Abapasiteri bo muri Anglican basobanuriwe imikorere ya ‘Ejo Heza’, biyemeza kuyigisha abakirisitu

Yanditswe na Tuyishimire Raymond
Kuya 30 Ukwakira 2020 saa 08:34
Yasuwe :
0 0

Abapasiteri babarizwa bo mu Itorero ry’Abangilikani, Diyosezi ya Kigali, bakanguriwe gahunda ya Ejo Heza, batahana umukoro wo kuyigisha abakirisitu babereye abayobozi.

Ejo Heza ni gahunda y’ubwiteganyirize bw’igihe kirekire igamije kuzamura igipimo cy’ubwiteganyirize n’ubukungu bw’igihugu; aho umuntu yizigamira akurikije ubushobozi bwe.

Kayiranga Andrew ushinzwe gukurikirana ibikorwa by’iterambere n’imibereho myiza muri Diyosezi ya Kigali, asanga iyi gahunda yo kwizigama ari nziza, bityo ko nyuma yo kubikangurirwa bagiye kuyisangiza abakirisitu bashumbye.

Ati “Kuba twakanguriwe gahunda ya Ejo Heza, bidufasha gusobanukirwa uburyo leta yashyizeho bufasha ba baturage, ari nabo bakirisitu, uburyo bakoresha ngo bagere kuri ya ntego yo kwizigama mu buryo butandukanye kandi burambye.’’

Akomeza ati “Turaza kuyishyira mu nyigisho zacu, tuyigire kimwe mu gikorwa cyo gukangurira abantu kwizigama.’’

Ubushakashatsi bwakozwe n’Ikigo FinScope mu 2016, bwagaragaje ko Abanyarwanda basaga 86% by’abakuze bakorana n’ibigo by’imari, ni ukuvuga abagera kuri miliyoni 5.1.

Aha niho Umwepisikopi wa Diyosezi Angilikani ya Kigali, Rev Rusengo Nathan Amooti, asanga abakirisitu bakwiye kugira umuco wo kuzigama hakiri kare batarasaza.

Ati “Kuzigama ni umuco wa gikirisitu kandi ukaba n’umuco Nyarwanda kuko iyo umuntu akura niko imbaraga zigenda zishira, ariko iyo wazigamye ukiri muto usanga ejo hataramera nabi.’’

Umuyobozi Mukuru wa RNIT Iterambere Fund, Gatera Jonathan, yavuze ko mu guhitamo gukangurira abashumba gahunda yo kwizigama ya Ejo Heza, ari uko bagera ku Banyarwanda benshi mu buryo bworoshye kandi mbere yo gutanga ubutumwa ku bakirisitu n’abashumba babanza kubusobanurirwa.

Ati “Ubusanzwe dukangurira Abanyarwanda bose ariko kubera ko amatorero hari ukuntu agera kuri benshi ku buryo bworoshye, biba byiza ko n’abayobozi babanza gusobanukirwa, bakamenya ngo ubundi kwizigamira ni iki? Iyo bamaze kubyumva biroroshye kubisobanurira intama bayobora.”

Kuva mu 2018 ubwizigame bw’Abanyarwanda ku kigereranyo cy’umusaruro mbumbe w’ubukungu bw’igihugu (GDP) bwari hasi hasi ku kigero 10.6% mu gihe abafite ubwiteganyirize bw’izabukuru ari 8%.

Ubwizigame muri ‘Ejo Heza’ buteganya ko Umunyarwanda uri mu cyiciro cya mbere (ubu ni E) n’icya kabiri (D), asabwa kwizigama nibura 15000 Frw, ku mwaka Leta ikamwongerera 18000 Frw; uwo mu cya Gatatu (C) asabwa 18000 Frw, leta ikamwongerera 9000 Frw naho icyo mu cya kane basabwa 72000 Frw bo ntacyo bongererwa.

Umuntu uhabwa pansiyo, ayihabwa yujuje imyaka 55 akayifata mu gihe cy’imyaka 20.

Iyi gahunda y’ubwizigame bw’igihe kirekire ya Ejo Heza iri mu nshingano y’Ikigo cy’Igihugu gishinzwe Ubwiteganyirize, RSSB.

U Rwanda rufite intego yo kuzamura ubukungu bwarwo bukava ku rwego rw’ibihugu bikennye rukagera mu biyingayinga ibikize mu 2035 no kugera mu bikize mu cyerekezo cya 2050. Imwe mu nzira izarufasha kubigeraho ni uguteza imbere umuco wo kwizigama mu Banyarwanda.

Mu Ukuboza 2018 nibwo u Rwanda rwatangije ubwizigame bw’igihe kirekire bwiswe ‘Ejo Heza’ mu cyerekezo cyo kwihutisha iterambere ry’igihugu.

Inyigo yakozwe hategurwa ‘Ejo Heza’ iteganya ko mu mwaka umwe izagera ku basaga 207 000 bashobora kuzigama miliyari 14,5 Frw, mu gihe mu myaka itanu abagera kuri miliyoni ebyiri bakwizigama miliyari 195 Frw.

Abashumba bo muri Angilikani Diyosezi ya Kigali bavuze ko kwizigama bisanzwe ari umuco wa gikirisitu
Umuyobozi wa RNIT Iterambere Fund, Gatera Jonathan, asanga abashumba babanza gusobanukirwa na gahunda yo kwizigama mbere yuko bayikangurira abakirisitu babana buri munsi
Abapasiteri batahanye umukoro wo kwigisha abaturage aribo bakirisitu babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .