CBA yahindutse NCBA Bank Rwanda Plc nyuma yo kwihuza na NIC Group Plc

Yanditswe na IGIHE
Kuya 13 Mutarama 2020 saa 07:19
Yasuwe :
0 0

Banki ya CBA Rwanda [Commercial Bank of Africa, (Rwanda)] , yatangaje ko nyuma yo kwihuza n’Ikigo cy’Imari, NIC Group Plc, ubu yamaze guhindura izina yitwa NCBA Bank Rwanda Plc.

Ubuyobozi bw’iyi banki bwavuze ko taliki 15 Ukwakira 2019 aribwo Inama y’Ubutegetsi ya CBA yafashe icyemezo cyo guhindura iri zina rya Commercial Bank of Africa (Rwanda) Plc ikitwa NCBA Bank Rwanda Plc.

Ibi bikurikira ukwihuza kwa Commercial Bank of Africa Ltd na NIC Group Plc kwabaye tariki 1 Ukwakira 2019, bibyara NCBA Group PLC nka sosiyete ibumbye izindi ari nayo munyamigabane wa Commercial Bank of Africa (Rwanda) Plc.

Nyuma yaho, taliki 31 Ukuboza 2019, Banki Nkuru y’u Rwanda, BNR, yatanze uburenganzira bushya bwo gukora nka Banki y’Ubucuruzi mu izina rishya rya NCBA Bank Rwanda Plc.

Umuyobozi Mukuru wa NCBA Bank Rwanda PLC, Lina Higiro yagize ati “Twishimiye kwakira iri zina n’ikirango bishya, ibi bizafasha banki yacu gukomeza gutera imbere, kugira indangagaciro no kugira umurage wihariye dukomora kuri NCBA Group Plc.”

Yakomeje agira ati “Iri zina rishya riratwongerera ingufu n’ubushake bwo gushyira imbere ya byose abakiliya bacu. Hamwe n’ubushobozi mu by’imari, ubuhanga mu mikorere, uburyo tugera mu karere na serivisi nyinshi kandi nziza;NCBA Bank Rwanda Plc igiye kuba banki ifite umutungo uhagije kandi ikomeye mu byo gukorana n’ ibigo by’ubucuruzi binini n’ibiciritse, ikodeshagurisha, ndetse inateye imbere mu ikoranabuhanga mu karere.”

NCBA Group Plc ifite amashami arenga 100 mu bihugu bitanu birimo u Rwanda, Kenya, Uganda, Tanzania na Côte d’Ivoire. .

Kugeza ubu ifite abakiliya barenga miliyoni 40, ikaba ari nayo banki ifite abakiliya benshi ku mugabane wa Afurika.

Iyi banki yatangaje ko mu gihe kitarenze ukwezi izaba isoje igikorwa cyo guhindura ibirango n’izina biri ku mashami yayo.

Mu mpera za 2016 nibwo CBA (Commercial Bank of Africa) ifite inkomoko muri Kenya yahawe uburenganzira bwo gukorera mu Rwanda nk’ikigo cy’imari iciriritse (microfinance bank) maze ihinduka banki y’ubucuruzi mu 2018, nyuma yo kugura Crane Bank Rwanda nayo yakoreraga mu Rwanda kuva 2014.

CBA Rwanda [Commercial Bank of Africa, (Rwanda)] , yatangaje ko nyuma yo kwihuza n’Ikigo cy’Imari, NIC Group Plc, ubu yamaze guhindura izina yitwa NCBA Bank Rwanda Plc

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .