Andi mahirwe ku bahinzi b’urusenda bo mu Rwanda bazitabira imurikagurisha mu Bushinwa

Yanditswe na Uwimana Abraham
Kuya 28 Nzeri 2020 saa 01:24
Yasuwe :
0 0

Ikigo gikora ubuhinzi bw’urusenda, Gashora Farm, gikorera mu Karere ka Bugesera, kibona Imurikagurisha ryo mu Bushinwa kizitabira rya China International Import Expo (CIIE), nk’amahirwe yo gushimangira umubano mwiza wacyo n’abafatanyabikorwa, ku kugemura ibikomoka ku rusenda mu Bushinwa.

Mu imurikagurisha nk’iri ryabaye mu 2018 nibwo Gashora Farm yagiranye amasezerano afite agaciro ka miliyoni 2$ n’ikigo cya GK International Enterprises Company Limited yo kohereza ibikomoka ku rusenda mu Bushinwa.

Umuyobozi wa ’Gashora farm’, Twahirwa Dieudonné avuga ko aya masezerano bagiranye na GK International Enterprises Company Limited agena ko buri mwaka bazajya bohereza mu Bushinwa hagati ya toni ibihumbi 10 n’ibumbi 50 z’urusenda, ibi bikazakorwa mu gihe cy’imyaka itanu.

Twahirwa yatangaje ko ibi bishobora kujya bibinjiriza arenga miliyoni $30 y’inyungu, nk’uko yabitangarije Xhinhua.

Kuri ubu Gashora Farm igiye kongera kwitabira imurikagurisha riteganyijwe mu Ugushyingo, aho Twahirwa yabwiye ibiro ntaramakuru by’Abashinwa, ko biteze kuzabona andi masoko menshi yo kugemura ibikomoka ku rusenda mu Bushinwa.

Ati “Tuzaba turi kureba uburyo twashimangira umubano mwiza n’abakiriya bacu basanzwe, tuzanarebera hamwe uburyo twagumya kubahiriza ibikubiye mu masezerano ku mpande zombi, n’uburyo twarushaho gukoresha ikoranabuhanga kugira ngo ubucuruzi bwacu burusheho kugenda neza.”

Yakomeje kandi avuga ko biteze kuzabona abandi bafatanyabikorwa muri iryo murikagurisha, kuko ngo urusenda rwo mu Rwanda ruhingwa nta bitubura byongewemo kandi rukaba runaryoha byihariye rufite n’impumuro nziza.

Yongeyeho kandi ko u Bushinwa ari isoko ryiza kuko ibigo byaho byubahiriza amasezerano kandi bikanishyura neza, akaba abona ko rero ayo ari amahirwe ku bahinzi bo mu Rwanda ndetse n’abo mu Karere muri rusange.

Umuvugizi w’Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi (NAEB), Ntwali Pie, yavuze ko kugemura urusenda mu Bushinwa bifite inyungu nyinshi, harimo kongera umuvuduko w’ibyo u Rwanda rwohereza mu mahanga no gutanga akazi ku bahinzi n’abashoramari bo mu Rwanda.

Yakomeje avuga ko imurikagurisha rya CIIE ry’uyu mwaka ari amahirwe akomeye yo kuzamura ibikorerwa mu Rwanda.

NAEB yiteze ko muri CIIE hazabonekamo amahirwe yo kongera ibyo u Rwanda rwohereza mu mahanga ndetse no kubona abashoramari bo mu Rwanda babona abandi bafatanyabikorwa, biturutse kuri iryo murikagurisha.

Umuyobozi wa ‘Gashora farm’, Twahirwa Dieudonné yavuze ko biteguye kongera kubyaza amahirwe iri murikagurisha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .