Ikigo cy’indege cyaciwe $50.000 gishinjwa gukorera ivangura abagenzi b’abayisilamu

Yanditswe na IGIHE
Kuya 25 Mutarama 2020 saa 03:44
Yasuwe :
0 0

Minisiteri Ishinzwe Ubwikorezi muri Leta Zunze Ubumwe za Amerika, kuri uyu wa Gatanu yategetse Delta Air Lines kwishyura $50,000 (asaga miliyoni 46 Frw), ishinjwa gukorera ivangura abagenzi b’abayisilamu.

Iyi Minisiteri yasohoye itangazo rishinja Delta ibikorwa by’ivangura ryakorewe abagenzi batatu b’abayisilamu ku nshuro ebyiri zitandukanye mu mwaka wa 2016, mu rugendo rumwe rwavaga i Paris rugana Ohio n’urundi rwavaga Amsterdam rugana i New York City.

Kuri izo nshuro zombi, abagenzi ngo bakuwe mu ndege bitewe n’uko abakozi bo mu ndege n’abandi bagenzi batabashira amakenga, kubera icyo bise imyitwarire yabo.

Icyo cyemezo kivuga ko mu ndege umupilote ari we ufite ijambo rya nyuma ku byemezo birimo no kudatwara umugenzi runaka, ariko ubwo burenganzira butagera ku ivangura iryo ari ryo ryose ryaba rishingiye “ku ruhu, ibara, ubwenegihugu, idini, ubwoko cyangwa igitsina.”

Iki kigo cy’indege cyatangarije CNN ko gikomeje guharanira ko abantu bose bacyibonamo, ntawe uvanguwe cyangwa ngo ahezwe.

Umuvugizi wa Delta Airlines, Emma Kate Protis, yakomeje ati “Nubwo twumva ko uburyo duha serivisi nziza abagenzi bacu butubahirijwe ku nshuro zombi, ntabwo twemeranya na Minisiteri ishinzwe ubwikorezi ivuga ko Delta yagaragaje imyitwarire y’ivangura.”

Gusa yavuze ko nyuma y’ibyabaye bongereye imbaraga mu buryo bakurikirana ibibazo n’amahugurwa, ariko itemeranya n’icyemezo cya guverinoma ko iki kigo cy’indege cyakoze ivangura, nubwo cyemera ko ibibazo byabaye byari gukemurwa ukundi.

Ku rugendo rwa Paris, umugabo n’umugore bafite ubwenegihugu bwa Amerika ngo bari bicaranye mu ndege, bava i Paris bajya mu mujyi wa Cincinnati muri Ohio, umwe mu bagenzi aza kubwira umukozi wo mu ndege ko abo bantu abafiteho ikibazo, nubwo atagisobanuye.

Ubwo umukozi wo mu ndege yajyaga aho umupilote aba yicaye, yanyuze kuri uwo mugabo abona airmo kwandika ubutumwa bugufi muri telefoni burimo ijambo ‘Allah’ inshuro nyinshi, amwegereye bahuza amaso ntiyaseka, ahubwo yihutira gufata ukuboko k’umugore we.

Ubwo hanyuraga undi mukozi wo mu ndege, ngo uwo mugabo yarabibonye ahita ahindura telefoni yakoreshaga, bajya kubibwira umuyobozi w’indege, wahise asaba abashinzwe umutekano kumuhagurutsa ngo bamugenzure neza.

Abo bantu bombi barabajijwe bigaragara ko nta kibazo gihari, indege yemererwa kugenda ariko umupilote yanga ko bayisubiramo kuko abagenzi bari bagize ubwoba bwo kujyana nabo.

Minisitiri w’Ubwikorezi ya Amerika ivuga ko “bigaragara ko iyo bitaba idini uyu mugabo n’umugore babarizwamo, Delta itari kubavana mu ndege ndetse ngo inabangire kuyisubiramo.”

Ni kimwe no ku ndege yavaga Amsterdam nabwo umugenzi yagizweho impungenge na bagenzi be bishingiwe ku mizigo yari afite, aza kuvanwa mu ndege ku buryo abo bagenzi uko ari batatu bategewe indege zikurikiraho.

Delta yahise itegekwa gukoresha amahugurwa abakozi bayo, ku buryo bagomba kubahiriza amabwiriza agenga uburenganzira busesuye bw’abagenzi.

Delta Airlines yaciwe $50.000 ishinjwa gukorera ivangura abasilamu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza