Indege nshya, ibyerekezo bishya: Imigambi yo kwaguka kwa RwandAir mu 2021

Yanditswe na Ferdinand Maniraguha
Kuya 25 Ugushyingo 2020 saa 05:29
Yasuwe :
0 0

Mu rwego rwo kurushaho kwagura ibikorwa byayo, Sosiyete Nyarwanda itwara abantu n’ibintu mu kirere, RwandAir, mu mwaka w’ingengo y’imari wa 2020/2021 irajwe ishinga no kongera umubare w’abagenzi itwara, kugura indege nshya no kwagura ibyerekezo ikoreramo.

Ni imwe mu mihigo ya RwandAir mu gusubukura no kuzahura ubukungu bwazahajwe n’icyorezo cya Coronavirus, cyatumye ingendo zayo zihagarikwa mu gihe cy’amezi atanu guhera muri Werurwe kugeza muri Kanama 2020.

Mu mihigo Minisiteri y’Ibikorwa Remezo iherutse gusinya y’ibyo izageraho mu mwaka w’ingengo y’imari wa 2020/2021, harimo kwagura no gufasha RwandAir gutera imbere.

Muri iyo mihigo, harimo ko RwandAir yiteguye ko umwaka uzashira abagenzi itwara ku mwaka biyongereye bakaba 813.087, bavuye ku bagenzi 804.978 yatwaye mu 2019/2020.

Ibi bizagerwaho binyuze mu bikorwa byo kwamamaza no kumenyekanisha ibikorwa bya RwandAir, gufungura ibyerekezo bishya no gutangiza ubufatanye n’izindi sosiyete zitwara indege mu kurushaho kwagura imikorere.

Iyi sosiyete kandi izafungura ikindi cyerecyezo kimwe, ikava ku byerekezo 29 bikaba 30. Bizashingira ku gusinya amasezerano yo koroherezanya mu by’ingendo z’ikirere (Bilateral Air Service Agreements (BASA)

Inteko Ishinga Amategeko y’u Rwanda iheruka kwemeza amasezerano n’ibihugu bitanu, yemerera RwandAir gutangiza ibyerekezo bishya. Ayo masezerano aheruka, u Rwanda rwayasinyanye na Brésil, Repubulika Iharanira Demokarasi ya Congo, Namibia, Somalia na Tunisia. Ibi byatumye ibihugu byose byasinyanye aya masezerano n’u Rwanda bigera kuri 52, hakaba hanitegurwa gusinyana amasezerano na Koreya y’Epfo na Malta.

Mu yindi mihigo ya RwandAir uyu mwaka harimo kongera umubare w’indege ikoresha, zikava ku ndege 12 zikagera ku ndege 13. Indege izagurwa uyu mwaka ni itwara imizigo yo mu bwoko bwa Boeing 737-800.

Ubuyobozi bwa RwandAir buherutse gutangaza ko kugeza mu Ugushyingo 2020, yari imaze gusubukura ingendo kuri 70 % z’ibyerekezo yaganagamo mbere ya Coronavirus, bikaba bitanga icyizere ko intego yihaye uyu mwaka zizagerwaho.

Mu gukomeza gufasha RwandAir kuzahuka nyuma y’ingaruka za Coronavirus, Guverinoma y’u Rwanda yongereye amafaranga yashyiraga muri iyi sosiyete, agera kuri miliyari 145,1 Frw mu mwaka w’ingengo y’imari 2020/2021 avuye kuri miliyari 121,8 Frw mu mwaka w’ingengo y’imari ushize.

Minisitiri w’Imari n’Igenamigambi, Dr Uzziel Ndagijimana, aherutse kubwira Inteko Ishinga Amategeko ko u Rwanda nk’igihugu kidakora ku nyanja, ubwikorezi bwo mu kirere ari cyo gisubizo.

Yagize ati “Nk’igihugu kidakora ku nyanja, nta buryo dufite bwo gukora ubucuruzi bwambukiranya imipaka tudakoresheje ikirere ndetse tunatera inkunga RwandAir ngo yerekeze mu byerekezo byinshi bitandukanye, kugira ngo igaragaze isura nziza y’igihugu, inakuze dipolomasi.’’

U Rwanda rumaze gushora agera muri miliyari 2$ yo gufasha RwandAir kuzanzamuka. Muri Gashyantare uyu mwaka Ikigo gikomeye mu bwikorezi bw’indege cya Qatar Airways cyatangaje ko kiri mu biganiro na RwandaAir, hagamijwe kugura 49% by’imigabane muri iki kigo gikomeje kwaguka uko bwije n’uko bukeye.

Ni inkuru nziza kuri RwandAir no ku bagenzi bayo kuko Qatar Airways ari ikigo gifite izina rikomeye ku rwego rw’Isi, ndetse umwaka ushize yegukanye ibihembo bine muri 2019 Skytrax World Airline Awards, birimo igihembo cy’ikigo cy’indege cyiza ku Isi, ‘World’s Best Airline’, ari nacyo kigo rukumbi cyabashije kwegukana ibi bihembo inshuro eshanu 2011, 2012, 2015, 2017 na 2019.

Ikigo Mpuzamahanga gishinzwe ingendo zo mu Kirere (IATA) giherutse gutangaza ko sosiyete z’indege uyu mwaka zizinjiza miliyari 419 z’amadolari , avuye kuri miliyari 838 z’amadolari mu 2019. Icyakora hari icyizere ko ayo mafaranga aziyongera akagera kuri miliyari 598 z’amadolari mu 2021.

RwandAir irateganya kugura indege nshya muri uyu mwaka w'ingengo y'imari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .