Ibiciro by’ibiribwa byiyongereyeho 6.7% mu Ukuboza 2019

Yanditswe na Habimana James
Kuya 10 Mutarama 2020 saa 10:57
Yasuwe :
0 0

Ikigo cy’Igihugu gishinzwe Ibarurishamibare mu Rwanda, NISR, cyatangaje igipimo cy’ihindagurika ry’ibiciro mu Ukuboza 2019, kivuga ko ibiciro mu mijyi byiyongereyeho 6.7% muri uko kwezi ugereranyije na Ukuboza mu 2018.

Igipimo ngenderwaho cyifashishwa mu bukungu bw’u Rwanda kiboneka hifashishijwe gusa ibiciro byakusanyijwe mu mijyi.

Iki kigo kivuga ko ihinduka ry’ibiciro mu Ugushyingo 2019 ryari ku kigereranyo kingana na 6.9%.

Muri raporo cyashyize ahagaragara ivuga ku gipimo cy’ihindagurika ry’ibiciro mu Ukuboza, cyatangaje ko bimwe mu byatumye ibiciro byiyongeraho 6.7% muri uko kwezi, byatewe n’ibiciro by’ibiribwa n’ibinyobwa bidasembuye byazamutseho 14.9% n’ibiciro by’ibinyobwa bisembuye n’itabi byazamutseho 20.6%.

Kivuga ko iyo ugereranyije Ukuboza kwa 2019 n’Ukuboza kwa 2018, usanga ibiciro by’ibintu bitarimo ibiribwa n’ibikomoka ku ngufu byarazamutseho 3.6%, wagereranya Ukuboza 2019 n’Ugushyingo 2019 ho ibiciro byagabanutseho 0.3%.

Umuyobozi Mukuru wa NISR, Yusuf Murangwa, aherutse kuvugira mu Nama y’Igihugu y’Umushyikirano yabaye mu Ukuboza 2019 ko hari impamvu ebyiri zishobora gusobanura isano iri hagati y’izamuka ry’ubukungu mu Rwanda buri ku kigero cya 8% ku mwaka n’ibiciro byazamutse ku isoko muri iki gihe.

Yavuze ko byatewe n’uko mu mezi ya Ugushyingo na Ukuboza akenshi umusaruro uba waragabanutse, kandi ko haguye imvura nyinshi ikangiza ibihingwa.

Indi mpamvu ikomeye ni uko usanga abantu bose bahanze amaso umusaruro w’ubuhinzi, bitaretse n’ubwiyongere bw’abaturage bubigiramo uruhare.

Ati “Uko ubukungu buzamuka, abakenera umusaruro w’ubuhinzi, baba benshi, buri mwaka umubare w’abaturage uriyongera iyo ubukungu bwazamutse bagira n’ubushobozi bwo gushaka gukoresha wa musaruro w’ubuhinzi.”

Yasobanuye ko uretse abashaka kurya, usanga inganda n’abacuruzi na bo bakeneye wa musaruro ibyo byose bigatuma uhari uhenda.

Indi nkuru wasoma:Ishusho y’izamuka ry’ibiciro by’ibiribwa byikubye kabiri ku masoko yo mu Rwanda

Ibiciro by'ibiribwa bikomeje kuzamuka mu gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza