IMF yongeye kugabanya igipimo ubukungu bw’u Rwanda buzazamukaho kubera COVID-19

Yanditswe na Rabbi Malo Umucunguzi
Kuya 1 Nyakanga 2020 saa 12:55
Yasuwe :
0 0

Ikigega Mpuzamahanga cy’Imari, IMF, cyatangaje ko ubukungu bwa Afurika yo munsi y’Ubutayu bwa Sahara buzazahara muri uyu mwaka wa 2020 kurusha uko byatekerezwaga muri Mata, bitewe n’ingaruka z’icyorezo cya COVID-19.

Mu mibare mishya yashyizwe ahagaragara, yerekana ko ubukungu bw’aka karere bwakomeje kumera nabi nyuma ya Mata 2020 ubwo hari hamaze gutangazwa igipimo cy’izamuka ry’umusaruro mbumbe w’ibihugu muri uyu mwaka wa 2020.

Igaragaza ko igipimo cy’igabanuka ry’umusaruro mbumbe cyikubye kabiri kikagera kuri 3.2 ku ijana, ugereranyije na 1.6% yateganywaga muri Mata.

IMF ivuga ko abayobozi ba Afurika muri rusange bihutiye gufata ingamba zo gukumira ikwirakwira rya COVID-19, ariko bahura n’imbogamizi zishamikiye ku igabanuka ridasanzwe ry’amafaranga ibihugu byinjiza n’ingengo y’imari idahagije, bishamikiye ku ngamba zo guhagarika icyorezo nko gufunga imirimo itandukanye.

Muri iki gihe ubwandu busa n’ubwatangiye gucogora, ibikorwa bimwe bigenda bifungurwa mu buryo bwitondewe, gusa ngo kuba hari aho icyorezo gikomeje kwibasira bituma nta gahenge kabaho, kuko nta gihugu cyarwana uru rugamba cyonyine.

Umuyobozi wa IMF muri Afurika, Abebe Aemro Selassie, yagize ati "Bijyanye n’uburyo bushya tubonamo ibintu, ubukungu bwa Afurika yo munsi y’ubutayu bwa Sahara buzamanukaho 3.2 ku ijana, birenze inshuro ebyiri z’igipimo twatekerezaga muri Mata. Nanone bizaba ari ryo rikabije kurusha ikindi gihe mu mateka."

Avuga ko nubwo hari aho ubwandu bwacogoye ibikorwa bigatangira gufungurwa, icyorezo kiracyahari ndetse imibare y’ubwandu bushya igenda yikuba kabiri nibura hagati y’ibyumweru bibiri na bitatu.

Bijyanye n’uburyo ibihugu byo muri aka karere bidafite inzego z’ubuzima zikomeye, ngo byiyemeje gukora igisabwa cyose ngo birengere ubuzima bw’abaturage.

Raporo ya IMF igira iti "Umusaruro mbumbe w’akarere mu 2020 uzaba uri muri miliyari $243, munsi y’uko byateganywaga mu Ugushyingo 2019. Igabanuka rikomeye rizagaragara ku bukungu bwubakiye cyane ku bukerarugendo nko muri Comores n’ibirwa bya Maurice (impuzandengo ya 5 ku ijana)."

"Ibihugu bicukura bikanacuruza peteroli nabyo izamuka ryavuguruwe rimanukaho 2 ku ijana mu mpuzandengo, naho abohereza mu mahanga ibindi bicuruzwa bo hagabanukaho 1 ½. Ku bifite ubukungu bushingiye ku bintu byinshi (nk’urugero Côte d’Ivoire, Rwanda, Senegal, Uganda) igipimo cyagabanutseho 1 ½ ku ijana ariko byitezwe ko bizakomeza guhagarara neza."

IMF yagaragaje ko igipimo umusaruro mbumbe w’u Rwanda uzazamukaho mu mwaka wa 2020 cyongeye kumanuka, mu gihe cyaherukaga guhindurwa kikava kuri 5.1 kikaba 2.0 ku ijana kubera ingaruka COVID-19.

Imibare mishya yerekana ko umusaruro mbumbe w’u Rwanda wazamutse 8.6 ku ijana mu 2018 na 9.4 ku ijana 2019, muri uyu mwaka wa 2020 uzazamukaho -1.5 naho mu 2021 bibe -0.3. Igipimo cyaherukaga kugirwa 2.0 ku ijana muri uyu mwaka mu gihe hateganywaga ko mu 2021 kizaba 6.3 ku ijana.

Muri uyu mwaka ku bihugu nka Afurika y’Epfo umusaruro mbumbe uzazamuka -2.2 ku ijana, Mauritius ni -5.4 ku ijana, Ethiopia ni -1.3 ku ijana, Uganda ni -1.7 ku ijana, Tanzania ni -0.1 ku ijana, Kenya ni -1.3 naho Sudani y’Epfo ni -0.2 ku ijana. Kuri RDC n’u Burundi ho hagaragazwa ko ari 0.0 ku ijana.

U Rwanda kandi ruri mu bihugu birimo gukoresha uburyo bwo kwishakamo ibisubizo, hakifashishwa inzego z’ibanze mu kumenya no gufasha imiryango ibikeneye, biciye mu rwego rw’Umudugudu, uburyo bukoreshwa no muri Madagascar binyuze mu cyitwa Fokontany.

Selassie yakomeje agira ati "Kugeza ubu, ibihugu bigize aka karere bimaze gutangaza ishyirwaho ry’amafaranga agamije kuzahura ibikorwa byahungabanyijwe na COVID bingana na 3 ku ijana by’umusaruro mbumbe. Iki gikorwa ni ingirakamaro cyane. Ariko nanone byashobotse kubera izindi nzego zirengagijwe nk’ishoramri rya leta."

Byitezwe ko ubukungu bw’aka karere ko munsi y’ubutayu bwa Sahara buzazamuka kuri 3.5 mu mwaka wa 2021, hashingiwe ku cyizere cy’ibikorwa by’ubucuruzi bikomeje gusubukurwa, no kuba abayobozi barimo gushyiraho ingamba zigamije kuzahura ubukungu no kunoza ifatwa ry’amadeni ya leta.

Mu mezi ashize IMF yatanze miliyari 10 z’amadolari ya Amerika ku bihugu 29 byo muri Afurika yo munsi y’ubutayu bwa Sahara. Muri byo, hari ibyabaye bihagarikiwe kwishyura umwenda wa miliyari US$14 hagati ya Gicurasi n’Ukuboza 2020. Muri uyu mwaka kandi ibihugu bigize aka karere bizakenera izindi miliyari $110.

IMF ivuga ko gahunda zishyirwaho zikwiye kwita cyane ku kurengera ubuzima n’ibikorwa by’ubucuruzi byagizweho ingaruka zikomeye n’icyorezo, bigafashwa kuzahuka.

Icyorezo cya Coronavirus kimaze guteza ingaruka zikomeye ku bukungu bw'Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .