Miliyari 227 Frw zahererekanyijwe mu buryo bwa “Mobile Banking” mu 2020

Yanditswe na Iradukunda Serge
Kuya 5 Werurwe 2021 saa 07:49
Yasuwe :
0 0

Raporo ya Banki Nkuru y’Igihugu igaragaza politiki y’ifaranga n’ubutajegajega n’iterambere ry’urwego rw’imari, yagaragaje ko mu 2020 guhererekanya amafaranga hakoreshejwe ikoranabuhanga byarushijeho kuzamuka cyane, ahanini biturutse ku ngamba zashyizweho mu kwirinda COVID-19.

Mu 2020 amafaranga yahererekanyijwe hagati y’amakonti yo muri banki hakoreshejwe telefone yazamutse ku kigero cya 224% ava kuri miliyari 85 Frw yariho mu 2019 agera kuri miliyari 277 Frw.

Raporo igaragaza kandi ko ibikorwa byo guhererekanya aya mafaranga ava kuri konti zo muri banki ajya kuri telefoni byazamutse ku kigero cya 183% biva ku nshuro miliyoni ebyiri bigera kuri miliyoni esheshatu.

Uku kuzamuka mu ngano n’inshuro kw’amafaranga ahererekanywa hakoreshejwe telefoni, BNR igaragaza ko byaturutse ahanini ku ngamba zashyizweho hagamijwe kwirinda icyorezo cya COVID-19.

Uburyo bwo guhererekanya amafaranga ava kuri konti za banki hakoreshejwe internet buzwi nka ‘internet banking’ nabwo bwarushijeho kwitabirwa mu 2020. Muri uwo mwaka, banki zifite iri koranabuhanga zavuye ku icyenda zariho mu Ukuboza 2019 zigera kuri 13 mu 2020.

Umubare w’abakoresha iri koranabuhanga mu 2020 nawo wazamutseho 9% uva ku bantu 91 825 barikoreshaga mu Ukuboza 2019 ugera ku bantu 99 810 mu 2020.

Ibikorwa byo guhererekanya amafaranga hakoreshejwe internet byavuye kuri 1 352 301 byariho mu 2019 bigera kuri 1 445 174, bivuze ko habayeho izamuka rya 7%.

Ingano y’amafatanga ahererekanywa muri ubu buryo nayo yarazamutse agera kuri miliyari 2.362Frw avuye kuri miliyari 2.276 yariho mu 2019.
Uretse ubu buryo bubiri n’ubundi buryo bwo guhererekanya amafaranga hakoreshejwe ikoranabuhanga bwarushijeho kwitabirwa mu 2020.

Imibare ya BNR yerekana ko umubare w’utumashini dukoreshwa mu kwishyura tuzwi nka ‘POS’ wazamutse uva kuri 3477 wariho mu 2019 ugera kuri 4335 mu Ukuboza 2020.

Ubundi buryo bwo guhererekanya amafaranga hakoreshejwe ikoranabuhanga bwarushijeho kwitabirwa ni ubwo kuri telefone buzwi nka Mobile Money.

Mu 2020 umubare w’abakoresha Mobile Money mu buryo buhoraho (nibura bohereje cyangwa bakakira amafaranga mu minsi 90 ishize) wazamutseho 13% ugera ku bantu 4 688 124 uvuye kuri 4 139 075 wariho mu 2019.

Muri 2020 ibikorwa byo guhererekanya amafaranga kuri Mobile Money nawo wazamutseho 85%,uva ku bikorwa miliyoni 378,8 byari bifite agaciro ka miliyari 2349 Frw mu 2019 ugera ku bikorwa miliyoni 701 bifite agaciro ka miliyari 7 177 Frw.

Umubare w’aba-agent batanga izi serivisi za Mobile Money nawo mu 2020 wazamutseho 33% uva ku bantu 98 359 mu 2019 ugera ku bantu 131 173.

BNR igaragaza ko mu 2020 umubare w'abahererekanya amafaranga hakoreshejwe ikoranabuhanga warushijeho kwiyongera ahanini biturutse ku ngamba zashyizweho zo kwirinda COVID-19

COVID-19 yangije byinshi

Nubwo ibijyanye no guhererekanya amafaranga hakoreshejwe ikoranabuhanga byazamutse mu Rwanda ahanini biturutse ku ngamba zashyizweho mu kwirinda COVID-19, iki cyorezo cyanahungabanyije byinshi mu bukungu bw’u Rwanda.

Muri iyi raporo, BNR igaragaza ko mu 2020 ubukungu bw’u Rwanda bwasubiye inyuma ahanini bitewe n’icyorezo cya COVID-19, cyatumye ingano y’ibintu byakenerwaga igabanuka ndetse kigakoma mu nkokora imirimo yo gutunganya ibintu bitandukanye.

Imibare igaragaza ko mu bihembwe bitatu by’umwaka wa 2020, Umusaruro Mbumbe w’Igihugu wagabanutseho 4,1%, mu gihe nk’iki mu mwaka wari wabanje wa 2019 wari wazamutseho 8,3%.

Mu nzego z’igihugu zashegeshwe cyane na COVID-19 harimo urwa serivisi mu busanzwe rwatangaga ibingana na 49% mu musaruro mbumbe w’igihugu. Mu bihembwe bitatu bya 2020 amafaranga ava muri uru rwego yagabanutseho 6% mu gihe mu mwaka wari wabanje wa 2019 yari yazamutseho 8,5%.

Urundi rwego rwashegeshwe cyane ni urw’inganda kuko imibare igaragaza ko iterambere ryarwo ryasubiye inyuma ku kigero cya 6,1% mu 2020 mu gihe mu mwaka wari wabanje rwari rwazamutseho 17,4%.

Nubwo ingaruka za COVID-19 ku bukungu bw’u Rwanda ari nyinshi BNR igaragaza ko hari icyizere ko ibintu bizongera gusubira ku murongo muri uyu mwaka wa 2021.

BNR yatangaje ko kuzahuka ku rwego rw’imari mu Rwanda bizashingira ku ishusho icyorezo kizagenda gifata n’uko ibikorwa by’ubukungu bizagenda bikorwa.

Mu nzego z’ubukungu zizarushaho gukora neza muri uyu mwaka BNR ivuga ko harimo amabanki n’ibigo by’imari bito n’ibiciriritse cyo kimwe n’ibigo by’ubwishingizi.

Amafaranga yavanywe kuri konti za banki ashyirwa kuri telefoni yageze kuri miliyari 277 Frw mu 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .