00:00:00 IGIHE NETWORK KN KINYARWANDA EN ENGLISH FR FRANCAIS

Porogaramu yo korohereza imishinga mishya no kwagura isanzwe yabyaye ishoramari rya miliyari $1,2

Yanditswe na IGIHE
Kuya 17 January 2022 saa 10:14
Yasuwe :

Porogaramu yo korohereza abanyenganda yatangijwe na Guverinoma y’u Rwanda mu 2021 hagamijwe kuzahura ubukungu bwashegeshwe na Covid-19, yabyaye ishoramari rya miliyari 1,2 z’amadolari ya Amerika inatuma abashoramari bagera kuri 78 basaba gutangira ibikorwa cyangwa kwagura ibisanzwe bikora.

Iyi porogaramu yemejwe n’Inama y’Abaminisitiri yateranye mu Ukuboza 2020, itangira gushyirwa mu bikorwa mu 2021. Yari igamije gufasha mu izahurwa ry’ubukungu bwagizweho ingaruka na Covid-19 binyuze mu kugabanya imisoro ku bikoresho hagamijwe koroshya ikiguzi cy’ishoramari ku banyenganda bashya kimwe no ku bashaka kwagura ibikorwa byabo.

Iyi porogaramu yari igamije gukurura ishoramari rya miliyari 1 y’amadolari ariko imibare y’Urwego rw’Iterambere, RDB, igaragaza ko izarangira irengeje intego ho miliyoni 200 z’amadolari kandi igasiga imirimo igera ku 27.394 ihanzwe.

Inzego zibanzweho zirimo urw’inganda, ubwubatsi, guteza imbere ubwubatsi bw’amacumbi aciriritse n’inyubako z’ubucuruzi no gutunganya umusaruro ukomoka ku buhinzi bigaragara ko zifite ubushobozi bwo gukurura ishoramari ry’abikorera no guhanga umurirmo mu buryo bworoshye.

Ibigo ndetse n’ishoramari biri muri iyi porogaramu byemerewe kugura ibikoresho ku igabanywa ry’imisoro kugeza mu Ukuboza 2022 hashyirwa mu bikorwa imishinga izarangira mu Ukuboza 2023.

Umwanditsi Mukuru muri RDB, Louise Kanyonga, yatangarije The New Times dukesha iyi nkuru ko bakiriye ubusabe bw’abantu 78 baturutse mu bigo birimo ibitunganya umusaruro ukomoka ku buhinzi n’ubworozi, ubwubatsi n’inganda, imishinga 64 ikaba ari yo yatoranyijwe.

Mu mishanga yatoranyijwe harimo 14 y’ibigo bitunganya umusaruro ukomoka ku buhinzi n’ubworozi, 24 bikora ibijyanye n’ubwubatsi n’inganda 23.

RDB ivuga ko hari ibigo byamaze gutangira ibikorwa birimo Norrsken Rwanda Ltd, East African Bamboo na Landmark (Koza) mu gihe ibindi byiteguye gutangira.

Kayonga yavuze ko hashyizweho komisiyo igizwe n’abahagarariye inzego za leta barangajwe imbere na RDB na Minisiteri y’Imari n’Igenamigambi yahawe inshingano zo gukurikiranira hafi iyi porogaramu.

Iyi komisiyo ihura inshuro imwe mu byumweru bibiri igasuzuma imishinga n’ibikorwa by’abagenerwabikorwa basanzwe ikanareba uko inzitizi zibangamira ishyirwa mu bikorwa ry’imishinga yabo zakurwaho ku gihe.

Iyi oorogaramu kandi ngo izafasha mu kuziba icyuho cy’ibitumizwa mu mahanga kuko hari ibishobora gukorerwa imbere mu gihugu nyamara byajyaga bikurwa ahandi.

Mu bijyanye n’ubwubatsi bw’amacumbi aciriritse n’inzu z’ubucuruzi, imishinga yasabwaga kuba nibura ifite agaciro ka miliyoni 10 z’amadolari. Ibigo bigiye kubaka inganda nshya byasabwaga ishopramari rya miliyoni 1 y’amadolari naho ku bakora ibyo gutunganya umusaruro ukomoka ku buhinzi n’ubworozi basabwaga nibura igishoro cy’ibihumbi 100 by’amadolari.

Hari kandi gahunda y’ibigo bisanzwe byanditse bishaka kwagura ibikorwa byasabwaga kugaragaza ko bifite 20% by’ishoramari risanzwe cyangwa nibura miliyoni imwe y’amadolari.

Porogaramu ya leta yo korohereza imishinga igitangira gushyirwa mu bikorwa no kwagura isanzwe yabyaye ishoramari rya miliyari 1,2 z'amadolari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .