Aborozi b'Inkoko mu Murenge wa Mbogo mu Karere ka Rulindo bakomeje kongera umubare w'izo boroye
U Rwanda rufite inkoko zigera kuri miliyoni esheshatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza