Babiri batsindiye moto na mudasobwa muri poromosiyo ‘mu Munyenga na Mastercard” ya Banki ya Kigali

Yanditswe na Dufitumukiza Salathiel
Kuya 1 Mutarama 2021 saa 07:57
Yasuwe :
0 0

Banki ya Kigali kuri uyu wa Kane tariki 31 Ukuboza 2020, cyashyikirije abakiriya bayo babiri impano batsindiye muri poromosiyo yiswe “Mu Munyenga na Mastercard” zirimo moto na mudasobwa.

Igikorwa cyo kubagezaho impano zabo cyabereye i Gikondo, aho Banki ya Kigali yari imaze ibyumweru bitatu imurikira ibikorwa byayo mu imurikagurisha mpuzamahanga rya 2020.

Mu Munyenga na Mastercard ni poromosiyo yateguwe na Banki ya Kigali, aho abakiliya bayo bashishikarizwa kwishyura ibicuruzwa na serivisi bakoresheje uburyo bw’ikoranabuhanga rya Mastercard, maze ukoze igikorwa gifite agaciro k’agera ku bihumbi 25 Frw kuzamura akinjira mu banyamahirwe batsindira ibihembo bitandukanye.

Ibihembo bihabwa abatsinze birimo moto, mudasobwa, ikarita yo guhahiraho no gusubizwa amafaranga atari munsi y’ibihumbi 55 Frw, mu gihe igihembo nyamukuru kizatangwa ari imodoka.

Uwineza Florence wegukanye moto, yavuze ko nubwo asanzwe akoresha Mastercard cyane yatunguwe no kumva ahamagawe ko yatsinze, cyane ko atari azi ko poromosiyo iri kuba.

Yagize ati “Naratunguwe cyane, natunguwe n’iki gihembo, ibyishimo byandenze.”

Yavuze ko ikarita ya Mastercard imufasha cyane imurinda gutakaza amafaranga ya hato na hato.

Yagize ati ”Bikuvanaho bya byago byo kuba umuntu yagukurikira kubera ko yakubonye ukura amafaranga mu isakoshi, akaza ashaka kukwiba.”

Rutaganira Etienne wegukanye mudasobwa we avuga ko “yahamagawe abwirwa ko yatsindiye mudasobwa ’Mu Munyenga na Mastercard’, agakeka ko ahamagawe n’abatekamutwe.”

Ati “Barampamagaye nimugoroba ndimo gutaha bati turi abakozi bo muri BK, watsinze. Nti ‘ni byo’ bati yego wakoresheje Mastercard wishyura.”

Abatsinze bombi bashishikarije abandi gukoresha ikoranabuhanga mu guhererekanya amafaranga kuko usibye gutsindira ibihembo, aribwo buryo bworoshye kandi butekanye kurusha gahanahana amafaranga mu ntoki.

Umuyobozi ushinzwe serivisi y’Amakarita muri Banki ya Kigali, Byukusenge Tharcissie, yavuze ko iyo poromosiyo iri muri gahunda icyo kigo cyihaye yo kwinjiza abakiriya bacyo mu buryo bwo guhererekanya amafaranga hakoreshejwe ikoranabuhanga (Cashless).

Yagize ati “Turi gufatanya n’igihugu gushishikariza Abanyarwanda gukoresha cashless kugira ngo umukiriya ajye abasha kwishyura atagombye gutwara amafaranga mu ntoki cyane cyane muri ibi bihe bya COVID-19. Murabizi ko guhererekanya amafaranga biri mu bintu biyanduza.”

Yakomeje ati “Icyo duha agaciro cyane ni uko Umunyarwanda yamenya agaciro ko gukoresha ubundi buryo bwo kwishyura butari uguhererekanya amafaranga.”

Mu ’Munyenga na Mastercard’ yatangijwe ku wa 16 Ukuboza 2020, ikaba izageza ku wa 31 Mutarama 2021 ari na wo munsi hazatangwa imodoka nk’igihembo nyamukuru muri poromosiyo.

Kuva yatangira hamaze gutangwa ibihembo birimo gusubizwa amafaranga ibihumbi 55 Frw ku bantu 20, tike zo guhahiraho z’agaciro k’ibihumbi 50 Frw ku bantu 20, mudasobwa ebyiri na moto imwe.

Ubuyobozi bwa Banki ya Kigali bwavuze ko ibihembo bizatangwa muri iyi poromosiyo byose hamwe bifite agaciro ka miliyoni 55 Frw.

Uwineza Florence yishimiye guhabwa moto nyuma yo gukoresha cyane ikarita ya Mastercard yishyura
Uwineza yavuze ko ikarita ya Mastercard imufasha cyane imurinda gutakaza amafaranga ya hato na hato.
Rutaganira yahembwe mudasobwa nziza kubera kwishyura yifashishije ikarita ya Mastercard
Igihembo nyamukuru cyatanzwe kuri uyu wa gatanu ni moto ariko poromosiyo irakomeje
Rutaganira Etienne yavuze ko kwishyura akoresheje Mastercard aribwo buryo bwizewe kandi butekanye
Uwineza Florence ni we wegukanye moto kubera gukoresha cyane ikarita ya Mastercard yishyura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .