00:00:00 IGIHE NETWORK KN KINYARWANDA EN ENGLISH FR FRANCAIS

Habuze iki ngo Isoko Rusange rya Afurika ritangire gukora?

Yanditswe na Akayezu Jean de Dieu
Kuya 10 June 2022 saa 12:36
Yasuwe :

Minisitiri w’Ubucuruzi n’Inganda, Habyarimana Uwamaliza Béata yatangaje ko muri Nyakanga 2022, aribwo ibihugu bya Afurika bizatangira gukora ubucuruzi n’ubuhahirane hagendewe ku biteganywa n’amasezerano ashyiraho Isoko Rusange rya Afurika.

Ubusanzwe tariki 1 Mutarama 2021, nibwo amasezerano ashyiraho Isoko Rusange rya Afurika [Africa Continental Trade Free Trade Area], yatangiye kubahirizwa. Ni ukuvuga ko kuva icyo gihe imbogamizi zirimo imisoro, amategeko n’ibindi bitandukanye byatumaga ubucuruzi hagati ya Afurika bugenda biguru ntege byagakwiye kuba byarakuweho.

Icyorezo cya Covid-19 n’izindi mbogamizi zatumye bitagenda bityo kuko kugeza ubu iri soko bimeze nk’aho ritaratangira ariko hari icyizere cy’uko mu kwezi gutanga inzozi abakurambere ba Afurika barose zizaba impamo.

Ku ruhande rw’u Rwanda, rumaze igihe rutegura gahunda ihamye igaragaza umurongo ngenderwaho w’uko ruzaba ruhagaze kuri iri soko. Ni gahunda igaragaza inyungu u Rwanda ruzaba rufite kuri iri soko, ibyo ruzarijyanaho, ibizava mu bindi bihugu biza imbere mu gihugu n’ibindi.

Iyo gahunda yamurikiwe mu biganiro byahuje abayobozi muri Minisiteri y’Ubucuruzi n’Inganda binyuze mu rwego rwayo rushinzwe kugenzura ishyirwa mu bikorwa ry’Isoko Rusange rya Afurika, inzego zitandukanye za Leta, abafatanyabikorwa mu ngeri zitandukanye, Urwego rw’Abikorera n’abandi.

Rwiyemezamirimo John Bosco Kanyangoga wanakoze kuri iyo gahunda igaragaza uko u Rwanda ruzaba ruhagaze kuri iri soko rusange rya Afurika yasobanuye ko ubusanzwe ubucuruzi bw’u Rwanda n’Ibihugu byo muri Afurika bubarirwa muri 30% by’ubucuruzi bwose rukora hirya no hino ku Isi.

Ati “Aya masezerano arimo gukuraho inzitizi zaba iz’imisoro n’izidashingiye ku misoro, hari icyizere ko ubucuruzi bw’u Rwanda kuri uyu mugabane wa Afurika buziyongera. Icya mbere navuga ko ari ukubona isoko, kuko aya masezerano akuraho inzitizi zose kugira ngo ibicuruzwa by’u Rwanda bibashe koherezwa hirya no hino ku masoko yo muri Afurika.”

U Rwanda ni kimwe mu bihugu bya Afurika byafashe iya mbere mu kwemeza burundu amasezerano y’Isoko Rusange ry’uyu mugabane, yari yasinyiwe i Kigali muri Werurwe 2018. Iri soko rizatuma igihugu cyongera umusaruro w’ibyo cyohereza mu mahanga, ku buryo bizava ku gaciro ka miliyari 1,2 z’amadolari bikagera kuri miliyari 5$ mu myaka 10 iri imbere.

Amasezerano ashyiraho iri soko avuga ko ibicuruzwa 90% bizakurirwaho imisoro mu gihe biri gucuruzwa hagati y’Umugabane wa Afurika kandi byahakorewe, intego igomba kuzaba yagezweho nibura mu mwaka wa 2034.

Icyo gihe Afurika izaba ituwe n’abagera kuri miliyari 1,8 bavuye kuri miliyari 1,3 uyu munsi. Mu gihe rero Isoko Rusange rya Afurika rizaba impamo, byitezwe ko rizazahura ubukungu bw’uyu mugabane ndetse rigatanga imirimo irenga miliyoni 100 hirya no hino.

Kanyangoga ati “Icya mbere u Rwanda ruzaba rubonye isoko, icya kabiri ni ukubona ibikenerwa bikoreshwa mu nganda, iyo urebye nk’inganda ziri mu Rwanda, zikora ibintu bitandukanye, hari izikora amavuta, izikora ifu y’ingano n’izindi ariko ugasanga ibyo bakeneye ntabwo biva mu Rwanda, ugasanga barabigura mu bindi bihugu ariko bakabibona bibagoye kubera za nzitizi zari ziriho mbere.”

Yakomeje agira ati “Ubu rero abakeneye ibyo ngi byo ku Mugabane wa Afurika, iri soko rizaborohereza bajye babibona ku giciro cyiza kandi nta nzitizi bahuye na zo kugira ngo bakore byinshi bakoraga hano.”

U Rwanda ruriteguye…

Muri gahunda impuguke zakoze, zagaragaje ko u Rwanda ruzacuruza ibikorerwa mu nganda birimo imodoka zikorwa na Volkswagen, Ibitunganyirizwa mu nganda bikomoka ku buhinzi n’ubworozi.

Umuyobozi wa Volkswagen mu Rwanda, Serge Kamuhinda, yavuze ko iri soko baryitezeho byinshi kuko kugira ngo babashe kwagura ibyo bakora cyangwa batere imbere nk’uruganda baba bagomba kugira amasoko y’imbere mu gihugu no hanze yaho.

Ati “Iyo urebye muri uru rwego rwo gutunganya imodoka, inyinshi zikorwa n’u Bushinwa ni zo zoherezwa ku isoko rya Afurika, dufite amahirwe rero yo kuba twafata iryo soko ryose rya Afurika, tukajya twoherezaho imodoka ziteranyirizwa mu Rwanda, zikagurishwa mu bihugu bya Afurika nka za Ghana, Afurika y’Epfo, Nigeria n’ahandi.”

Umuyobozi wa Volkswagen Rwanda, Serge Kamuhinda yavuze ko biteze kongera umusaruro nyuma yo gutangira gucururiza ku Isoko Rusange rya Afurika

Kamuhinda yavuze ko kugira ngo bazabashe kugera kuri ibyo bitabiriye gahunda yo gukora imodoka zigezweho zikoranywe ikoranabuhanga kandi zikoresha amashanyarazi cyane ko nk’uko bigaragara ari zo zizaba zigezweho mu myaka iri imbere.

Minisitiri w’Ubucuruzi n’Inganda, Habyarimana Uwamaliza Béata yasobanuye ko imbogamizi zirimo icyorezo cya Covid-19 zatumye iri soko ridatangira mu 2021, nk’uko byanditse mu masezerano arishyiraho.

Ati “Gucuruza bizatangira muri Nyakanga uyu mwaka, bityo rero twebwe nk’u Rwanda twahisemo kwihutira gutegura uko tuzahitwara kugira ngo tubashe twagira inyungu zitandukanye zivuye muri iri soko rusange rya Afurika.”

Minisitiri Habyarimana yavuze ko ku ikubitiro u Rwanda ruzaheraho rujyana kuri iri soko ari ibyo rwabonye rushobora kubonamo inyungu ugereranyije n’ibindi bihugu bya Afurika.

Ibyo birimo ibitunganyirizwa mu nganda bikomoka ku buhinzi, ibikomoka ku bucukuzi bw’amabuye y’agaciro, ibijyanye no gukora imiti n’inkingo, serivisi zirimo kwakira inama n’ibindi.

Raporo ya Banki y’Isi igaragaza ko ishyirwa mu bikorwa ryuzuye ry’Isoko Rusange rya Afurika bizazamura amafaranga umugabane winjiza mu gukorana ubucuruzi hagati y’ibihugu byawo akagera kuri miliyari $430, mu myaka 10 iri imbere [mu 2030], icyo gihe kandi ubucuruzi bukorerwa hagati y’ibihugu bya Afurika buzava kuri 15% bukazaba bugeze kuri 55%.

Ibyo bizagira uruhare mu kongera ayo abacuruzi ku giti cyabo binjiza by’umwihariko abagore bakora ubucuruzi aho hazabaho ukwiyongera kwa 10,9% mu myaka 10 iri imbere.

Kugeza ubu ibihugu 43 muri 54 byasinye amasezerano y’Isoko Rusange rya Afurika bimaze kwemeza amasezerano yaryo burundu, mu gihe n’ibindi byamaze kugaragaza ubushake bwo kwemeza aya masezerano azahuriza hamwe abaturage barenga miliyari 1,2 batuye Afurika.

Abayobozi mu nzego zitandukanye baba bitabiriye ibi biganiro
Ibi biganiro byitabiriwe n'inzego zitandukanye
Umuyobozi Mukuru w'Urugaga rw'Abikorera mu Rwanda, PSF, Ruzibiza Steven yitabiriye ibiganiro ku myiteguro y'u Rwanda ku isoko rusange rya Afurika
Umuyobozi wa Komisiyo y’Ubukungu y’Umuryango w’Abibumbye muri Afurika y’Iburasirazuba, UNECA, Mama Keita na Minisitiri w’Ubucuruzi n’Inganda Béata Habyarimana ubwo bari bakurikiye ibiganiro
Umuyobozi w'Umuryango Pan African Movement Ishami ry'u Rwanda, Musoni Protais yitabiriye ibi biganiro
Visi Perezida w'Urugaga rw'Abikorera, Mubiligi Jeanne Françoise ni umwe mu bitabiriye ibi biganiro
Umuyobozi wa Komisiyo y’Ubukungu y’Umuryango w’Abibumbye muri Afurika y’Iburasirazuba, UNECA, Mama Keita yashimye u Rwanda rwateguye iyi gahunda iruganisha ku kubyaza umusaruro Isoko Rusange rya Afurika
Rwiyemezamirimo John Bosco Kanyangoga yasabye abikorera bagenzi be kwitegura gucuruza kuri iri soko
Minisitiri w'Ubucuruzi n'Inganda, Habyarimana Beata yavuze ko mu kwezi gutaha Isoko Rusange rya Afurika rizatangira
Abitabiriye batanze ibitekerezo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .