Ikigo Alphabet kibarizwamo Google cyinjiye mu bifite agaciro ka tiriyari 1$

Yanditswe na IGIHE
Kuya 17 Mutarama 2020 saa 11:46
Yasuwe :
0 0

Ikigo Alphabet cyabyaye Google cyiyongereye ku bigo nka Apple na Microsoft, mu bifite agaciro ka miliyari 1000$ [ni ukuvuga tiriyari imwe y’amadolari] kuzamura.

Apple nicyo kigo gifite agaciro kanini muri Leta zunze Ubumwe za Amerika, aho ku isoko ifite agaciro ka tiriyari 1.4$. Microsoft ifite agaciro ka tiriyari $1.3.

Ni ku nshuro ya mbere ibigo bitatu byo muri Amerika bigize icyarimwe agaciro nibura ka tiriyari y’amadolari. Ikigo gifite agaciro kanini ku Isi ni igitunganya ibikomoka kuri peteroli na Gas cya Saudi Aramco, giherereye Dhahran muri Arabie Saoudite.

Mu kwezi gushize byatangajwe ko iki kigo gifite agaciro ka tiriyari 2$ kuri ubu kikaba gifite agaciro kabarirwa muri tiriyari 1.8$.

Amazon ubungubu ibarirwa agaciro ka miliyari 930$ yabaye ikigo cya kabiri cyo muri Amerika cyageze ku gaciro ka tiriyari 1$, mu 2018. Muri icyo gihe, Apple nicyo kigo kindi cyari gifite agaciro karenga tiriyari 1$.

Imigabane ya Alphabet yageze kuri tiriyari 1$ mbere y’uko isoko ry’imigabane rifungwa kuwa Kane, aho yacuruje umugabane umwe ku $1,451.70 ukaba warazamutseho 0.87%.

Ikindi kigo cyo muri Amerika byitezwe ko kizagera ku gaciro ka tiriyari 1$ mu gihe cya vuba ni Facebook, aho isoko ryafunzwe kuwa Kane kibarirwa muri miliyari 620$.

Mu kwezi gushize Alphabet yahinduye ubuyobozi aho Larry Page na Sergey Brin bavuye ku nshingano zo gukurikirana ibikorwa by’iki kigo.

Sundar Pichai wari umaze igihe kirekire ayobora Google, niwe wahise agirwa Umuyobozi Mukuru wa Alphabet Inc ibumbiye hamwe ibigo nka Google, Calico, DeepMind, Google Fiber, Jigsaw, Sidewalk Labs, Verily, Waymo n’ibindi.

Sundar Pichai ni we muyobozi wa Alphabet Inc. kuva mu kwezi gushize

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .