Ibicuruzwa 10 u Rwanda rwohereza mu mahanga cyane

Yanditswe na Cyprien Niyomwungeri
Kuya 4 Nzeri 2020 saa 07:38
Yasuwe :
0 0

Ubucuruzi hagati y’u Rwanda n’amahanga bukomeza kwaguka buri mwaka bigizwemo uruhare n’amasezerano atandukanye yiganjemo ay’ubucuruzi rusinyana n’ibihugu byinshi, ndetse n’imiryango mpuzamahanga y’ubukungu rurimo.

Kongera ibicuruzwa u Rwanda rwohereza mu mahanga no kongerera agaciro kugira ngo bijye ku isoko mpuzamahanga, ni imwe mu ngamba zishyizwe imbere dore ko imibare igaragaza ko hari intambwe imaze guterwa ariko nanone urugendo ruracyari rurerure.

Umwaka ushize [2019], icyuho hagati y’ibicuruzwa u Rwanda rwohereza mu mahanga n’ibyo rutumizayo, cyiyongereyeho 17.2% kigera kuri Miliyari imwe n’ibihumbi mirongo irindwi na bibiri by’Amadorali ya Amerika kivuye kuri Miliyoni 915 z’Amadorali y’Amerika cyariho mu mwaka wa 2018.

Ibi bikaba byaratewe n’uko agaciro k’ibyo rwohereza mu mahanga kazamutse ku gipimo cya 3.7% mu mwaka wa 2019 mu gihe agaciro k’ibyo rutumuza mu mahanga kazamutse ku gipimo cya 9.7% ugereranyije na 8.6% kari kazamutseho mu mwaka wa 2018.

Kutazamuka kw’ibyoherezwa mu mahanga ku gipimo cyo hejuru byatewe n’igabanuka ry’ibiciro ku masoko mpuzamahanga, aho nk’ibiciro bya gasegereti byagabanutseho 7.2%, ibya coltan bigabanukaho 23%, ibya wolfram bigabanukaho 18.8%, iby’ikawa bigabanukaho 8.8%, naho iby’icyayi bigabanukaho 4.8%.

Muri iyi nkuru, turagaruka cyane ku bicuruzwa 10 u Rwanda rwohereza cyane ku isoko mpuzamahanga.

-Icyayi

Icyayi cy’u Rwanda cyabaye icyatwa mu mahanga yose, uwagisomyeho akivuga ibigwi. Nicyo gifite umwanya wa mbere mu byo u Rwanda rwohereza mu mahanga cyane.

Imibare ya Banki Nkuru y’Igihugu yasohotse muri Gashyantare 2020, yerekana ko umwaka ushize, icyayi cy’u Rwanda cyinjije mu gihugu amadevize angana na miliyoni $86.3 zavuye muri toni 30,961 zoherejwe ku isoko mpuzamahanga.

Icyayi cy’u Rwanda kizwi ku bwiza bwacyo buhebuje, kikaba mu byiza ku Isi nzima. Mu karere, gikomeje guhiga ibindi ari nako kigurwa amafaranga menshi ku isoko ry’icyayi rya Mombasa. Mu cyumweru gishize cyaguzwe Sh293 (asaga 2630 Frw) ku kilo kimwe, mu gihe icyayi cya Kenya cyagurwaga Sh266 (asaga 2390 Frw) ku ngano nk’iyo.

Ingano y’icyayi cy’u Rwanda gishyirwa ku isoko yarazamutse cyane mu myaka 26 ishize, kuko cyavuye kuri toni 11,000 ku mwaka mu 1994, zigera kuri toni 32343 z’icyayi gitunganyijwe mu mwaka ushize.

Inyungu ivamo nayo yarazamutse kuko yavuye kuri miliyoni $17.5 mu myaka 26 ishize, ubu zigeze kuri miliyoni $92.54.

Isoko ryacyo rinini riba mu Burasirazuba bw’Isi [Aziya], Pakistan, u Bwongereza, Kazakhstan n’ahandi.

Abahanga mu by’ubuzima bavuga ko icyayi gitera umubiri imbaraga kandi hari byinshi cyungura ubuzima nko gutuza no kuruhuka. Mu gihe wumva icyayi kitaryohereye, ushobora gushyiramo ubuki aho kugira ngo ushyiremo isukari nyinshi.

Icyayi ni cyo gicuruzwa cya mbere kinjiriza amafaranga menshi u Rwanda mu byo rwohereza ku isoko mpuzamahanga

-Ikawa

Ikawa ni iya kabiri mu bicuruzwa u Rwanda rwohereza ku isoko mpuzamahanga. Umwaka ushize yinjije miliyoni $69.8 zivuye kuri miliyoni $68.7 yinjije mu 2018. Byatewe n’ubwiyongere bw’ingano y’iyoherejwe yiyongereyeho 9.8 ku ijana.

Ikawa nyinshi y’u Rwanda yoherezwa mu Busuwisi, u Bwongereza, u Bubiligi na Singapore.

Umwihariko w’ikawa y’u Rwanda ukurura benshi. Mu imurikagurisha rya kawa "Coffee Festival" ryabereye i Amsterdam mu Buholandi mu 2018, yakuriwe ingofero kubera uburyohe bwayo.

Kuri ubu ku isoko ry’u Bushinwa ikawa y’u Rwanda imaze guhigika izindi. Muri Gicurasi uyu mwaka, yaciye agahigo ko kuba mu gihe cy’isegonda rimwe gusa haracurujwe toni 1.5 zayo hifashishijwe internet.

Yagurishijwe binyuze mu masezerano Guverinoma y’u Rwanda na Alibaba yo gutangiza urubuga eWTP. Binyuze muri ayo masezerano, ibicuruzwa by’u Rwanda nk’urusenda n’ikawa bigurishirizwa ku mbuga zitandukanye za Alibaba nka Tmall, Taobao n’izindi.

Abashinwa bishimira cyane uburyohe n’ubwiza bw’ikawa y’u Rwanda bavuga ko ifite impumuro nziza.

Kawa ni igihingwa ngengabukungu gihingwa mu turere 27 muri 30 tugize u Rwanda, kiri byinjiriza u Rwanda amadovize. Mu 2019, u Rwanda rwohereje ku isoko mpuzamahanga toni z’ikawa zisaga 21 000.

Ikawa y'u Rwanda yabaye icyatwa mu mahanga yose
Abanyamahanga basomye ku ikawa y'u Rwanda bashima uburyohe ntagereranywa

-Ibinyampeke

Ibinyampeke birimo ingano, umuceri n’ibigori ni ibindi bicuruzwa u Rwanda rwohereza mu mahanga bikinjiza akayabo. Hagati ya Nyakanga 2019 na Mata 2020, byinjije miliyoni $70.4.

U Rwanda rwohereza cyane ibinyampeke muri Repubulika Iharanira Demokarasi ya Congo (RDC) n’ahandi.

-Coltan

Amabuye y’agaciro ya Coltan yifashishwa cyane mu nganda zikora ibikoresho by’ikoranabuhanga nka telefoni, mudasobwa n’ibindi.

Iterambere ry’ikoranabuhanga rituma gukenerwa kw’amabuye ya Coltan kuzamuka. U Rwanda ni kimwe mu bihugu bikomeye cyane ku isoko ry’aya mabuye, aho umwaka ushize rwohereje mu mahanga toni 13 000.

Umwaka ushize aya mabuye yinjirije igihugu miliyoni $44.7

-Gasegereti

Amabuye ya gasegereti ni ikindi gicuruzwa u Rwanda rwohereza cyane mu mahanga. Umwaka ushize u Rwanda rwinjije miliyoni $36.1 avuye muri gasegereti rwohereje mu mahanga. Niyo mabuye y’agaciro menshi u Rwanda rwohereza mu mahanga cyane bitewe n’uko ahiganje.

Amabuye y'agaciro ya gasegereti ari mu bicuruzwa icumi byinjiza menshi mu byo u Rwanda rwohereza mu mahanga

-Wolfram

Wolfram ni ubundi bwoko bw’amabuye y’agaciro u Rwanda ruzwiho ku Isi yose. Mu 2019, u Rwanda rwinjije miliyoni $16.8 zivuye muri aya mabuye rwohereje ku isoko.

-Imboga

Imboga ziri mu bicuruzwa u Rwanda rwohereza mu mahanga cyane yaba kure cyangwa mu karere. Imboga zinjije miliyoni $14.7 umwaka ushize.

Imboga ziganje cyane mu zo u Rwanda rwohereza mu mahanga ni imiteja, urusenda, tungurusumu, tangawizi, ibitunguru, intoryi n’inyanya.

Isoko rinini ry’imboga z’u Rwanda riri muri Repubulika Iharanira Demokarasi ya Congo (RDC), u Bwongereza, Leta zunze Ubumwe z’Abarabu, u Bushinwa n’u Buholandi.

Imboga ziganjemo imiteja zoherezwa hirya no hino ku Isi

-Imbuto

U Rwanda rwohereza mu mahanga imbuto nyinshi ku buryo zinjije mu gihugu miliyoni $6.7 umwaka ushize. Imbuto zirimo avoka, amacunga, inanasi, amatunda n’inkeri zoherejwe mu bihugu birimo u Bubiligi cyane.

-Ibireti

U Rwanda ruhinga rukanohereza mu mahanga ibireti. Uturere twa Musanze, Nyabihu, Burera na Rubavu tweramo ibireti cyane byoherezwa muri Leta zunze Ubumwe za Amerika, u Burayi na Aziya.

U Rwanda ni igihugu cya kabiri ku Isi mu guhinga ibireti ndetse rwihariye 15 ku ijana by’isoko ryabyo. Umwaka ushize byinjirije igihugu miliyoni $6.2.

Imbuto zoherezwa cyane mu Bubiligi

-Impu

Impu z’inka, ihene n’intama zifite agaciro gakomeye kandi ziragurwa cyane ku masoko yo mu karere cyane cyane muri Repubulika Iharanira Demokarasi ya Congo.

Umwaka ushize impu zinjije miliyoni $4. Gusa impu zoherezwa mu mahanga zikomeje kugabanuka guhera mu 2013 bitewe na gahunda ya Made in Rwanda, aho hari inganda zahagurukiye kuzikoramo inkweto, ibikapu n’imikandara.

Impu ntabwo zicyoherezwa cyane mu mahanga kubera ko mu Rwanda hakomeje kwiyongera inganda zizibyaza umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .