Ibyiciro by’ubudehe byanozwa bite ngo bibere buri wese?

Yanditswe na Ferdinand Maniraguha
Kuya 26 Nzeri 2018 saa 11:26
Yasuwe :
0 0

Mu 2016, hasohotse Raporo nshya y’ibyiciro by’ubudehe ivugurura ibyari byaragiyeho mu 2014.

Iyo raporo yagaragaje ko mu cyiciro cya mbere harimo ingo 376,192 zigizwe n’abantu 1,480,167. Ni ukuvuga ko ari 16% by’Abanyarwanda bose.

Icyiciro cya kabiri kirimo ingo 703,461 zigizwe n’abantu 3,077,816 bangana na 29.8% by’Abanyarwanda bose.

Icyiciro cya gatatu kirimo ingo 1,267,171 zituwe n’Abanyarwanda 5,766,506 bangana na 53.7%, mu gihe icya Kane kirimo ingo 11,664 zituwe n’Abanyarwanda 58,069, bahagarariye 0.5% by’abatuye igihugu cyose.

Ni ibyiciro byabonetse nyuma yo guhuza amakuru atangwa nyuma y’ibibazo umuturage asubiza ku ifishi (scorecard Approach) ndetse n’ayatanzwe n’abaturage bo mu mudugudu atuyemo (Community approach).

Ibyiciro by’ubudehe nibyo byifashishwa mu igenamigambi ritandukanye ry’igihugu nko kwishyura ubwisungane mu kwivuza (Mutuelle de Santé) kurihira abanyeshuri muri za Kaminuza, imishinga igamije gukura abantu mu bukene n’ibindi.

Icyakora ibi byiciro ntibivugwaho rumwe kuko kenshi abaturage bagiye bumvikana bashaka ko bahindurirwa, bavuga ko bashyizwe mu by0 badakwiriye, by’umwihariko by’abafite ubushobozi kandi bo batabufite.

Ubushakashatsi bw’Urwego rw’imiyoborere, RGB, ku ishusho y’uko abaturage banyurwa na serivise bahabwa n’inzego zitandukanye zibegereye mu mwaka ushize, bwerekanye ko 45.7 % by’abanyarwanda batishimiye ibyiciro by’ubudehe bashyizwemo.

Umusesenguzi mu by’ubukungu, Teddy Kaberuka, yaganiriye na IGIHE, avuga ko uburyo bukoreshwa hashakishwa amakuru ku byiciro by’ubudehe butanoze ku buryo yakwizerwa ijana ku ijana.

Ati “Hari nk’imitungo nshobora kuba mfite mutazi. Tujya twumva Leta ishyira ku isoko ry’imari n’imigabane abantu bakagura. Nshobora kugurisha inzu yanjye nkajya kugura mu isoko ry’imigabane, umuntu duturanye akaba aziko nkodesha ariko mfite miliyari mu isoko ry’imari n’imigabane.”

Yavuze ko ushobora no gutura mu mudugudu umwe ariko uhafite imitungo mike nyamara mu yindi ntara ufiteyo inzu cyangwa ubucuruzi bukomeye ku buryo abo muturanye badashobora kubimenya.
Kaberuka avuga ko hari n’abashobora kubeshya ku makuru batanga, kugira ngo bashyirwe mu byiciro byo hasi kuko bazi ko hari serivisi umuntu asonerwa iyo ari mu cyiciro cya mbere cyangwa icya kabiri.

Hakorwe iki?

Kaberuka asanga hakenewe ikigo cyihariye gishinzwe gukusanya amakuru mu mibereho y’abaturage.

Yavuze ko icyo kigo cyajya gikusanya amakuru ku bijyanye n’imirimo, ubutaka, amabanki, ubucuruzi n’ibindi noneho kikaba gifite ishusho y’umutungo wa buri muturage.

Icyo gihe avuga ko kwishyurirwa Mutuelle de Santé, gufashwa kurihira abana amashuri n’zindi serivisi umuntu yajya yandika abisaba aho kubihabwa kubera icyiciro runaka.

Yagize ati “Hakagombye kuba ikigo kibishinzwe abantu bakeneye ubufasha bakiyandikisha bitewe n’icyo bashaka gufashwamo, icyo kigo kigashaka amakuru kuri buri muntu.”

“Kigahuza amakuru ku butaka, kigahuza amakuru mu mabanki n’ahandi hose abantu bashobora kubika umutungo, bakabihuza n’amakuru umuntu yatanze, icyo kigo kigakora ubushishozi kikareba kiti duhereye ku byo umuntu atubwira ko afite cyangwa adafite koko akeneye ubufasha.”

Kaberuka yavuze ko hari ubwo umuntu ashobora kuba mu cyiciro cya mbere cyangwa icya kabiri ariko afite ubushobozi bwo kwiyishyurira ubwisungane mu kwivuza, wenda icyo akeneyeho ubufasha ari ukwishyurira abana ishuri gusa.

Ati “Gufashwa ni ikintu umuntu yumva ko akeneye akabisaba, ntabwo ari ukuvuga ngo twakase abari hano bose barafashwa kuko ushobora kuba uri mu cyiciro cya mbere ariko wabasha kwigurira Mutuelle. Iyo washyize abantu mu byiciro nta n’ushaka kukivamo kuko hari serivisi ahabwa ku buntu.”

Umuyobozi Mukuru wungirije mu kigo ishinzwe guteza imbere ibikorwa by’iterambere mu nzego z’ibanze (LODA), Sibomana Saidi yabwiye IGIHE ko uburyo bwifashishwa mu gushyiraho ibyiciro by’ubudehe ari mpuzamahanga.

Yavuze ko kuba hari abishimira kuguma mu cyiciro runaka biterwa n’imyumvire ariyo mpamvu bazakomeza kwigisha kugira ngo ihinduke.

Ati “ Ni ikibazo cy’imyumvire cy’abanyarwanda bishimira kuba mu bukene kugira ngo akomeze afashwe utu tuntu Leta itanga. Ni uguhindura imyumvire no kubigisha kuko niba wumva ukwiye kujya mu cyiciro cya mbere ukanabyishimira, ikibazo gikomeye aba ari imyumvire.”

Kuri ubu Leta itangira ubwisungane mu kwivuza imiryango ibihumbi 476.

Sibomana agaragaza impungenge ko hashyizweho uburyo bw’uko ukeneye ko Leta imwishyurira abisaba, bashobora kubona abantu benshi.

Ati “Uvuze ngo ugiye guha abandi bantu bashobora kugera muri miliyoni, ibi by’abaturage rero byo kuvuga ngo uyu niwe ukeneye inkunga kurusha undi nibyo Leta yafashe.”

Mu Rwanda habarizwa ingo ibihumbi 154 ziri mu bukene bukabije zifashwa muri gahunda zitandukanye zigamije kubavana mu bukene.

Biteganyijwe ko umwaka utaha wa 2019 aribwo ibyiciro by’ubudehe bizongera kuvugururwa, ari nabwo abo bari mu bukene bukabije bakabaye babuvuyemo.

Umusesenguzi mu by'ubukungu, Teddy Kaberuka, yatanze inama z'icyakorwa ngo ibyiciro by'ubudehe bivugururwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza