BK yatangaje ba rwiyemezamirimo 12 bazavamo abahabwa inguzanyo itagira inyungu mu ‘Urumuri Initiative’

Yanditswe na Habimana James
Kuya 14 Ugushyingo 2019 saa 09:38
Yasuwe :
0 0

Ba rwiyemezamirimo 12 bageze mu cyiciro cya nyuma cy’abazahabwa inguzanyo itagira inyungu muri gahunda yiswe ’Urumuri’ yo guteza imbere imishinga y’ibikorerwa mu Rwanda, bongeye kugaragaza imishinga yabo imbere y’abakeramurampaka.

Muri Gicurasi uyu mwaka nibwo Banki ya Kigali (BK) ifatanyije n’Ikigo Inkomoko Entrepreneur Development, batangaje ba rwiyemezamirimo 25 bagombaga gutoranywamo aba 12.

Kuri uyu wa Kane tariki 14 Ugushyingo 2019 nibwo hamenyekanye 12 na bo bongeye kugaragaza imishinga yabo imbere y’abakemurampaka, kugira ngo bazatoranywemo abazahabwa miliyoni 25 Frw mu muhango uzaba tariki 22 uku kwezi.

Urumuri Initiative yatangijwe mu 2017 ubwo Banki ya Kigali yizihizaga isabukuru y’imyaka 50, igamije gutera inkunga ba rwiyemezamirimo bakiri bato bafite imishinga ishobora kuvamo ubucuruzi bukomeye mu gihe kiri imbere ariko ahanini harebwa ku bikorerwa mu Rwanda.

Umuyobozi wa Banki ya Kigali, Dr Diane Karusisi, yashimiye aba ba rwiyemezamirimo 12 avuga ko bakoresheje ingufu kugira ngo babe bahageze.

Yagize ati “Iyi ni inshuro ya gatatu iki gikorwa kibaye, iki ni igikorwa kigaragaramo abakiri bato aho bagaragaza ibikorwa by’indashyikirwa bikazafasha imishinga yabo gukomera mu gihe kiri imbere, BK icyo ikora ni uko ibafasha ku buryo imishinga yabo igera ku rwego rwiza kandi nta nyungu batanze.”

Aba ba rwiyemezamirimo bari bamaze amezi atandatu banahabwa ubumenyi bwo gucunga imishinga yabo, gucunga abakozi, kwamamaza ibikorwa byabo, gushaka amasoko n’ibindi byose bibafasha gukomeza imishinga.

Aya masomo bayahabwa na Inkomoko Entrepreneur Development, ikigo gifasha abafite imishinga igamije kwihangira imirimo.

Mutuyimana Deogratias ufite ikigo gikora Imbabura zikoresha ikara rimwe, ni umwe muri aba 12 batoranyijwe.

Avuga ko naramuka ahawe iyi nguzanyo bizamufasha kwagura isoko no gutanga akazi ku bantu benshi kuko ubu afite umunani akoresha mu gihe yatangiye ari umwe, akazarushaho no kwagura ubucuruzi bwe.

Ati “Natangiriye ku mafaranga atarenze ibihumbi 100 Frw nkora Imbabura zitarenze eshanu, ariko kuri ubu mfite abakozi umunani kandi nshobora no gukora Imbabura zigera kuri 200 ku kwezi.”

Indi mishinga yatoranyijwe harimo ukora insimburangingo n’inyunganirangingo z’abafite ubumuga, ikora imyambaro, ubuhinzi n’ubworozi, ikora imitako mu mahembe n’indi.

Umuyobozi ushinzwe kumenyekanisha ibikorwa muri Banki ya Kigali, Nshuti Thierry, avuga ko aba ba rwiyemezamirimo uretse kuba bahabwa ubu bufasha bw’amafaranga, banafashwa gucunga neza imishinga yabo.

Ati “Uyu mwaka tuzatanga miliyoni 25 aba bantu bazagabana, uretse aya mafaranga ariko tubanza no kubaha amahugurwa kandi ibyo byose ni ikiguzi gikomeye, muri rusange mu myaka itatu ishize tumaze gutangamo arenga miliyoni 180 Frw.”

Avuga ko aya mafaranga kandi afasha aba ba rwiyemezamirimo gukora bagatera imbere kuko nta nyungu batanga, ariko aboneraho kuvuga ko byaba bibabaje mu gihe waba utishyuye bikazarinda kukugiraho ingaruka.

Umuyobozi w’agateganyo wa Inkomoko Entrepreneur Development, Olive Ashimwe, avuga ko ubu bufatanye hagati na BK, intego yabwo ari ugutuma aba ba rwiyemezamirimo batera imbere ariko bagateza imbere n’igihugu cyabo.

Ati “Mu mezi atandatu bigishwa ubumenyi bukomeye mu gucunga imishinga yabo, na nyuma yo kubaha aya mafaranga dukomeza no kubakurikirana kugira ngo bakomeza gutera imbere kandi bihe amahirwe n’abandi bakiri bato.”

Muri izi miliyoni 25 Frw aba ba rwiyemezamirimo bazagabana, urugero niba nk’umwe ahawe miliyoni 5 Frw bitewe n’igihe bazaba bumvikanye kuzaba yishyuye, n’ubundi azasubiza za miliyoni 5 Frw nta nyungu arengejeho.

Bamwe muri ba rwiyemezamirimo bageze muri 12 ba nyuma
Abakemurampaka batangaga amanota kuri aba ba rwiyemezamirimo
Abagaragaje imishinga yabo harimo n'abakora imitako mu mahembe y'inka
Umuyobozi w’agateganyo wa Inkomoko Entrepreneur Development, Olive Ashimwe , yavuze ko bafasha ba rwiyemezamirimo kwaguka nabo bagatanga akazi
Uwamahoro Angelique ufite ikigo cyutwa Ortho-Promed gikorera insimburangingo n’inyunganirangingo z’abafite ubumuga
Umuyobozi ushinzwe kumenyekanisha ibikorwa muri Banki ya Kigali, Nshuti Thierry, avuga ko aba ba rwiyemezamirimo banigishwa no gukorana na banki
Ba rwiyemezamirimo 12 bageze mu cyiciro cya nyuma cya Urumuri Initiative

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza