Ingaruka zihariye COVID-19 imaze kugira ku bukungu bw’u Rwanda

Yanditswe na Rabbi Malo Umucunguzi
Kuya 8 Nzeri 2020 saa 07:24
Yasuwe :
0 0

Icyorezo cya COVID-19 kuva cyagera mu Rwanda muri Werurwe, ingaruka zacyo ni nyinshi uhereye ubwo igihugu cyose cyajyaga muri Guma mu Rugo, kugeza imirimo imwe n’imwe itangiye gukomorerwa, n’ubu imirimo yose ntirafungurwa ku buryo byaviriyemo benshi gutakaza akazi.

Mu gihembwe cya mbere uyu mwaka ubukungu bwazamutse kuri 3.6 ku ijana, nyamara mu gihe nk’icyo mu mwaka ushize bwazamutse 6.1 ku ijana, ndetse kubera icyorezo cya Coronavirus, byitezwe ko muri uyu mwaka buzazamuka kuri 2 ku ijana. Ni umubare uri hasi u Rwanda rwazaba rugize mu myaka 20 ishize.

Icyo gihe ubukungu buzaba buvuye ku izamuka rya 9.4 ku ijana ryabarwaga mu mwaka ushize, imibare ariko nayo ikomeza guhindagurika kuko nta we uzi igihe iki cyorezo cya COVID-19 kizamara n’ingaruka kizasiga mu buryo ntakuka.

Ubwo icyorezo cyazaga, ubukungu ahanini bwari bushingiye kuri serivisi (49%), ubuhinzi (24%) n’inganda (18%) turebye ku mibare ya 2019. Inzego za serivisi n’inganda zaribasiwe cyane, bituma ubushomeri bwiyongeraho 9%.

Raporo y’Ikigo cy’Ibarurishamibare iheruka kugaragaza ko muri Gicurasi 2020, igipimo cy’ubushomeri cyari 22.1%, aho abashomeri bageze ku 905,198 bavuye ku 536,714 babarwaga muri Gashyantare 2020, aho bari 13.1%.

U Rwanda rwitabaje inguzanyo

Ubwo icyorezo cya Coronavirus cyageraga mu Rwanda, cyahungabanyije ubukungu bw’u Rwanda mu buryo cyanahungabanyije ubw’ibindi bihugu.

Nubwo cyari ikibazo cy’ubuzima, COVID-19 yashegeshe ubukungu kubera ko hari igihe abantu bamaze badakora, hakongerwaho ko igihugu cyarimo gikoresha amafaranga menshi mu kwita ku banduye n’abari mu kato, kimwe n’ikiguzi kijyana no guhangana n’ingaruka za Coronavirus haba ku bukungu n’ubuzima bw’abaturage, nyamara nta mafaranga cyinjiza nk’ava mu misoro. Ibikoresho byo kwa muganga biri mu bicuruzwa byaguzwe hanze ku gipimo kiri hejuru.

Mu kugerageza kuziba icyuho cyari mu bucuruzi, hasigasirwa ko amafaranga igihugu gifite mu bwizigame adahungabanywa, cyifashishije inguzanyo nshya. Kimwe n’ibindi bihugu kandi, rwabaye ruhagarikiwe kwishyura inguzanyo zisanzwe, ngo rubashe kwita ku guhangana n’icyorezo.

Imibare ya Minisiteri y’Imari n’igenamigambi igaragaza ko kugeza mu mpera za 2019, u Rwanda rufite umwenda wa miliyari$ 5.28, uhwanye na 58.1% by’umusaruro mbumbe w’igihugu. Nibura 45.4% zari inguzanyo zaturutse mu mahanga, zirimo 82.3% zihendutse kandi z’igihe kirekire. Naho 12.7% wari umwenda w’imbere mu gihugu.

Ikigega Mpuzamahanga cy’Imari (IMF) cyahaye u Rwanda inguzanyo ya miliyoni 111.06 z’amadolari (akabakaba miliyari 105 Frw) yo gukoreshwa mu rwego rw’ubuzima no guhangana n’ingaruka Coronavirus, yiyongeraga ku yindi ingana na miliyoni $109.4 [miliyari 104 Frw] yari yatanze mu ntangiriro za Mata 2020.

Muri Nyakanga nabwo Banki Nyafurika Itsura Amajyambere, BAD, yahaye u Rwanda miliyoni 98 z’amadolari ya Amerika yo kwifashisha mu guhangana n’ingaruka za COVID-19, yatanzwe mu buryo bw’inguzanyo.

Minisiteri y’Imari n’Iganamigambi ivuga ko bijyanye n’ingaruka z’iki cyorezo, “izamuka mu byoherezwa mu mahanga ryagaragaye mu myaka ishize kimwe no mu gih cya vuba kubera Made in Rwanda, rizagirwaho ingaruka na Covid-19 mu 2020, rizongere kuzahuka nyuma yaho.”

Uretse ibyoherezwa mu mahanga, inyungu iva mu bukerarugendo bwari bukomeje kuzamuka cyane nibura ku mpuzandengo ya 9.0% ku mwaka hagati ya 2009 na 2019, ubu bwarahungabanye.

Ibyo bigahuzwa n’uko ubukerarugendo bushingiye ku nama, muri uyu mwaka zasubitswe ari nyinshi cyane, ku buryo izamuka ry’uru rwego muri uyu mwaka ruzaba –80 ku ijana, bikazafata umwanya ngo bisubire uko byahoze.

Urundi rwego rwahungabanye ni urw’amafaranga yinjira mu gihugu (remittances), muri uyu mwaka wagabanutseho -53.8 %, nyuma y’uko hagati ya 2018 na 2019 byari -0.5%. Mu nyaka y’imbere yaho byarazamukaga, nka 22.1% hagati ya 2017 na 2018, n’izamuka rya 24.1% hagati ya 2016 na 2017.

Minecofin ikomeza iti "Ishoramari rya leta rigamije kugera ku ntego za Gahunda y’Igihugu Igamije Kwihutisha Iterambere (NST1) ryzamuye ikinyuranyo cy’amafaranga yinjira n’asohoka mu myaka mike ishize, ariko icyorezo cya Covid-19 kizarushaho kukizamura ho 16.9 % ku musaruro mbumbe mu 2020 (bikava kuri 12.7 % mu 2019) bikazasubira ku murongo nyuma (12.0% mu 2022).”

“Isesengura ku myenda y’u Rwanda rigaragaza ko umwenda rufite nta kibazo uteje, nubwo mu buryo igihugu kiremerewe n’imyenda, rwavuye mu cyiciro cy’ibihugu bifite imyenda iri hasi rukajya mu bifite iringaniye bitewe n’icyorezo cya COVID-19.”

U Rwanda rwakomeje gufata ingamba

U Rwanda rwakomeje gufata ingamba zatuma ubuzima bukomeza mu bihe by’icyorezo, nubwo ibiciro ku isoko muri uyu mwaka byazamutse kuri 7.0 kugeza mu mpera za Nyakanga 2020. Byitezwe ko mu mpera z’uyu mwaka bishobora kuzazamukaho 6.7%, nyuma bikazasubira ku ntego ya 5% igihugu kitifuza kurenza.

Mu mu buryo amafaranga yakomeje gushyirwa mu bikorwa by’abikorera nk’urwego ruhanzwe amaso mu kuzahura ubukungu, yazamutseho 9.7 kugeza muri Kamena 2020, mu gihe mu Ukuboza 2019 habarwaga 12.6%.

Muri Werurwe uyu mwaka, Banki Nkuru y’u Rwanda yashyizeho inguzanyo y’ingoboka ya miliyari 50 Frw banki zakwiyambaza igihe zigize ikibazo cy’amafaranga. Igihe banki zishobora kumarana amafaranga zishobora kuguza nacyo cyarongerewe, kivanwa ku cyumweru kimwe kiba amezi 12.

Ibyo byanagendanye n’uburyo banki zakomeje kuvugurura inguzanyo ku bantu bazifashe, ariko ibikorwa byabo bigahungabanywa n’icyorezo cy COVID-19.

Nyuma hashyizweho ikigega kigamije kuzahura ubukungu cyatangiranye na miliyari 100 Frw zizagenda zongerwa, zigenewe uzahura ibikorwa by’ubukungu, zigatangwa binyuze mu mabanki, nubwo zicungwa na Banki Nkuru y’u Rwanda.

Kugeza ubu muri izo miliyari 100 hamaze gutangwa izirenga 20 Frw.

Guverineri wa Banki NKuru y’u Rwanda, John Rwangombwa, yabwiye itangazamakuru ko ubukungu bw’igihugu bukomeje kuzahuka gahoro gahoro, ugereranyije n’igihe ibintu byose mu gihugu byari byahagaze.

Ati “Iyo urebye ibikorwa by’ubukungu, twabonaga muri kuramo mu mezi ya Mata na Gicurasi muri uyu mwaka, ugereranyije n’ibihe nk’ibyo mu mwaka ushize. Muri Kamena twabonye ibikorwa by’ubukungu bizamuka ku 8.4 ku ijana. Ibyo biraduha icyizere ko ibikorwa byinshi by’ubukungu birimo kugenda bifungura imiryango.”

“Twabonye abantu bakeneye inguzanyo baza mu mabanki, ingendo z’indege z’ubucuruzi zirafungurwa, twizeye ko tuzabona imibare myiza ugereranyije n’iyo twabonaga mu gihembwe cya kabiri cy’uyu mwaka.”

Yavuze ko bishoboka cyane ko izamuka ry’ubukungu mu gihmbwe cya kabiri cy’uyu mwaka rizaba muri kuramo, ariko ugendeye ku bigaragara mu gihembwe cya gatatu n’icya kane, hari icyizere nubwo hkiri ikibazo mu rwego rwo kwakira abantu n’ubukerarugendo.

Abantu bose bagomba kugera mu rugo mbere ya saa moya, mu gukumira ikwirakwira rya Coronavirus. Ni mu gihe bari bageze ku rwego rwo gukangurirwa gukora amasaha 24 yose agize umunsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .