BPR, BK Group n’u Bushinwa mu ndashyikirwa za Expo 2019 zashimiwe (Amafoto & Video)

Yanditswe na Cyprien Niyomwungeri
Kuya 10 Kanama 2019 saa 10:15
Yasuwe :
0 0

Urugaga rw’abikorera mu Rwanda (PSF) rwashimiye indashyikirwa mu byiciro bitandukanye zagaragaje ubudasa mu imurikagurisha mpuzamahanga rya 2019, rimaze ibyumweru bitatu ribera i Gikondo mu Mujyi wa Kigali.

Kuva tariki 22 Nyakanga kugeza tariki 11 Kanama, abaturarwanda barasura ubutitsa imurikagurisha mpuzamahanga rya 22 ryitabiriwe n’abamurika barenga 500.

Ku mugoroba wo kuri uyu wa Gatanu, Urugaga rw’abikorera rwashimiye ababaye indashyikirwa muri iri murikagurisha mpuzamahanga, aho Inyange Industries yahize abamuritse ibijyanye no kongerera agaciro umusaruro w’ubuhinzi n’ubworozi.

Mu bijyanye n’inganda, Kigali Leather Ltd, rutunganya impu rugakoramo inkweto rwahize abandi naho mu nganda zikora ibijyanye n’ikoranabuhanga n’itumanaho, igihembo cyegukanwa na Mara Phones.

Mara Phones ni telefoni za mbere zigezweho ‘Smartphone’, zakorewe mu Rwanda n’Ikigo Mara Corporation Ltd. Muri Gicurasi zamurikiwe bwa mbere i Paris mu nama ya VivaTech ihuriza hamwe ibigo bikora ishoramari mu ikoranabuhanga, yaba ibito, ibimaze gushinga imizi n’abayobozi batandukanye.

Izamuritswe zirimo Mara Z ifite ikoranabuhanga rishobora kumenya isura ya nyirayo ikazagurishwa ibihumbi 180 Frw naho Mara X ikazagurishwa ibihumbi 125 Frw.

Banki ya Kigali Group yashimwe nk’indashyikirwa mu cyiciro cy’ibigo by’imari naho u Bushinwa buhabwa igihembo cy’igihugu cyahize ibindi muri imurikagurisha mpuzamahanga rya 2019.

U Bushinwa ni kimwe mu bihugu bitanu byitabiriye bwa mbere imurikagurisha mpuzamahanga ribera i Gikondo, aho bwo, Benin, Côte d’Ivoire, Madagascar na Indonesia bohereje abamurika bwa mbere. Muri rusange Expo 2019 yitabiriwe n’ibihugu 25.

Hahujwe ibyiciro byose by’ababaye indashyikirwa mu kumurika, BPR Atlas Mara, yegukanye igihembo nyamukuru, ikurikirwa n’uruganda Hippo Roofing Rwanda, rukora ibikoresho by’ubwubatsi ruza ku mwanya wa kabiri naho Ikigo cy’Igihugu cy’ubwiteganyirize (RSSB) kiza ku mwanya wa gatatu.

Umuyobozi Mukuru wa BPR Plc Part of Atlas Mara, Maurice Toroitich, nyuma yo guhabwa igihembo yabwiye IGIHE ko ari ibyishimo kuba mu ndashyikirwa zose ari bo batoranyijwe bakegukana igihembo nyamukuru.

Ati “Ni ibyishimo kuri twe kuba duhembewe kuba indashyikirwa kurenza abandi mu imurikagurisha, kuko ikipe yacu yakoze byinshi ishyiramo imbaraga mu kumurika ibikorwa byacu mu imurikagurisha mpuzamahanga. Nka banki biradutera imbaraga zo gukomeza kuba ikigo cyiza nk’uko bishoboka”.

Mu imurikagurisha mpuzamahanga rya Kigali ribaye ku nshuro ya 22 (Expo2019), Banki y’Abaturage y’u Rwanda (BPR Plc Part of Atlas Mara) yegereje abayigana serivisi zayo, ibasobanurira byimbitse ibyihariye kuri konti z’ubwizigame n’inguzanyo zifasha abantu gutunga amacumbi n’imodoka bitabagoye.

PSF kandi yashimiye abashoramari beza bateje imbere ubucuruzi mu Rwanda, aho ibihembo byegukanywe na Bralirwa, Skol Rwanda na Gorilla Investment Company.

Umunyamabanga mu ruganda rwa Skol Brewery Limited, Natasha Irakoze, avuga ko kwakira iki gihembo ari ‘icyerekana ko abakiriya bacu batwizera kandi bashaka ko twatera imbere cyane, nibo batumye turi hano kandi tugahabwa n’iki gihembo’.

Ati “Icyo twakoze ni uko twasigasiye ubwiza buhebuje bw’inzoga zacu bituma twigarurira abakiriya benshi bituma tugenda dukura cyane. Iki gihembo ni icy’umushoramari mwiza, ntabwo bivuze ko washoye menshi ahubwo ayo washoye aba arimo kwiyongera, abakiriya biyongera”.

Hanashimiwe kandi abafasha ubucuruzi mu Rwanda batanga serivisi nziza ari bo; Kenya Port Authority, Tanzania Port Authority na Trade Mark East Africa.

Umuyobozi Mukuru wa PSF, Bapfakurera Robert, yashimiye abitabiriye imurikagurisha rya 22, ababwira ko wabaye umwanya mwiza wo kumenyekanisha ibyo bakora kandi biri mu murongo mwiza wo kwagura amasoko.

Minisitiri w’ubucuruzi n’inganda, Soraya Hakuziyaremye, yashimiye abantu bose baturutse amahanga yose bakaza kumurika ibyo bakora mu Rwanda, ashimira abagiye kubisura no kubigura anizeza ko u Rwanda rutazatezuka ku gushyigikira ubucuruzi kuko ari inkingi y’iterambere.

Abitabiriye uyu muhango babanje kuryoherwa n'imbyino nyarwanda
Abaturutse mu bihugu bitandukanye bitabiriye uyu muhango
Umuyobozi wa PSF Ruzibiza Stephen
Minisitiri Hakuziyaremye aganira n'abacuruzi bari bicaranye
Abayobozi batandukanye bitabiriye uyu muhango
Bralirwa yahawe igihembo cy'umushoramari mwiza
Byari ibyishimo ubwo abacuruzi batandukanye bashimirwaga
Umunyamabanga mu ruganda rwa Skol Brewery Limited, Natasha Irakoze ahabwa igihembo cyo gushimira uru ruganda kuba umushoramari mwiza
Minisitiri Hakuziyaremye ashyikiriza igihembo umuyobozi wa Tanzania Port Authority
Ibigo byabaye indashyikirwa muri Expo 2019 byashimiwe
Umuyobozi ushinzwe Ishami ry'itumanaho muri RSSB,Moses Kazoora ashyikirizwa igihembo cy'iki kigo
Minisitiri Hakuziyaremye ashyikiriza igihembo Umuyobozi Mukuru wa BPR Plc Part of Atlas Mara, Maurice Toroitich igihembo
Ibigo bitatu byahize ibindi mu imurikagurisha mpuzamahanga rya 22 ribera i Gikondo
Perezida w’Urugaga rw’abikorera Bapfakurera Robert yavuze ko abikorera bagomba kugira uruhare mu iterambere ry’ibihugu
Minisitiri w’ubucuruzi n’inganda Soraya Hakuziyaremye yashimiye abitabiriye Expo 2019
Umuyobozi w'Urugaga rw'abikorera, Ruzibiza Stephen yashimiye abahembwe n'abitabiriye imurikagurisha bose
Itorero ribyina bya Kinyarwanda ryashimishije benshi biganjemo abaturutse muri Aziya n’ahandi
Imbyino zigezweho nazo zahagurukije benshi barabyina biratinda
Iri tsinda ry'abanyamuziki ryishimiwe cyane
Yasubiragamo indirimbo zikunzwe maze abantu bakabyina

Kureba ayandi mafoto menshi wakanda hano

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza