00:00:00 IGIHE NETWORK KN KINYARWANDA EN ENGLISH FR FRANCAIS

Ifaranga rya Euro mu manga! Ni iki u Rwanda rwakwitega?

Yanditswe na Cyprien Niyomwungeri
Kuya 20 July 2022 saa 10:51
Yasuwe :

Ubwoba ni bwose ko u Burayi bushobora kujya mu ihungabana ry’ubukungu rikabije, ni nyuma y’izamuka ridasanzwe ry’ibiciro ku isoko no guta agaciro kw’ifaranga rya ‘Euro’, aho bwa mbere mu myaka 20 ishize riri munsi y’idolari.

Kuri ubu umuntu ufite idolari rimwe arahabwa amayero 0.98. Mbere y’intambara u Burusiya bwagabye kuri Ukraine, Euro rimwe ryaguraga idolari 1.15. Ubishyize mu mafaranga y’u Rwanda, icyo gihe uwari ufite Euro rimwe yahabwaga 1135Frw mu gihe ubu ari 1030Frw.

Izamuka ry’ibiciro bya gaz n’ubwoba bw’uko u Burusiya bushobora guhagarika kohereza gaz n’ibikomoka kuri Peteroli i Burayi, ni imwe mu mpamvu nyamukuru irimo gusubiza hasi ifaranga ry’ibihugu byo mu karere ka Euro [Eurozone].

Ni ikibazo abarebera hafi ubukungu basanga kizakomeza kwiyongera ndetse abanya-Burayi bafite impungenge ko bashobora kwisanga mu ihungabana ry’ubukungu rikabije. Mu kwezi gushize izamuka ry’ibiciro mu karere gakoresha ifaranga rya Euro ryari 8.6% ni ibintu bitaherukaga kuva mu myaka 40 ishize.

Kuva muri Gashyantare uyu mwaka, u Burusiya bwatangije ibikorwa bya gisirikare muri Ukraine, ibi byagize ingaruka ku bukungu bw’u Burayi, kuko abantu bikanze ko u Burusiya bushobora gukora ibintu bibi birenze ibyo barimo kubona ubu bituma abashoramari bifata.

Mu kiganiro IGIHE yagiranye n’impuguke mu bukungu akaba n’umwarimu muri kaminuza, Straton Habyarimana, yasobanuye ko guta agaciro kw’ifaranga rya Euro, bituruka mbere na mbere ku bwoba n’impungenge z’uko intambara ya Ukraine ishobora guteza ingaruka nyinshi zirenze izamuka ry’ibiciro bafite uyu munsi.

Ati “Perezida Putin yagaragaje ko utateganya ngo azakora iki, azagikora ryari, ashobora gutungurana gutya agafunga za ’robine’ nk’uko mu minsi ishize yabikoze ngo barimo koza amatiyo. Abarusiya bashobora gufunga burundu n’iyo gaz na peteroli bikabura kandi u Burayi bukoresha hafi 40% bya gaz ituruka mu Burusiya”.

Habyarimana asanga indi mpamvu y’ihungabana rya Euro ari uko abashoramari bafite ubwoba bwo gushora imari i Burayi.

Ati “Abantu rero bashora imari i Burayi, ibyo bintu barabibona, kubera icyo cyoba bafite, amafaranga yo gushora imari bari kuyavanayo bayajyana ahandi”.

Perezida Putin aherutse gufata icyemezo cy’uko ibikorwa bikomeye bigomba kwishyurwa mu mafaranga yo mu gihugu cye (rubble), aho kuba mu manyamahanga.

Ibi byagabanyije urwego ifaranga rya Euro ryakenerwagaho bigira ingaruka ku gaciro karyo kuko ‘Ifaranga ryose rigira agaciro bitewe n’abarishaka. Mu gihe abashaka ifaranga rya Euro ari bake, ubwo noneho n’agaciro karyo kazagabanuka’.

Habyarimana asobanura ko bitewe n’uko ibintu bihagaze, amwe mu mabanki y’ibihugu yagiye azamura inyungu fatizo ku nguzanyo bituma abantu aho kujya kwaka amafaranga ngo bashore mu bukungu bifata ngo barebe aho byerekeza.

Ibi byatumye kandi abantu bajyana amafaranga bari bafiye mu mabanki, na yo akayajyana muri banki nkuru bagategereza inyungu nto itarimo ibibazo byinshi.

Habyarimana ati “Kuko ishoramari riba ritagenda muri ibyo bihugu n’agaciro k’amafaranga karagabanuka. Ni ko biri kugenda no ku mayero, ama-Yen n’andi mafaranga mpuzamahanga agaciro kayo karagabanutse”.

Ni iki u Rwanda rwakwitega?

U Rwanda n’ibindi bihugu bya Afurika, bitumiza ibintu byinshi i Burayi yaba ibikoresho byo kwifashisha mu buzima busanzwe n’ibyo mu nganda.

Urugero u Rwanda rwatumizaga mu Burusiya na Ukraine ingano zo kwifashisha mu gukora inzoga ndetse n’ifumbire yo mu buhinzi.

Habyarimana avuga ko muri Afurika n’u Rwanda bashatse babyinira ku rukoma, cyane cyane ko bavana ibintu byinshi i Burayi kurusha ibyo boherezayo.

Ati “Kubera ko iyo ukura ibintu mu gihugu, ukenera amafaranga y’icyo gihugu cyangwa mu gace runaka nk’i Burayi, kugira ngo ubashe guhaha ibyo bintu uvanayo. Abantu bahahira i Burayi kuri bo barimo barahaha bahendukiwe kuko iyo ifaranga rigabanyije agaciro, aho rihahira ibyo rigura biba byagabanyutse”.

Ibi kandi bibyara inyungu nyinshi ku batumiza ibicuruzwa hanze kuko babirangura bihendutse bakabigurisha ku giciro gisanzwe bityo ugasanga ikigereranyo cy’inyungu bavanamo kirisumbuye kuruta uko byari bisanzwe.

Ku rundi ruhande ariko hari ubwo abantu bakirukira kujya kurangura i Burayi bakazana ibicuruzwa bikaba byinshi ku isoko. Icyo gihe ibiciro bizagabanuka abakora ubwo bucuruzi babihomberemo kuko byabaye byinshi ku isoko.

Habyarimana ati “Ibiciro byagabanutse, abaguzi babyungukiramo ariko abacuruzi bakabihomberamo bityo igihugu kigahomba imisoro. Umuguzi yabyinira ku rukoma ariko kuri leta no ku bacuruzi ni ikibazo mu gihe kirambye”.

Akomeza avuga ko hari abantu baba abo mu Rwanda n’ahandi bari guhombera ku imanuka ry’agaciro ka Euro. Abo ni nk’abafitanye amasezerano n’ibigo byo mu bihugu bikoresha Euro, ayo masezerano akaba yanditse ko bazajya bahembwa mu mayero, amafaranga azagera kuri konti azaba afite agaciro gato ugereranyije n’igihe bumvikanaga amasezerano.

Ati “Ingaruka z’abantu bafite amasezerano bumvikanye ku giciro runaka, mu gihe cyo kwishyura bo barimo guhomba kuko barabona munsi y’ayo bumvikanye”.

Inzobere mu bukungu zisanga Amerika iri kungukira cyane mu ihungabana ry’ubukungu riri i Burayi kuko imibare iragaragaza ko ishoramari ririmo kuzamuka n’agaciro k’idolari kari gutumbagira. Ibi kandi biratuma idolari rigirirwa icyizere.

Kugeza ubu kandi abasesengura iki kibazo bavuga ko kirimo kwerekeza ahabi kurushaho kuko ntawe uzi iby’u Burusiya na Ukraine igihe bizarangirira kandi igihe cyose bizaba bigihari ifaranga rya Euro rizakomeza guta agaciro.

Ni mu gihe kandi urujya n’uruza rw’ibicuruzwa mu rwego mpuzamahanga rutari gukunda kubera guhimana, aho ibihano u Burusiya buri gufatirwa nabwo bufata ingamba zo kwihorera.

Agaciro k'ama-Euro imbere y'idolari gakomeje kumanuka cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .