00:00:00 IGIHE NETWORK KN KINYARWANDA EN ENGLISH FR FRANCAIS

Ibizagenderwaho mu gusaranganya miliyoni $250 zongerewe mu Kigega Nzahurabukungu

Yanditswe na Rabbi Malo Umucunguzi
Kuya 19 May 2022 saa 06:31
Yasuwe :

Guverinoma y’u Rwanda yatangije icyiciro cya kabiri cy’ikigega cyo kuzahura ubukungu, kuri iyi nshuro cyongerewemo miliyoni $250, zisanga miliyoni $100 zashyizwemo mu cyiciro cya mbere.

  • Ibigo bizahabwa amafaranga yo gukoresha no kuvugurura inguzanyo
  • Abazafashwa ni abagize igihombo cya 20%
  • Inyungu ku nguzanyo izaba ari 8%
  • Miliyoni 150$ zagenewe ishoramari rishya

Icyiciro cya mbere cy’iki kigega kizwi nka Economic Recovery Fund (ERF) cyarimo miliyari 105 Frw zakoreshejwe mu kuzahura ibyiciro bitandukanye byahungabanyijwe n’icyorezo cya COVID-19.

Harimo nka miliyari 73 Frw zakoreshejwe mu gufasha ibigo kuvugurura inguzanyo: amahoteli n’ibikorwa byo kwakira inama 151 byahawe miliyari 52.66 Frw, amashuri 69 yigenga ahabwa miliyari 12.6 Frw, mu gihe ibigo byo gutwara abantu bigera kuri 55 byahawe miliyari 7.7 Frw.

Mu bijyanye n’amafaranga yatanzwe yo gukoresha mu bucuruzi, asaga miliyari 11 Frw yakoreshejwe mu gufasha amasosiyete 157, ndetse hari n’ibigo bito bito 6,715 byahawe miliyari 6.7 Frw binyuze muri za Sacco.

Minisitiri w’Imari n’Igenamigambi, Dr Ndagijimana Uzziel, kuri uyu wa Gatatu, tariki ya 18 Gicurasi 2022, yavuze ko iki kigega cyafashije benshi kandi mu byiciro byose, harimo amasosiyete manini, aciriritse, amato n’amato cyane.

Yakomeje ati "Hakomeje gushakishwa ubushobozi kugira ngo twongere imbaraga muri iki kigega, haboneka andi miliyoni $250, ariyo ari muri iki cyiciro cya kabiri."

Minisitiri w’Imari n’Igenamigambi, Dr Ndagijimana Uzziel, yasobanuye imiterere y'icyiciro gishya cy'ikigega cyo kuzahura ubukungu

Ibigo byose byongeye gutekerezwaho

Minisitiri Ndagijimana yavuze ko mu cyiciro cya mbere intego yari ukugoboka abantu bagize ibibazo kugira ngo badafunga imiryango, ariko mu cya kabiri hajemo amafaranga agenewe imishinga mishya.

Icyiciro cy’imishinga mishya yagenewe miliyoni $150, mu bikorwa byatoranyijwe bishobora kwihutisha ubukungu.

Hari n’ibyiciro byari bisanzwemo nko gufasha ibigo kubona amafaranga yo kwifashisha mu bikorwa bya buri munsi. Ibigo bito bito (microbusinesses) byagenewe agera kuri miliyoni $8, mu gihe amasosiyete aciriritse n’amanini yagenewe miliyoni $10.

Muri iki kigega kandi, Ikigega cy’Ingwate BDF cyongerewe ubushobozi kugira ngo kizabashe gutanga ingwate ku bigo by’ubucuruzi, kigenerwa miliyoni $30.

Kuri iyi nshuro kizafasha n’amasosiyete manini, mu gihe cyafashaga amato gusa. Hateganyijwemo kandi igice kizafasha amasosiyete afite imyenda ngo abashe kuvugurura inguzanyo, igice cyagenewe miliyoni $37.5.

Muri iki cyiciro cya kabiri cy’Ikigega Nzahurabukungu harimo n’amafaranga yagenewe kubaka ubushobozi bw’inzego z’imari cyane cyane izizashyira mu bikorwa iyi gahunda, zirimo Banki y’Iterambere y’u Rwanda (BRD) n’Ikigega cy’Ingwate, BDF, yagenewe miliyoni $12.

Buri cyiciro cyagenewe amahirwe yihariye

Nk’abafite ibikorwa bito cyane bicuruza amafaranga ari munsi ya miliyoni imwe (Microbusinesses) bafite umwihariko wo kuba bahabwa inguzanyo ku nyungu iri hasi cyane igera ku 8%, no kwemererwa kwishyura kugeza ku myaka itanu bitewe n’ubucuruzi.

Abo bashobora no guhabwa inguzanyo igera kuri miliyoni 5 Frw, ndetse bagahabwa ingwate iri hagati ya 50%-75%.

Mu cyiciro cy’ibigo bito (small) bicuruza kugera kuri miliyoni 500 Frw ku mwaka, byemerewe ko bishobora kubona inguzanyo igera kuri miliyoni 300 Frw, ku nyungu ya 8%.

Ni amafaranga ashobora kwishyurwa mu gihe kigera ku myaka itanu, kandi ibyo bigo bishobora guhabwa ingwate iri hagati ya 50%-75%.

Ni mu gihe ibigo biciriritse - ni ukuvuga bicuruza kuva kuri miliyoni 500 Frw kugera kuri miliyari 1 Frw ku mwaka, byemerewe kuguza kugeza kuri miliyoni 300 Frw ku nyungu ya 8%.

Minisitiri Ndagijimana yakomeje ati "Ariko yarenzaho, akeneye menshi, miliyoni 500 Frw cyangwa na miliyari 1 Frw, ya yandi arenzeho akayahabwa ku nyungu za banki, aho agujije."

Nabyo bishobora guhabwa ingwate iri hagati ya 50%-75%.

Ni mu gihe ku bigo binini birengeje igicuruzo cya miliyari 1 Frw ku mwaka, byahawe uburyo bubiri: kubona inguzanyo igera kuri miliyoni 300 Frw ku nyungu ya 8%, arenzeho bakayabona ku nyungu za banki zisanzwe, bigahuzwa.

Byo bishobora kubona ingwate igera kuri 50%. Bishobora kandi kwishyura mu myaka itanu, ndetse bikaba byahabwa umwaka umwe wo kutishyura.

Hateganyijwe ibizagenderwaho

Minisitiri Ndagijimana yavuze ko nk’uko byagenze ku cyiciro cya mbere, hashyizweho igipimo kizagenderwaho mu kureba niba iyo sosiyete yaragizweho n’ingaruka za COVID-19 mu buryo buremereye.

Ati "Mu cyiciro cya mbere twagezaga ku gihombo cya 30% mu cyo umuntu yinjije tugereranyije mbere ya COVID-19 n’igihe cyayo. Ubu rero igihe kimaze gucamo, abenshi bamaze gufashwa, ubu icyo gipimo cyaramanuwe kijya kuri 20%, ugereranyije amezi 12 ya mbere ya COVID-19 n’amezi 12 aheruka."

Hiyongeraho kandi kugaragaza ubucuruzi umuntu agiye gukora, n’ubushobozi bwo kwishyura.

Icyiciro cyagenewe ishoramari rishya

Kuri iyi nshuro kandi hateganyijwe icyiciro cy’ishoramari rishya, cyashyizwemo miliyoni $150. Zizafasha abashoramari bashaka gukora ibikorwa bishya, bishobora kuzamura ubukungu mu buryo bwihuse kandi bikabyara n’imirimo.

Dr Ndagijimana yavuze ko inzego zatoranyijwe muri iki cyiciro harimo inganda n’ibishamikiyeho. Harimo nko gutunganya umusaruro uva ku buhinzi, inganda zikora ibikoresho by’ubwubatsi n’ibindi.

Yakomeje ati “Ibi bigamije kuzamura byihuse umusaruro w’imbere mu gihugu, no kongera buhoro buhoro ubudahangarwa bw’ubukungu ku bibazo bituruka hirya no hino hanze y’igihugu.

Muri icyo cyiciro, nabwo hazagenderwa ku buryo ibigo bigenda birutana.

Nk’abafite ibikorwa bito bito cyane biri munsi ya miliyoni 500 Frw, na bo bashobora guhabwa inguzanyo ku 8%, ku buryo waba ari umushinga w’imyaka 15, harimo imyaka itatu yo kutishyura.

Bashobora kuguza amafaranga agera kuri miliyoni 500 Frw, ndetse bagahabwa ingwate iri hagati ya 50%-75%.

Mu bigo biciriritse byinjiza hagati ya miliyoni 500 Frw - miliyari 1 Frw, yo azakoresha uburyo bubiri. Igice kingana na 60% cy’inguzanyo bazakibona ku nyungu ya 8% ifashwa n’iki kigega, 40 % isigaye bayafate ku nyungu za banki, wabishyira hamwe ugasanga inyungu iri hasi.

Kuri iki cyiciro kandi hashobora gutangwa ingwate ya 50%.

Naho ku cyiciro cy’ibigo binini, nabyo bishobora guhabwa inguzanyo mu buryo bumwe n’ibigo biciriritse. Gusa amasosiyete aciriritse ntagomba kurenza inguzanyo ya miliyari 2 Frw, ariko amanini akagera kuri miliyari 5 Frw.

Nibura 60% by’amafaranga yose agenewe ishoramari yagenewe amasosiyete mato n’aciriritse, 40% agenerwa amanini.

Mu rwego rwo kuyacuruza no kuyegereza abayakeneye, biteganywa ko aya mafaranga 35% azanyuzwa muri BRD, naho 65% akanyuzwa mu yandi mabanki n’ibigo by’imari iciriritse.

Iki kigega kizagera ku byiciro byose by'ubucuruzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .