00:00:00 IGIHE NETWORK KN KINYARWANDA EN ENGLISH FR FRANCAIS

Ishoramari rishya mu Rwanda ryageze kuri miliyari $1,6 mu 2022

Yanditswe na Akayezu Jean de Dieu
Kuya 15 Mutarama 2023 saa 07:26
Yasuwe :

Umwaka wa 2022 wasize u Rwanda rwongeye kugaragaza icyizere cyo kwigobotora ingaruka z’icyorezo cya Covid-19, aho rwanditse ishoramari rishya rifite agaciro ka miliyari 1,6 z’Amadolari ya Amerika.

Ni imibare yagabanyutse kuko mu 2021, RDB yanditse ishoramari ringana na miliyari 3,7$, ari naryo rya mbere rinini ryanditswe mu Rwanda mu mwaka umwe.

Ryari rivuye kuri miliyari 1,3$ ryanditswe mu 2020, icyo gihe ishoramari rishya mu gihugu rikaba ryari ryagabanyutseho 47.1% ugereranyije n’umwaka wa 2019, kuko bwo ryari miliyari 2.46 z’Amadolari ya Amerika.

Icyizere cyo kongera kugira ubukungu buzamuka ku kigero gishimishije gishingirwa ku kuba u Rwanda rukomeza kwakira abashoramari bashya mu nzego zitandukanye zirimo ikoranabuhanga, inganda, ubucukuzi bw’amabuye y’agaciro, ubwubatsi, ubuvuzi n’izindi.

Imibare y’Urwego rw’Igihugu rw’Iterambere, RDB, yerekana ko kuva muri Mutarama kugeza mu Ukuboza 2022, handitwe ishoramari rishya rifite agaciro ka miliyari 1,6 z’amadolari ya Amerika.

Imishinga yanditswe irenga 103 irimo igikomeza ishingiye ahanini ku nganda nini, aho ku ikubitiro hari umushinga wo gutunganya Gaz Methane wa miliyoni $530 uzubakwa i Karongi.

Imishinga mishya yinjiye ku isoko ry’u Rwanda irimo uwa ARISE IIP [ARISE Integrated Industrial Platforms ] wo gutunganya no guteza imbere Icyanya cyahariwe lnganda cya Bugesera.

Hari kandi Ikigo KOKO Networks, cyashoye imari mu mushinga wo gukwirakwiza ingufu zisubira zikoreshwa mu guteka, hirya no hino mu gihugu.

Umushinga wa KOKO Networks ufite agaciro ka miliyoni $25 witezweho gufasha u Rwanda mu rugendo rwo kugeza ku banyarwanda bose ibicanwa bitangiza ibidukikije, bitarenze umwaka wa 2030.

Irindi shoramari ryanditswe mu Rwanda mu 2022, ni iry’Ikigo cy’Ishoramari mu by’Amahoteli, Kasada, cyegukanye Umubano Hotel iherereye ku Kacyiru mu Mujyi wa Kigali. Ni ikigo kizayishoramo miliyoni 30$ zizifashishwa mu kuyigira Mövenpick y’inyenyeri eshanu.

Hari kandi Ikigo Doğuş Group cyo muri Turikiya kigiye kubaka hoteli eshatu zigezweho mu Rwanda.

Ni mu gihe Televiziyo ya Bloomberg ifite icyicaro muri Leta Zunze Ubumwe za Amerika, yatangaje ko igiye gufungura Studio i Kigali muri gahunda yo kwagurira ibikorwa muri Afurika.

RDB kandi igaragaza ko kugeza mu Ugushyingo 2022, ibikorwa bishingiye ku bukerarugendo byari bimaze kwinjiza miliyoni $425,5 aho miliyoni $19,7 zinjijwe na Pariki y’Igihugu y’Ibirunga yonyine.

Ibindi bikorwa bishingiye ku bukerarugendo byazamuwe n’inama mpuzamahanga zigera ku 100 zitabiriwe n’abasaga ibihumbi 35 aho serivisi zizishamikiyeho zinjije miliyoni $62 zivuye kuri miliyoni $43 zateganywaga kwinjizwa.

Ni ibintu abaturage bavuga ko ari inyungu ikomeye ku bukungu bw’igihugu haba mu kongera ubumenyi, guhanga imirimo mishya no gutuma ubukungu bw’igihugu muri rusange butajegajega.

Hari ibituma ishoramari ryandikwa ryiyongera

Abikorera bo mu Rwanda bashimangira ko usibye umutekano igihugu gifite, koroherezwa mu gufungura ikigo cy’ubucuruzi n’ibindi nk’ikoranabuhanga, biri mu bituma abashoramari barushaho gukunda u Rwanda uko imyaka ishira.

Umuyobozi wa Mango 4G, Niyomugabo Eric yagize ati ‘"Buriya ikintu kijyanye n’ikoranabuhanga ni ngombwa mu bucuruzi nkeka ko uko n’ubundi dufite intego yo gukomeza kongera ibijyanye n’umuvuduko wa Internet numva ko uko ikoranabuhanga rigenda ryihuta rizagenda rifasha iterambere cyangwa se ubwihute mu bijyanye n’ishoramari.’"

Umusesenguzi muby’ubukungu, Manirakinga Manasseh yagize ati "Abantu bose umushoramari akeneye kugira ngo ishoramari rye rigende neza bakora neza, twareba amabanki, uburyo bwo kwinjira mu gihugu bworohejwe kubona visa, twareba uburyo bwo koherezanya amafaranga ava mu mahanga aza mu Rwanda.’"

‘"Niba dufite Visit Rwanda, abashoramari bamenya igihugu n’imiterere yacyo, bakajya ku mbuga bagahamagara bagenzi babo bo mu Rwanda bakora mu rwego rw’abikorera, bakabahamagara, niba Rwandair, itanahagaze ngira ngo urabizi ko dufite kuva mu Rwanda ugera mu Bwongereza, uziko nta handi uhagarara, ibyo bituma umushoramari abona ko azagera mu Rwanda nta handi ahagaze.’"

Gahunda yo kugira Kigali ihuriro mpuzamahanga rya serivisi z’imari yatangijwe mu mwaka ushize nayo yitezweho kugira byinshi ihindura bishingiye ku ishoramari rya miliyoni $100 yashowemo.

Abaturage bashimangira ko gukomeza kwakira abashoramari mu nzego zitandukanye ari inyungu kuri bo ndetse no ku bukungu bw’igihugu muri rusange.

Rugamba Yves yagize ati "Bifite akamaro kenshi kuko bitanga akazi, ikindi bikongera bigafasha ba rwiyemezamirimo baba barabuze igishoro bakongera bagakora ibikorwa by’ubucuruzi bwabo, ikindi cya gatatu bituma ibikorwa by’ishoramari biba bihari mu gihugu."

Mu 2022, abantu 1367 bimenyereza imirimo mu nzego zitandukanye babonye ibigo bibakira, ndetse ibigo by’imari bito n’ibiciriritse 5648 byongererwa ubumenyi, aho 82% byabyo byemerewe inguzanyo mu mabanki.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .