COVID-19: Ubukungu bw’u Rwanda bwamanutseho 24% mu gihembwe cya kabiri cya 2020

Yanditswe na Uwimana Abraham
Kuya 23 Ugushyingo 2020 saa 09:57
Yasuwe :
0 0

Imibare ya Minisiteri y’Imari n’Igenamigambi igaragaza ko kugeza mu gihembwe cya kabiri cya 2020, ubukungu bw’u Rwanda muri rusange bwagabanutseho 24.1% ugereranyije n’uko bwari bwifashe mu 2019, bitewe n’icyorezo cya COVID-19 cyagize ingaruka ku bikorwa bitandukanye by’ubukungu.

Ibi Minisitiri w’Imari n’Igenamigambi, Dr Uzziel Ndagijimana, yabitangaje kuri uyu wa 23 Ukwakira 2020, ubwo yagezaga ku Nteko Rusange y’Umutwe w’Abadepite uko ubukungu n’ingengo y’imari by’igihugu bihagaze, nk’uko biteganywa n’itegeko.

Imibare y’umwaka wa 2019 igaragaza ko mu gihembwe cya kabiri cy’uwo mwaka ubukungu bwazamutse ku kigero cya 12.3%, mu gihembwe cya gatatu bukagera kuri 10.9%, naho mu cya kane bikaba 8.4%.

Bitandukanye n’ibipimo by’uyu mwaka, aho mu gihembwe cya mbere ubukungu bwari kuri 3.6%, hanyuma mu cya kabiri bukamanuka kugeza ku gipimo cya -12.4%, byumvikane ko bwamanutse ku kigero cya 24.1% ugereranyije n’igihembwe cya kabiri cya 2019.

Dr Ndagijimana yavuze ko kumanuka k’ubukungu kwatewe n’uko ari cyo gihe igihugu cyose cyari muri gahunda ya Guma mu rugo ibikorwa byinshi byarahagaze.

Yagize ati “Mu gihembwe cya kabiri kuva mu kwa Kane kugera mu kwa Gatandatu, niho noneho ingaruka za COVID-19 zari ziremereye cyane, harimo n’igihe twamaze mu ngo ibintu byinshi bihagaze, aha ho ubukungu bwaraguye cyane mu byiciro byose.”

Mu byiciro by’ubukungu byazahajwe cyane n’iki cyorezo harimo ubwikorezi, ubucuruzi, uburezi, ubwubatsi, kohereza ibicuruzwa mu mahanga, hoteli na za resitora ndetse n’ubuhinzi.

Dr Ndagijimana yavuze ko n’ubwo ubukungu bw’u Rwanda bwazahaye cyane by’umwihariko muri Guma Murugo, kuva ibikorwa bimwe byatangira gufungurwa hagenda hagaragara icyizere ko ubukungu buzazahuka ndetse bikomeje muri uwo mujyo, umwaka utaha ibintu bikazaba byasubiye mu buryo.

Imibare ya Minisiteri yavuye mu gipimo gikusanya iboneka vuba igaragaza ko ubukungu bugenda buzamuka, uhereye ku gihe cya nyuma ya Guma Murugo, n’ubwo hakiri urugendo rurerure.

Minisitiri Ndagijimana yagize ati “Biraduha icyerekezo ko kuva muri Guma mu rugo ukagera aho tugeze ubu, urabona ko tugenda tuzamuka, turazamuka ariko turacyari munsi ya zeru, ariko nibura biragaragara ko icyerekezo rusange tugenda tuvayo, ni ikimenyetso cyiza cyo kuzahuka.”

Mu bindi byagizweho ingaruka n’icyorezo harimo ibigendanye n’imirimo, icyorezo cyatumye hari imirimo myinshi ihagararara ndetse n’aho ibintu bitangiye kujya mu buryo gusubira mu mirimo ni buke buke.

Imibare y’igenzura rikorwa buri mezi atatu igaragaza uko imirimo ihagaze, yerekana ko mu kwezi kwa Kabiri mbere y’uko Coronavirus igera mu Rwanda hari imirimo 3,568,934 hanyuma muri Gicurasi ubwo icyorezo cyari kirimbanyije yaragabanutse igera kuri 31, 9914, ni ukuvuga ko yagabanutseho 10%.

Kuri ubu imibare iheruka muri Kanama, igaragaza ko imirimo yiyongereye ikagera kuri 3,667,611, ikanaruta iyari ihari mbere y’uko icyorezo kigera mu Rwanda. Muri rusange kuva muri Gashyantare kugera muri Kanama imimo yazamutseho 3%. Iyo ikaba ari imibare ya rusange utarebeye kuri buri rwego rw’umurimo.

Dr Ndagijimana yagize ati “Urebye kuri buri rwego rw’imirimo usanga hari izikiri hasi cyane bitewe n’imiterere yazo, nk’urwego rujyanye n’ubuhanzi, imyidagaduro biracyari inyuma kuko ibyinshi ntibirarekurwa, urwego rw’uburezi, amashuri yari atarafungurwa afunguwe vuba aha ngaha, twari twaramanutseho, ubuhinzi n’uburobyi nabyo byaramanutse kubera ko uburobyi bwari bwarahagaze mu gihe runaka.”

Inzego z’imirimo zazamutse cyane harimo itumanaho ryazamutseho ku kigero cya 90%, ubwubatsi bwazamutseho 84%, ubucuruzi buciriritse n’ubukanishi byazamutseho 44%, ubukorikori 53%, naho serivisi zo gucumbikira abantu n’amaresitora byazamutseho 5%.

Ni mu gihe inzego z’imirimo zikigaragaramo ibibazo kugeza ubu harimo ubuhanzi n’imyidagaduro byamanutse ku kigero cya -40%, uburezi bwamanutse ku kigero cya -27%, ubuhinzi n’uburobyi bimanuka kuri -24%.

Minisitiri Ndagijimana yavuze ko ubucuruzi mpuzamahanga nabwo buri mu byagizweho ingaruka, ibitumizwa ndetse n’ibyoherezwa mu mahanga byose byaramanutse cyane, gusa kuri ubu imibare igaragaza ko bigenda bizamuka n’ubwo bitarasubira mu buryo neza.

Imibare y’Ikigega Mpuzamahanga cyita ku Bukungu (IMF), igaragaza ko ku Isi yose muri rusange bitewe na COVID-19, ubukungu bwagabanutse kugera ku kigero cya -4.4%, bikaba byitezwe ko mu mwaka utaha wa 2021 bushobora kuzazamuka ku kigero cya 5.2%, mu gihe icyorezo kitakongera kuzura umugara.

Minisitiri w'Imari n'Igenamigambi, Dr Ndagijimana Uzziel, ageza ku Nteko Rusange y'Umutwe w'Abadepite uko ubukungu buhagaze
Dr Ndagijimana Uzziel yavuze ko mu gihe cya Guma mu Rugo ubukungu bwazahaye cyane kubera imirimo myinshi yahagaze
Abadepite bashimye imbaraga ziri gushyirwa mu kuzahura ubukungu bw'igihugu bwari bwarazahajwe na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .