00:00:00 IGIHE NETWORK KN KINYARWANDA EN ENGLISH FR FRANCAIS

Icyafasha Afurika kurenga ingaruka z’intambara yo muri Ukraine mu mboni za Nsanzabaganwa

Yanditswe na Iradukunda Serge
Kuya 24 May 2022 saa 06:12
Yasuwe :

Umuyobozi wungirije wa Komisiyo y’Umuryango w’Ubumwe bwa Afurika, Monique Nsanzabaganwa yagaragaje ko kugira ngo uyu Mugabane wigobotore ibibazo by’ubukungu ushobora gusigirwa n’icyorezo cya COVID-19, hakenewe gufatwa ingamba zitandukanye zirimo guteza imbere urwego rw’inganda mu bihugu bya Afurika.

Ibi Nsanzabaganwa Monique yabigarutseho kuri uyu wa Kabiri tariki 24 Gicurasi 2022, ubwo hatangizwaga Inama Rusange ya 57 ya Banki Nyafurika Itsura Amajyambere (AfDB).

Iyi nama yateraniye i Accra muri Ghana yitabiriwe n’abayobozi batandukanye barimo Perezida w’iki gihugu, Nana Akufo-Addo, uwa Tanzania, Samia Suluhu Hassan, Minisitiri w’Intebe w’u Rwanda, Dr. Edouard Ngirente n’Umuyobozi Mukuru wa AfDB, Akinwumi A. Adesina.

Iyi nama yagarutse ku ngaruka z’icyorezo cya COVID-19 muri Afurika n’uko uyu Mugabane uri kwigobotora ingaruka zacyo ndetse n’ibiri gukorwa kugira ngo uyu Mugabane ubashe guhangana n’ingaruka z’imihindagurikire y’ibihe.

Umuyobozi Mukuru wa AfDB, Akinwumi A. Adesina yavuze ko uyu munsi Afurika ihanganye n’ingaruka z’imihindagurikire y’ibihe kandi nyamara itagira uruhare rukomeye mu kohereza imyuka ihumanya ikirere.

Ati “Afurika niwo Mugabane wa mbere utagira uruhare rukomeye mu kohereza imyuka ihumanya ikirere kuko ifite 4% k’imyuka yose ihumanya yoherezwa mu kirere, ariko uyu Mugabane uhura n’ingaruka zikomeye z’ihindagurika ry’ikirere zirimo amapfa, inkubi z’imiyaga, imyuzure ndetse n’ubutayu.”

Yakomeje avuga ko buri mwaka Afurika ihomba miliyari z’Amadolari bitewe n’ingaruka z’imihindagurikire y’ibihe.

Ati “Ihindagurika ry’ibihe by’umwihariko ni inzitizi ku bukungu bw’ibihugu bya Afurika. Afurika ihomba miliyari 15$ buri mwaka bitewe n’imihindagurikire y’ibihe kandi aya biteganyijwe ko aziyongera akagera kuri miliyari 40$ buri mwaka kugera mu 2030. Afurika nta mahitamo ifite uretse guhangana n’ingaruka z’imihindagurikire y’ibihe itateje.”

Mu rwego rwo gufasha uyu Mugabane guhangana n’iki kibazo, Adesina yavuze ko Banki ya Afurika Itsura Amajyambare yakubye kabiri amafaranga igenera guhangana n’ingaruka z’ibihe agera kuri miliyari 25$ mu 2025.

Hari umuti w’ibibazo Afurika irimo

Monique Nsanzabaganwa wari uhagarariye Umuyobozi Mukuru wa Komisiyo y’Umuryango w’Ubumwe bwa Afurika, Moussa Faki Mahamat yagaragaje ko hejuru y’ibi bibazo by’imihindagurikire y’ibihe, Afurika inahanganye n’ingaruka zatewe na COVID-19 ndetse n’Intambara yo muri Ukraine.

Ati “Mbere yo gukomera kw’ibibazo by’u Burusiya na Ukraine, ubukungu bw’Umugabane wacu bwari mu nzira nziza buri kugenda burenga ingaruka za COVID-19 mu bijyanye n’imibereho n’ubukungu, aho byari biteganyijwe ko buzazamukaho 3,9% mu 2022.”

Yakomeje avuga ko ubu biri kugaragara ko Afurika izasubira hasi mu bijyanye n’ubukungu.

Ati “Kuri ubu biragaragara ko ibipimo by’ubukungu bwacu bizarushaho kujya hasi kandi ko Abanyafurika benshi bazasubira mu bukene bukomeye ndetse n’ibyo twagezeho mu ntego z’iterambere rirambye bizayoyoka.”

Nsanzabaganwa yavuze ko kugira ngo Afurika ihangane n’ibi bibazo hari ingamba zikwiriye gufatwa.

Ati “Guhangana n’ibi bizasaba gushyira imbere inzego z’ingenzi nk’ubuhinzi, inganda zitunganya ibikomoka ku buhinzi n’ubworozi ndetse n’urwego rwa serivisi no guhindura tukava ku gushingira cyane ku kohereza mu mahanga ibicuruzwa bitaranyuzwa mu nganda n’ibicuruzwa byakorewe mu nganda biva mu mahanga tujya mu kuba ibihungu bifite ubukungu bushingiye ku nganda birakenewe.”

Mu mboni ze, yemeza ko kugabanya amafaranga Afurika itakaza ku biribwa n’imiti bizafasha mu gihe ibihugu byo kuri uyu Mugabane bizaba byiyubakiye inganda zishobora kubitunganya.

Ati “Gukora ibikomoka ku biribwa imiti n’ibindi bicuruzwa byose nkenerwa byinjizwa mu gihugu buri mwaka bizadufasha gukoresha neza miliyari 110$ zagendaga mu gukura mu mahanga ibyo kurya ndetse miliyari 16$ zigenda mu kugura imiti n’ibikoresho byo kwa muganga.”

Muri iyi nama iri bubere i Accra muri Ghana, abagize Inama y’Ubutegetsi yayo baragaragaza ibikorwa bitandukanye yabashije kugeraho.

Biteganyijwe ko Minisitiri w’Intebe Ngirente, Perezida wa Ghana, Nana Akufo-Addo, uwa Tanzania, Samia Suluhu Hassan n’Umuyobozi Mukuru wa AfDB, Akinwumi A. Adesina bari butange ikiganiro kigaruka ku bibazo n’amahirwe Afurika ifite mu rugendo rw’iterambere ryayo.

Umuyobozi wungirije wa Komisiyo y’Umuryango w’Ubumwe bwa Afurika, Monique Nsanzabaganwa yagaragaje ko gushyira imbere ubuhinzi byafasha Afurika kurenga ibibazo by'ubukungu iri guhura nabyo
Umuyobozi Mukuru wa AfDB, Akinwumi A. Adesina yavuze ko uyu munsi Afurika ihanganye n’ingaruka z’imihindagurikire y’ibihe kandi nyamara itagira uruhare rukomeye mu kohereza imyuka ihumanya ikirere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .