Ibiciro bishya by’imisoro ku bibanza byashyizwe ahagaragara

Yanditswe na Nkurunziza Ferdinand
Kuya 16 Mutarama 2020 saa 09:15
Yasuwe :
0 0

Itegeko rigenga umusoro ku butaka ni rimwe mu aherutse guteza impaka mu bantu, bamwe banenga ingingo ziryerekeyeho ku buryo byageze no mu Rukiko rw’Ikirenga.

Uyu musoro washyizweho mu rwego rwo kuvugurura imiturire hemezwa ko uzajya utangwa hashingiwe ku cyiciro cy’umujyi ubutaka busoreshwa buherereyemo; urwego rw’iterambere ubutaka busoreshwa buherereyemo; icyo ubutaka busoreshwa bwagenewe n’ikigero ubutaka bwateguweho ngo bukoreshwe icyo bwagenewe.

Iteka rya Minisitiri ryo ku wa 10 Mutarama 2020 rigena ibipimo fatizo n’ibindi bikurikizwa mu kugena umusoro wishyurwa ku bibanza, rivuga ko ibibanza biri mu turere dukorerwamo ibikorwa by’iterambere mu Mujyi wa Kigali n’indi mijyi y’uturere igaragaza iterambere by’umwihariko ahagenewe ibikorwa bibyara inyungu, bigomba gutanga umusoro uruta uw’ibibanza biri ahagenewe guturwa.

Iri teka rivuga kandi ko ibibanza biri mu mijyi bigomba kuzajya bisoreshwa amafaranga aruta ay’ibibanza biri mu duce tw’icyaro, nabwo hagashingirwa ku cyateganyijwe gukorerwa aho hantu ndetse n’ibikorwa remezo byahashyizwe.

Ibibanza biri mu Mujyi wa Kigali, ahagenewe ubucuruzi n’ inganda, kandi ubutaka bwaho bukaba bwarateguwe, bufite ibikorwaremezo by’ibanze, bizajya bisoreshwa amafaranga y’u Rwanda 250 kugeza kuri 300 kuri metero kare imwe y’ubutaka mu gihe cy’umwaka.

Ibibanza biri mu Mujyi wa Kigali ahagenewe ubucuruzi n’ inganda, ubutaka bwaho bwarateguwe ariko budafite ibikorwaremezo by’ibanze, bizajya bisoreshwa amafaranga y’u Rwanda 125 kugeza ku 150 kuri metero kare imwe y’ubutaka buri umwaka ; mu gihe ahari ubutaka butateguwe nta musoro uzajya uhakwa.

Ibibanza biri mu Mujyi wa Kigali ahagenewe guturwa, ubukerarugendo n’imyidagaduro, hateguwe kandi hafite ibikorwaremezo by’ibanze bizajya bisoreshwa amafaranga 200 kugeza kuri 250 kuri metero kare.

Abafite ibibanza mu masanteri aciriritse y’umujyi, hagenewe guturwa kandi ubutaka bwaho buteguwe bunafite ibikorwaremezo by’ibanze, bazajya basora amafaranga 100 kugeza ku 150; mu gihe ahagenewe ubucuruzi bazajya basora amafara 150 kugeza kuri 200.

Iri teka rivuga ko uturere tubarizwamo imijyi yunganira Kigali ndetse na tumwe mu duhana imbibi n’Umujyi wa Kigali dushyirwa mu cyiciro cya kabiri mu gusoresha ibibanza, bikubarizwa hashingiwe ku ngingo ziteganywa n’iri teka.

Utwo turere ni Muhanga, Rubavu, Musanze, Huye, Nyagatare, Karongi, Rusizi, Bugesera, Kamonyi na Rwamagana

Abafite ibibanza muri utu turere, bibarizwa ahagenewe ubucuruzi cyangwa inganda, bazajya basora amafaranga y’u Rwanda kuva ku 100 kugeza ku 140, mu gihe ikibanza kiri ku butaka bwateguwe kandi bufite ibikorwaremezo by’ibanze ariko kiri ahagenewe guturwa, ubukerarugendo n’imyidagaduro cyo gisoreshwa amafaranga y’u Rwanda 50 kugeza ku 100 kuri metero kare imwe ku mwaka.

Ikindi cyiciro cyakwitwa icya gatatu kibarizwamo uturere twa Nyabihu, Gicumbi, Rulindo, Kayonza, Ngoma, Kirehe, Gatsibo, Ruhango, Nyanza, Burera, Ngororero, Gakenke, Nyaruguru, Gisagara, Nyamagabe, Rutsiro na Nyamasheke.

Muri utu turere, umusoro ku bibanza biri mu masanteri y’ubucuruzi, santeri y’inkengero z’umujyi na santeri yo mu gace kandi hagenewe guturwa, bizajya bisoreshwa amafaranga y’u Rwanda 8 kugeza kuri 15 kuri metero kare imwe ku mwaka, mu gihe ubutaka bwateguwe kandi bufite ibikorwaremezo by’ibanze; naho ibibanza biri ahagenewe ubuhinzi n’ubworozi bisoreshwe amafaranga 2 kugeza ku 10 kuri metero kare imwe y’ubutaka.

Ahantu hafatwa nk’icyaro muri utu turere, ibibanza byaho biri ahagenewe guturwa kandi ubutaka bwaho bwarateguwe, bufite ibikorwaremezo by’ibanze bizajya bisoreshwa amafaranga 4 kugeza ku 8 y’u Rwanda kuri metero kare imwe y’ubutaka ku mwaka.

Kanda hano usome iri teka ingingo ku yindi
Izindi nkuru wasoma:

- Umusoro ku butaka wongerewe, hashyirwaho umwihariko ku bafite ibibanza bidakoreshwa

- Umusoro w’ubutaka utangwa ute?

- Itegeko rishya ry’ubutaka riri mu nyungu za nde?

Ibibanza biri mu bice by'icyaro n'ibyo mu mujyi bizajya bisoreshwa mu buryo butandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .